Ads by Google Ads by Google

Tala otooto mai le Fono Faitulafono


[ata: foa'i]
ausage@samoanews.com

Pago Pago, AMERIKA SAMOA

 

OVA 2,000 MOLI AUALA NA FAAPIPI’I FAASOLITULAFONO

 

E tusa ma le 2,000 le aofa’i o moli auala na faapipi’i faasolitulafono e le aufaigaluega a le Pulega o le Eletise ma le Suavai (ASPA). O se ripoti lea na faailoa e le Taitaifono o le Komiti o le ASPA a le Maota o Sui, afioga i le Faipule ia Alumamalu Filoiali’i Ale e tali atu ai i le faasea a le afioga i le Faipule ia Vailoata E. Amituana’i, i le tofu uma o le tele o afioaga ma moli auala fou mai le ASPA ae misi ai lona afioaga i Faga’alu.

 

Na saunoa Vailoata e faapea, e na o le 3 lava moli auala sa ia talosagaina ai le ASPA e faapipii mo lona nu’u i Faga’alu i le tausaga na te’a nei, peita’i o lea ua amata le tausaga fou ae lei faatinoina lava lea galuega. Sa ia asia le Ofisa o le ASPA i le masina o Tesema na te’a nei i le tulaga o moli auala, ae na faailoa ane ia te ia, ua mae’a ona faapipi’i moli na aumai.

 

Na talosaga Vailoata ia Alumamalu mo se avanoa e fesiligia ai le ASPA e tusa ai o le faaletonu ua tula’i mai i moli auala.

 

O le vaiaso na te’a nei na feiloa’i ai le afioga a Alumamalu ma sui o le Pulega a le ASPA e faatatau i lenei mataupu, ma ia fofogaina ai loa i luma o le Maota o Sui i le vaiaso na te’a nei le ripoti na faailoa ane e sui o le ASPA ia te ia e tusa ai o le mataupu i moli auala.

 

Saunoa le afioga i le ali’i Faipule ia Alumamalu e faapea, e tusa ai o le ripoti na faailoa atu e sui o le ASPA ia te ia, e tusa ma le 5,500 le aofa’i o moli auala sa manatu le ASPA e sui i moli auala fou i le tausaga na te’a nei. E tusa ma le 6,000 le aofa’i o moli auala fou na mafai ona oka ma amata ai loa o le galuega.

 

O le fuafuaga sa i ai, e sui le moli tuai i le moli fou, peita’i o le faafitauli na tula’i mai, ao faatino galuega a le aufaigaluega mo le faapipiiina o moli, na afifio ane afioga i Faipule, o Senatoa, e oo lava foi i Sa’o o aiga ma talosaga i le aufaigaluega mo ni moli auala faaopoopo i isi pou uila e le o i ai ni moli ina ia malamalama ai le auala.

 

Na usitaia e le aufaigaluega talosaga a Ta’it’i o le atunu’u ma Sa’o o aiga ma latou faapipiiina ai loa moli auala i pou uila e lei i ai ni moli. O le taunuuga o lea gaioiga e pei ona saunoa Alumamalu, e tusa ma le 2,000 moli na faapipii e le tusa ai ma fuafuaga sa i ai.

 

FESILIGIA RIPOTI MO LE FAAAOGAINA O TUPE FESOASOANI O LE COVID-19

 

Ua talosagaina e ni isi o Faipule o le Maota o Sui ripoti mai le faigamalo e faamalamalama ai le faaaogaina o tupe fesoasoani mai le malo tele mo puipuiga o le faama’i o le COVID-19 o loo vavao ai le lalolagi aemaise ai fo’i puipuiga mo Amerika Samoa.

 

Saunoa le affoga i le alii Faipule mai Tualauta ia Larry Sanitoa, e tatau ona faaoo mai e le faigamalo fou ni ripoti e tusa ai o le fa’aaogaina o tupe fesoasoani mai le malo tele mo Amerika Samoa mo le faama’i o le COVID-19. I lona talitonuga, e le mafai ona malamalama le Fono Faitulafono i le tulaga o loo i ai le fa’aaogaina o tupe nei pe afai e leai se ripoti e tuuina mai i afioga i Faipule ma Senatoa.

 

Sa ia talosagaina le Fofoga Fetalai ina ia talosaga i le faiga malo fou e tuuina atu ni ripoti e faailoa atu ai le aofa’i o tupe ua mae’a ona fa’aaoga, aofa’i o tupe o loo totoe, atoa ai ma atina’e sa fa’aaoga i ai tupe ua fa’aalu.

 

Sa ia talosagaina fo’i se ripoti i tulaga o tupe maua ma tupe fa’aalu a le malo mo le Kuata muamua ua mae’e atu. E ui o lea na saunoa le Kovana i lana ulua’i saunoaga faa Taupo i le tatala aloaiaina o le Fono Faitulafono, i le tulaga o tupe maua a le malo, peita’i e le i aofia ai i lana saunoaga ripoti motupe fa’aalu.

 

Na lagolagoina e le afioga i le ali’i Faipule ia Vailiuama Steve Leasiolagi le talosaga a Sanitoa mo ni ripoti o tupe mai le faigamalo. Saunoa Vailiuama e faapea, e iai isi atina’e sa folafola e le faigamalo ua mavae atu e fausia peita’i o lea ua mae’a le latou nofoaiga a’o lea lava e le’i faatinoina a latou folafolaga.

 

Na lagolagoina e le afioga i le ali’i Faipule mai Vaifanua tele ia Lavea Fatulegae’e Palepoi Mauga talosaga mo ripoti o tupe fesoasoani mo le atunu’u.

 

Sa ia taua le tele o faaletonu o loo alia’e mai i le Falelima i Sasa’e i le taimi nei e mena’omia ai le fesoasoani a le malo. E le gata e lei mae’a lava ona fausia le Falema’i Faaitumalo i Amouli, ae oo fo’i i le Fale Leoleo e na o le to’a 4 Leoleo o loo galulue ai, leai se Taavale EMS leai fo’i se Taavale Fuimu.

 

Na talosagaina e Lavea se iloiloga ma se sui mai le Matagaluega o Leoleo se’i faamanino a latou fuafuaga mo le faaleleia o nei auaunaga i le Falelima i Sasa’e, atoa ai ma le Faatonusili fou o le Matagaluega o le Soifua Maloloina, mo le faamaninoina o se tulaga ua i ai galuega mo le faafouina o le Falema’i Faaitumalo i Amouli.

 

Na taua e nisi o le Falelima i Sasae i le Samoa News e faapea, afai ae tula’i mai se faalavelave faafuase’i i Sasa’e e pei o se mu, e taunuu atu le Taavale Tineimu mai Fagatogo ua le aoga le fale, ua mae’a ona faatamaia i le afi. E faapena fo’i pe a tula’i mai se gasegase faafuase’i poo se isi fo’i e malemo, e oo atu le taavale EMS poo va’a faaola a Leoleo i le sami, ua leai se aoga ua maliu le tagata, e mafua mai i le mamao o le nofoaga o loo aga’i atu ai le fesoasoani.

 

Na lagolagoina e le mamalu o le au matutua mai Sasa’e le finagalo o le ali’i Faipule ia Lavea, i le tatau lea ona atoatoa uma vaega e faatino ai tautua ma auaunaga mo Sasa’e, faapei fo’i ona sapi ma talisapaia e Sisifo ma le ogatotonu o le atunu’u.

 

FESILIGIA LE $2.6 MILIONA O LE SALA A LE STARKIST SAMOA

 

Ua fesiligia e le afioga i le ali’i Faipule mai Fagatogo ia Vailiuama Steve Leasiolagi le fa’aaogaina o le tupe e tusa ma le $2.6 miliona, lea na maua mai e le malo o Amerika Samoa mai le sala a le Kamupani i’a o le StarKist Inc, ina ua faamaonia e le Ofisa o le Puipuiga o le Siosiomaga a le malo tele (US-EPA), lagolagosua atu i ai le Ofisa o le Siosiomaga i Amerika Samoa (AS-EPA) le faatamala o le kamupani i le tausia o ogasami ma le gataifale.

 

Saunoa Vailiuama e faapea, o se vaega o le tupe lea na maua e le malo, na fuafua e fausia ai le uafu i Malaloa. E oo mai i le taimi nei e pei ona taua e Vailiama i luma o le Maota o Sui i le vaiaso na te’a nei, e na o le 2 lava pou u’amea ua mae’a ona fausia mo le uafu, a o lea ua tula’i ese atu le faigamalo sa latou faia le folafolaga.

 

E tele isi atina’e sa fuafua le malo e fausia i le vaega tupe lenei, peita’i e foliga mai e leai ma se mea ua faataunu’uina.

 

Ua talosagaina e Vailiuama le Teutupe tofia a le malo mo se ripoti e tusa ai o le fa’aaogaina o le $2.6 miliona.

 

Na faafetaia e le Sui Fofoga Fetalai sa taitaia Tauaofiaga a le Maota i le vaiaso na te’a nei finagalo fa’aalia o afioga i alii Faipule. Sa ia faaoloolomaau i le mamalu o afioga i Faipule ina ia tu’u se avanoa i le Faigamalo fou e tapena ai ma faamasani i le tulaga o le faagaioiina o le malo, ona mafai ai loa lea ona maua ni ripoti i le tulaga o tupe maua ma tupe fa’aalu a le malo.

 

AUALA I NU’UULI

 

Ua fesiligia e le afioga i le ali’i Faipule mai Aua ia Faimealelei Anthony Fu’e Allen le faigamalo fou a Lemanu ma Talauega, pe fa’aauau ona la faamalosia tulafono sa faatula’i e Lolo ma Lemanu i le tausaga ua te’a e tusa ai o le auala i Nu’uuli i taimi o taeao atoa ai ma le manava o galuega.

 

Saunoa Faimealelei e faapea, o le faafitauli i le auala i Nuuuli, i luma o le Laufou Shopping Center ma le CBT, e kilia lava le feoa’i a ta’avale pe a leai ni Leoleo e tiute ai i le taeao ma le afiafi, ae o le taimi lava e tiute ai Leoleo ma faatutu solo a latou ‘cones’ i le moa o le auala, ona amata loa lea ona poloka le auala.

 

I le talitonuga o Faimealelei, e sili pe a toe fo’i lava i le tulaga sa i ai muamua, o le tuu le auala e feoa’i ai taavale e aunoa ma le toe faalavelave i ai o Leoleo.

 

Na faamaonia mai e se sui o le Ofisa o le Kovana i le Samoa News, le fuafuaga a Lemanu ina ia faaauau pea suiga ma tulafono sa amata mai e Lolo i le tausaga na te’a nei.