Ads by Google Ads by Google

TALA O LE LALOLAGI


O nisi o tamaitai fa'au'u mai le au fa'au'u muamua lava a le Wayland Baptist University i Amerika Samoa. Malo le fa'atoatoa. [ata foa'i : Wayland]

Pago Pago - AMERIKA SAMOA

 

41 AUFA’AU’U ULUA’I FA’AU’UGA - WAYLAND BAPTIST UNIVERSITY, AMERIKA SAMOA

 

O le ulua’i fa’au’uga a nisi o alo ma fanau a Amerika Samoa ua mae’a umia fa’ailoga maualuluga mai a’oa’oga na a’otauina ai i le Iunivesite o Wayland Baptist i Fagaima, na fa’ataunuuina lea i le aso Faraile ua te’a. E to’a 41 i latou na fa’au’u ai ma fa’ailoga o le Bachelor o latou kosi sa tauavea.

 

O le Wayland Baptist Universtiy sa amatalia mai le Setete o Texas i le a’ai o Plainview, o le lala o lea Iunivesite tele sa fa’atuina lea i Hawaii i le tausaga e 1979, ae fa’ato’a fa’atuina le lala i Amerika Samoa nei i le tausaga e 2018. O le latou ulua’i vasega lea ua fa’ai’u manuia a’oa’oga, ma ua pasia e i latou a’oa’oga e agava’a ai e umia fa’ailoga Bachelor i a latou kosi tau’ave.

 

Ua fa’amautu i latou i le Georgina Building i Fagaima ae sa mua’i tatalaina latou aoaoga ma le Ofisa Autu i le Manumalo Academy i Malaeimi mai le amataga i le 2018.

 

O le afioga le Kovana Sili Lemanu Peleti S. Mauga sa avea ma fofoga fa’apitoa o le sauniga lea sa fa’atautaia i le Manumalo i le aso Faraile ua te’a.

 

O nisi o fa’ailoga taua sa taua’aoina i lenei ulua’i fa’au’uga: Lucille Thompson Leota – Amata mai a’oga - Fall 2019 Outstanding Student Performance Award; Papaalii Iakopo Ierome – Amata mai Aoga Fall 2020 Outstanding Student Performance Award; Dutch Hopkinson – Amata mai Aoga Fall 2021, Outstanding Student Peformance Award

 

Fa’ailoa se taofi o se tasi o tamaitai o lo ua savali e talia lona fa’ailoga Bachelor of Business, Esther Iosefa-Moa, “Sa ou mulimuli mai i le fa’aiuga o se tasi o au uo na ma a’oa’oga ma fa’au’u mai i le Kolisi Tuufaatasi, peita’i o se fa’aiuga lelei ua ou faia. O lea ua gafatia ona umia le fa’ailoga Bachelor, ae o lo’o fa’aauau foi le mafutaga ma fanau ma le aiga atoa. Ua lelei fo’i sa mua’i sailia le AA Business i le ASCC, lea ua fa’aauau mai i le Wayland Baptist, o lo ua aluga lelei lava le fa’asologa o le a’oga, ma ua agava’a i lea fa’ailoga maualuga. O le a fa’aaoga loa e faaleleia atili ai le tautua mo le mamalu lautele ma le malo foi.”

 

Ua fautua mai fo’i o ia i nisi o alo o le atunuu, “O le mea sa ou le iloa, o lo’o manaia lenei avanoa e mafai ai ona fa’aauau le a’oga i Samoa nei lava, ae le tu’ua le aiga, pe faigaluega fo’i e sailia le tamaoaiga tausi o lou aiga. Ua fetuuna’i taimi o vasega, o nisi taimi e faia mataupu e fesaga’i ma faia’oga, ae o nisi taimi ua fa’aaoga feso’ota’iga tau tafa’ilagi mo aoaoga ma suesuega. O nisi taimi ua fa’atautai lua ai faapena ona o a’afiaga o feagai ma lenei vaitau ona o fa’ama’i pipisi.”

 

“O le tali lea i le to’atele ua amata aiga, ma ua le toe gafatia ona tu’ua i latou ae alu i fafo e a’oga ai. Lea ua fa’aaoga le aiga o se isi lea vaega tele o lau au fesoasoani ia mautu lou fa’amoemoe e to’ai taunuu i se taimi e taua’aoina ai se fa’ailoga maualuga fa’apenei, ae o e nofo pea i lou aiga, faigaluega ma toe a’oga foi. Fa’afetai i nei faiga fou, ua fa’aulu mai e le Wayland Baptist, ina ia mafai ona fa’atino mo’omo’oga e fia fa’aauau pea le a’oga mo tusi pasi maualuluga. Fa’afetai i lou aiga, aua o outou ua ou se’ei ai i ma’a o malie,” o se toe tala fa’amalosi lea a Esther Iosefa Moa.

 

O sana toe fa’afetai o le aufaigaluega a le Wayland Baptist, aua sa latou fa’alogo ma taumafai e gauai e fesoasoani tele ia te ia ma le fetu’una’iga o lona taimi avanoa, aua ana vasega i so’o se ala ua mafai ai ona feso’ota’i ma faia’oga, le pulega ma le aufaigaluega ma lona tagata tagata taumafai.

 

TALOSAGA UIFA’ATALI - TOE ILOILO LE FAITAUGA O LE ATUNUU 2020:

 

O le tatou faipule i le Konekeresi Uifa’atali Aumua Amata sa ia toe talosaga atu i le Failautusi o le Matagaluega o Fefa’ataua’iga a le Malo Tele, Gina Raimondo, ina ia toe iloilo toto’a ane i le aotelega o tagata lautele o le atunuu sa fa’aopea i fafo mai o Amerika Samoa, a’o le’i faia le faitauga, maua toe suia ai le aotelega o le atunuu o lo ua fa’asoa i ai alamanuia sa atofaina mo le faitauga tuai o le atunuu.

 

O le aotelega o i latou ua mae’a toe fa’auia i Amerika Samoa talu mai ona faia malaga toe fa’afo’ia o tatou tagata sa opea i fafo o le atunuu, ua silia nei ma le 2,000.

 

“Ua ou tusi toe fa’amanatu atu le aotelega o i latou sa alaalata’i i fafo e le’i faitauina i le faitauga tamau a le matou malo fa’ateritori o Amerika Samoa, lea ua toe fa’amautu atu nei i fanua ma aiga, ina ua mae’a ona toe tatala mai femalaga’iga ina ia toe fa’afo’i atu ai i fanua ma aiga. O se mea ua fa’ailoa mai e le Loia Sili o Amerika Samoa e ao ina ou nofouta i ai.” O se tusi lea a Uifa’atali Amata na tusia ia Novema 23, 2021 ma ua fa’auia atu ia Gina Raimondo.

 

“O le faitauga aofai o Amerika Samoa i le Faitauga o le 2020 e na’o le 49,710 ma ua pa’u mai ai e tusa o le 10.5% mai le faitauga ua te’a i le tausaga 2010, lea sa tula’i mai i le 55,519 tagata. O le isi lea vaega o tagata e to’atele sa tatau ona faitauina ae le taulia ai le to’atele e le’i mafai lava ona oo atu i le atunuu e oo mai i lenei taimi.” 

 

O lana aioiga ua tuuina atu i lea tusi ia Raimondo ua ia talosagaina ai lona galulue fa’atasi ma le Malo o Amerika Samoa i lea tulaga. “Ou te fa’afetaia se avanoa lelei o le a maua e le Malo o Amerika Samoa e galulue fa’atasi ai ma oe, ina ia taualoa lea suiga tele i le faitauga o le matou malo fa’ateritori, ia tagai toto’a fo’i i lea itu ma ia aiaia i ni fa’aiuga faia mo le faitauga o Amerika Samoa. E mana’omia lava lau fesoasoani e si matou malo, ae afai e i ai lava se mea e fia fa’asiligia ai le fesoasoani atu mai lo’u nei sui, e mafai lava ona fa’auia atu se mana’omia e tusa o le faitauga o Amerika Samoa.”

 

POLOKETI GALUEGA MO LE MAMALU LAUTELE - “TALAVOU TA’IALA A LE SDA IAKINA

 

Ina ua mae’a lelei le tausaga atoa o a’otauina le fanau talavou a le SDA i mataupu Fa’a-Ta’ita’i o Talavou Ta’iala, ia gafatia e i latou ona soifua i olaga o lu’iga eseese e ono o’o ia i latou. 

 

O le va’aiga lautele fo’i a se ta’ita’i ina ia mafai ona fefaasoa’i i manuia mo nisi ua va’aia o lo’o i ai ni mana’omia fa’apitoa o soifua ma i latou, ma isi mea uma e ao ina taga’i toto’a i ai ta’ita’i ina ia aluga lelei le fa’agasologa o le soifua o tagata uma o aotelega i lana puipuigamalu fa’ata’ita’i.

 

I le mae’a ai o lea kosi aoga tele mo tupulaga, ua lu’ia ai loa talavou ta’iala uma ina ia latou auai i se taumafaiga e fa’atino mea ua latou a’oa’oa i le tausaga atoa.

 

O le latou galuega fa’atino, sa latou tu’ufa’atasia ai mea’ai o so’o se ituaiga, moega ma mea uma e fa’aaoga i potu moe, ma vaila’au eseese o mea e fa’aaogaina e tausia ai le soifua maloloina lelei o so’o se tagata soifua, ae maise i latou o lo’o tausia esea mai o latou aiga.

 

Ua filifilia e i latou le Toese i Tafuna, le Hope House i Fatuoaiga ma le Nofoaga Fa’apitoa e tausia ai nisi ua sauaina a le Matagaluega o le Alagamanuia mo Tagata Lautele a le tatou malo.

 

I le taimi o nei foa’i taua sa tu’ufa’atasia lava e le fanau Talavou Ta’iala ma taua’aoina atu, sa fa’ailoa mai le agaga fa’afetai o nei pulega ma aufaigaluega o nofoaga sa to’ia fo’i i le foa’i taua.

 

Sa faia ni sauniga fa’apitoa e le tupulaga talavou ta’iala sa auai i le taua’aoina atu o nei foa’i. Na latou pesepese i vi’iga o le Atua ma fai tapua’iga fa’atasi ma i latou, ona latou tu’ua ai lea o nei nofoaga i le agaga fa’afetai ma le fiafia e foa’i atu.

 

Na fa’ailoa mai e Seiuli Lance pelenato, o le fa’atonu o Tupulaga Ta’iala a le SDA, “O le auaunaga lenei ma le fa’atinoga e tatau lava ona faia e le fanau talavou ta’iala, ina ia mautinoa ua agava’a i latou mo ni fa’aiuga lelei, mai a’oa’oga sa latou feagai ai i le tausaga atoa, o se fa’ata’atiaga o lo’o tamau i aoaoga foi fa’ata’iala mo tupulaga a le Ekalesia.

 

“O le mea mautinoa, e mafai ona tatou suia le lalolagi ma le tulaga o i ai pe afai e mafai ona tatou galulue fa’atasi i le loto e tasi ma le manatu e tasi, o se fa’asinomaga o lo’o ua mae’a tamau mai i le Tusi Pa’ia,” o se tala lea a Pelenato.