Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

 

MEAALOFA TAULIMAINA E FANAU FA’ATASI - AGAGA ALOFA I LE UO PELE: RALPH FISO

 

Na iloga ona o mai fa’atasi le vasega fa’au’u tausaga 2004 mai le Nuuuli VocTech High, ina ia latou tuufa’atasia se foa’i tupe e fesoasoani i le faletua ma le fanau ae masie o matua o se tasi o le latou vasega ua tuumalo ona o le Covid-19 i le setete o Texas.

 

O le latou tuufa’atasiga na maua ai le latou aotelega mai le lala lava latou o Washington State e $1,000 ma o le a aotelega fa’atasi ma le Asosi a Samoa, Hawaii ma Kalefonia mo le fa’amoemoe e maua le maka sa latou fa’aiugafonoina, e tatau lava ona maua le $3,000.

 

O le to’alua ai lea o sui o lenei vasega ua maliliu i lenei lava tausaga, ma o se fa’anoanoga lea ia i latou uma. O le isi to’atasi o le latou vasega sa alaala ma faigaluega i Hawaii i le taimi na maliu ai, i le ogatotonu o lenei tausaga. Lea foi ua to’esea se tasi o lupe faalele a matua ma le pa’ia o aiga, ma o se taimi sa latou mafuta fa’atasi ai fo’i a’o alaala Ralph Fiso ma le aiga i Utah, ua matua toe fa’amanatu uma i lenei fonotaga fa’atasi a le vasega 2004.

 

Molimauina e le tama o Matautia Soi Fiso, “O si o’u atali’i lenei sa tu malosi i le taumafaiga ia matou nofomau ma maua sitiseni i lenei malo tele. O lana galuega ua silafia e le Atua mo ma’ua matua, ua lava ma totoe, ua fa’amalieina a’u i lana tautua i si o matou aiga, e le gata ai iinei ina ua fa’ato’a mai i ma’ua ma le fanau, ae o le taimi fo’i e tapena ai ma saunia mea uma e molita’i atu i Samoa, e fa’atu ma fa’atautaia pea le faleoloa i Faleolo. O le tau’au malosi o Ralph, e le muta ana foa’i ia i matou matua, ae ua faasalafa i o ma’ua aiga ma le tina.”

 

O le taimi na po’ia ai Ralph i le Covid-19, sa le iloa e matua. Peita’i o le galuega e feavea’ia ai solo ai Ralph o le ave masini tetele suaeleele ma isi masini uma ua mae’a a’otauina ai ma fa’au’u mai ai i le aoga faapitoa mo ia tomai sa toe ulufale i ai ina ua mae’a mai lona fa’au’uga i le Aoga Matata Eseese i Amerika Samoa na fa’au’u ai i le tausaga e 2004.

 

“Ina ua ma’i Ralph ma avatu e faia suega o le Covid-19, na iloa ane ua maua ai. Ona su’ea lea o lona aiga atoa, ua maua fo’i le tina o le aiga. Na ave uma si a’u fanau e le falema’i ma loka ai, ae tuua na’o le pepe e le’i atoa se tausaga ma le isi e tolu tausaga. Na maua loa e ma’ua le tala ua oo i lea tulaga le aiga o si atalii, oso loa le tina o le aiga e alu e va’ai le fanau ma fa’amama ma fa’amuli ane i le latou fale. Na manatu lava ma’ua o le a toe fo’i i se lelei le po’ia ai ole atali’i ina ia matala mai i tua si ona to’alua o Hannah Fiso. Peita’i na fa’apea o le a sau i tua Ralph i le aso na soso’o ai, peita’i ua tete’i i la’ua ma le tina, ua fa’ailoa mai e le falema’i ua maliu Ralph,” o se fa’amatalaga lea a le susuga Mata’utia Soi, e tusa ai o le mea ua tupu. 

 

“Matua e, afai ae po’ia le fanau i lenei gasegase, e matua le sao atu lava se asiga ia te ia. E le iloa fo’i poo fea o i ai uma aia tatau e mafai ai ona alu atu le tagata i lona saolotoga e va’ai sana pele ua taofia. Ao fea fo’i ua fafao uma i ai aia tatau a tagata e le tatau ai ona fefe fua i le oti, o le mea e oo mai, ae toe fia talanoa tasi atu i le atali’i. O le ogaoga lea o lenei fa’ama’i, ua avea ma mea e toe ave’esea uma ai aia tatau a tagata e soifua saoloto ma fealuai saoloto ai. Ua oo i ai lenei aiga, e le faigofie ona folo molemole le faigata, ae le mafai fo’i ona e tatalia to’atasi le malosi o le aupeau, pe afai e te manatu ina ia e solituina lea ituaiga o fa’asa aua ua mafuli fa’atasi uma i ai malo o le lalolagi,” o se toe upu lea a le tama, i lona talanoa mai e tusa o le to’esea o le atali’i, ma ua talatala foi ona lagona ootia.

 

“Pau le mea e iloa, pefu tele nofoaga e faigaluega ai Ralph, ae le o se tagata e tino ma’i pe ma’i gofie. Ao le Flu lava latou, e foliga lava i ai le gasegase lea o le Covid-19 ma ona auga amata.” O se toe tala lea a le tama o Fiso i le talanoaga i so’otaga o le facebook VC.

 

E ui ina nonofo tumau Mata’utia Soi ma le Tina i Washington State ae ua fa’amoemoe e fa’alefulefu le tino o Ralph, ma o le a faia sauniga uma Texas ona lafoa’i lea i San Diego i le nofoaga ua faamautu i ai tagata uma o le aiga o le latou tama.

 

O le fa’atasiga sa toe fa’afofogaina ai nisi o molimau a le vasega e tusa o uiga fa’aalia o lea atali’i, e tausa’afia ma e le tele ni tala ae fa’amasani tagata ma e tausa’afia ona uiga i le va ma i latou uma i le vasega mai lava i le taimi na a’o’oga ai.

 

FA’AALIGA FA’ALAUILOA AI LE ATOAGA O LE 61 TAUSAGA FA’AVAE O AMERIKA SAMOA

 

Ua mae’a tapena se fa’aaliga taua tele e le Faletusi Feleti Barstow o le tatou Malo i Utulei ma ua agatonu ona maimoaina e le mamalu lautele o fanau aoga talu mai ona tatala mo maimoaga i le aso Faraile o le vaiaso ua te’a.

 

Na auai le afioga le Kovana Sili, Lemanu P.S. Mauga i le tatalaga aloa’ia o lea poloketi matagofie ma e aoga tele mo tatou fanau ina ia nofouta i latou i mea uma na aofia fa’atasi i le fa’atula’ia o le tatou fa’avae ma ua fa’atautaia mai ai le tatou malo i lenei umi o tatou soifua fa’atasi ai ma isi uso uma ua fa’atasia i le tatou atunuu atoa.

 

O le tamaitai o Lindsey Laupola o le Ofisa ua fa’atula’ia mo le Political Status, ma le toe iloiloa fa’aleleia o le tatou Fa’avae fa’atasi ai ma so’otaga vavalalata ma le Malo tele ua tatou o soifua fa’atasi ai nei, ua fa’ailoa mai, “O se mea e ao ina tulimata’ia e tatou fanau talavou, ina ia latou folau i lagima ma le malamalama toto’a i le tatou fa’avae.”

 

O le poloa’iga fa’alaua’itele a le sa ia fa’amauina ai le aso Oketopa 17, ia avea ma aso e taualoa ai le tatou Fa’avae i Amerika Samoa lava.

 

O lo ua i ai nei ni fa’atulagaga o polokalama ma tapenaga uma o le fa’amanatuina o lea aso e saunia lelei ai mo le Aso o le Faavae o le Malo o Amerika Samoa 2022.