Ads by Google Ads by Google

Suiga fou mo tagata ulufale mai Misela ua pepesi Amerika Samoa

O le fa’asa muamua ua fa’amalosia nei e le Malo o Amerika Samoa  mo i latou e fia ulufale mai, o le fanau pepe e amata mai le fa’ato’a fanau e o’o i le 4 tausaga le matutua ua le toe mafai ona ulufale mai i le teritori mai Samoa ma isi atunu’u o lo’o pepesi ai le misela.

 

O le vasega o pepe uma ua ta’i 6 masina le matutua ua fa’ataga loa ona faia tui puipuia o le MMR i le taimi nei, ma ua fa’asolo ona una’ia malosi matua ina ia tautuana, e ave le fanau e toe siakia o latou tui puipuia ia matua’i atoatoa.

 

O le isi fa’amalosiga ua i ai nei o i latou uma o lo’o nofosala i le Toese i Tafuna, ua le toe mafai ona talia ni asiga mai o latou aiga. Afai e avatu asiga o le a tu’uina uma lava i luma o le Ofisa i le Faitoto’a i le toese o lo’o tiute, latou te fa’ao’o i sui o lo’o nofosala.

 

I le taimi nei e silia ma le 210 i latou o lo’o nofosala i le Toese, ma ua faia nei suiga, ina ia le o’o fo’i le Misela i nei sui uma o nofosala. O le suiga lea na fofogaina i le fono a le Kapeneta sa faia i le aso Sa.

 

I le soso’oga o le poloa’iga fa’alaua’itele a le Kovana e fa’aauau ai pea le fa’amalosia o tulafono uma mo le ulufale mai o tagata, ua fa’amalosia ai nei ma le taofiga ona toe talosaga ni pemita mo tagata e fia malaga mai Samoa ma Tonga, o atunu’u uma nei ua maua i le pepesi o le  Misela.

 

O lea taofiga, ua fa’atali le toe tatalaina se’i toe logo mai fo’i se suiga i ai e Kovana Lolo Moliga.

 

Ua fa’aopoopo i ai, ua vala’auina i latou uma o lo’o nonofo ova aso i totonu o Amerika Samoa nai lo aso na fa’atulaga e ao ina toe fo’i ai i latou malo, ia o mai e fai o latou tui, ma ua fa’atualga foi le 30 aso e mafai ai ona talosagaina loa o latou pepa nofo mau i Amerika Samoa, ia fa’aleleia a’o le’i mae’a lea taimi atofaina.

 

Peita’i, pe afai o oe lea ua tatau ona fa’amautu ou pepa e te alaala ai i Amerika Samoa o se tasi e a’afia i ni soligatulafono mamafa, o le a le talia oe.

 

Ua i ai pemita ua talia, o ni tulaga le ma’alofia e ao ai ona ulufale mai se tasi, ma e tatau ona fa’amaonia e le Ofisa o le Kovana lea talosaga.

 

Manatua o le fa’atagaga lenei ua na’o le 30 aso, e alagatutusa lava ma le taimi atofa e faamalosia ai tulafono uma o le taofiga ona o le Misela i Amerika Samoa nei.

 

Ma ua fa’amalosia le taofiga atoa o mea uma e fa’apotopoto ai le mamalu lautele o tagata ma aiga, ae maise o a’oga ma ekalesia. O le tele o mea na fa’atulaga mo le autalavou ua taofia uma nei. Ua le o’o atu ai ma pesepesega a le malo sa fa’atulaga ia Tesema 15-17.

 

Ua le toe faia fo’i ma le polokalama lea e o mai ai le au faipisinisi laiti ma le au faifa’ato’aga e fa’atau atu a latou mea taumafa Samoa ua mae’a gaosia lelei i le Maketi i Fagatogo - Aso Faraile muamua ma aso Faraile Mulimuli o masina ta’itasi.

 

I le taimi nei ua taofia uma fiafia a aiga e masani ona faia i nei vaitau. O latou lava fa’atasiga fa’aleaiga pe o fa’atasiga fo’i a le tupulaga talavou e masani ona faia i autafa o latou fale, ua o’o i ai le fa’amalosiga lenei ona o le Misela.