Ads by Google Ads by Google

Solofua e le Fa’amasinoga moliaga fa’asaga ia Neru Soli

ausage@samoanews.com

Ua solofua e le Faamasinoga Fa’aitumalo i le vaiaso na te’a nei moliaga mama e 2 sa tu’uaia ai e le malo le susuga a Neru Soli, ina ua le mafai e le malo ona tuuina atu mau faamaonia e lagolago ai le latou tagi fa’asaga ia Soli.

 

O le susuga a Soli, o ia lea e to’a 7 i ai sui o le Ekalesia Church of Christ i Nuuuli na loka ma tu’uaia i lo latou faaoolima lea i se ulugali’i i le afiafi o le aso Sa, Setema 15, 2019 i le nofoaga lava o le Ekalesia i Nuuuli.

 

Na tu’uaia e le malo ia Soli i moliaga mama e 2 e aofia ai le faaoolima i le tulaga tolu atoa ai ma le faatupu vevesi i nofoaga faitele. O le ali’i loia fautua lagolago ia Bob Stuart na tula’i mo Soli, ae o le tama’ita’i loia sili lagolago ia Laura Garvey na tula’i mo le itu a le malo i lenei mataupu.

 

Talu ai sa tete’e Soli i le tagi a le malo, na mafua ai loa ona fa’ataunuuina lana fa’amasinoga autu i luma o le afioga i le ali’i Fa’amasino ia Elvis P. Patea.

 

E pei ona taua e le malo i le latou folasaga o mau e lagolagoina ai le latou tagi faasaga ia Soli e fa’apea, o le ulugali’i na a’afia, o totino fo’i o le Ekalesia na faaoolima i ai i latou e to’a 7 na molia i lenei mataupu lea e aofia ai ma Soli. O le fafine na fasi i fafo o le Falesa, ae o lona to’alua na fasi i totonu o le Falesa i le taimi na aga’i atu ai Tane o le Ekalesia mo sa latou fonotaga e tau faato’a filemu ai le vevesi ua tula’i mai.

 

Na taua atili e le malo e faapea, o le mataupu lenei na afua mai i se fonotaga sa faia a sui e to’atolu o le Ekalesia. O lea fonotaga sa faia lea i le Paka Liona i le afiafi o le aso lava lea na tula’i mai ai le fa’alavelave, i le va o Luao Soli Jr (o le isi lea o loo molia i lenei mataupu), faapea ai ma le Tamaloa sa aafia, ma se tasi o sui matua o le Ekalesia.

 

E le i i’u lelei lea fonotaga, ma mafua ai loa ona savali ese Soli Jr ma lona le fiafia, ma aga’i sa’o atu loa i le nofoaga o loo i ai le Ekalesia ma logoina loa sui o lona aiga Sa Soli, fai mai ua fasi o ia i le fonotaga sa faia i le Paka Liona. Ae na faailoa e sui o le Ekalesia i Leoleo, e le moni le fa’amatalaga a Soli sa faia, e leai fo’i se vevesi na tula’i mai i lea fonotaga.

 

O le maua ai e sui o le aiga o Soli Jr o le tala e faatatau i le mea sa tupu, na aga’i mai ai loa ni fafine se to’atolu o le Ekalesia i luma o le alatele, ma latou maua mai ai le fafine lea na aafia o loo nofonofo atu ai i luma o le Falesa. O fafine na aga’i ane e aofia ai Leua Vili, lea fo’i e igoa ia Julie; o Taua Suapusi ma Minute Soli ma latou faaoolima lea i le fafine na a’afia.

 

O le masina o Tesema na te’a nei na tali ioe uma ai fafine ia e to’atolu o le Ekalesia i le moliaga o le faaoolima i le tulaga tolu, e mafua mai i le faalavelave lea na latou au faatasi ai e fasi le fafine na a’afia, ma ua faanofovaavaaia nei i latou mo le 12 masina.

 

O le mae’a ai o le fa’alavelave e pei ona tula’i mai, na talo ai loa e le ali’i Faifeau o le Ekalesia se fono faatopetope a Tane uma poo ulu o aiga o le Ekalesia, mo se taumafaiga ina ia fofo ma faafilemu le mataupu ua alia’e mai.

 

O lea fono sa usuia lea i totonu o le Falesa, lea fo’i na auai Soli ma le Tama na aafia i lenei fa’alavelave. O le fonotaga la lea e pei ona tu’uaia ai e le malo, i lona fesoasoani lea i le fasiga o le Tama na aafia i lenei mataupu, ina ua mae’a ona tu’i e le alii o Tautua Suapusi le Tama na aafia ma palasi ai i lalo.

 

O tu’uaiga ia a le malo na matua tete’e malosi ai Soli. Na taua e Soli, e lei pa’i lona lima i le Tama na aafia, o ia na alu atu e vaovao ma faato’a filemu le vevesi.

 

I le faamatalaga tauto a Soli i luga o le nofoa molimau, sa ia taua ai e fa’apea, o ia lava le tagata pito matua o le Ekalesia o loo i ai i le taimi nei.

 

I le faalavelave e pei ona tula’i mai e pei ona taua e Soli i lana molimau, na aga’i atu ai i le fonotaga lea ua usuia i totonu o le Falesa mo Tane uma o le Ekalesia. E taunuu atu, ua tumu totonu o le Falesa i Tane o le Ekalesia, o le mafua’aga lena na nofo mai ai i le pito lava i tua o le Falesa i le taimi o le fono.

 

Sa ia vaaia le savali mai o le Tama na aafia ma aga’i atu i le pito i luma o le Falesa, e foliga mai o lo o aga’i atu e fia talanoa ia Soli Jr, peita’i o le taimi lea e pei ona taua e Soli i lana molimau, na ia vaaia ai loa le ali’i o Tautua Suapusi ua tula’i ane ma tu’i loa foliga o le Tama na aafia ma palasi ai loa i lalo.

 

O le tumu tele o le malumalu i sui o le Ekalesia sa auai i le fonotaga i lea afiafi, na mafua ai loa ona oso Soli i luga o nofoa ona o lona naunau e fia oo atu i le pito i luma e taofi ma faafilemu le vevesi.

 

Na taua foi e Soli lona valaau atu i tagata na vevesi, soia le o mai i totonu o le Falesa e faatupu ai misa ma vevesi.

 

E to’alua isi molimau na valaau e le itu tete’e, o le susuga a Kaino Aaitai ma Laauli Mase, o i laua fo’i o sui o le Ekalesia, lea fo’i sa auai i le fonotaga i le afiafi lea. Na taua e i laua nei, e leai se taimi na la vaaia ai Soli o ia faaoolima i le Tama na aafia, e leai fo’i se taimi na la vaaia ai Soli o taumafai e faia ni gaioiga e save’u ai le nonofo filemu o le Ekalesia i lea aso.

 

Na taua e Aaitai i lana molimau e faapea, sa ia vaaia Soli o tamo’e atu i le pito i luma o le Falesa ma le faamoemoe e vaovao le vevesi na tula’i mai ai. Ae na taua e Mase i lana ia fo’i molimau e fa’apea, sa ia vaaia Soli o tu i luga o le nofoa ma valaau atu i tagata o le Ekalesia, soia le faatupu vevesi i fofonu o le Falesa.

 

Na taua e le molimau a le malo sa valaauina mo lenei mataupu, na te lei vaai i le faalavelave sa tula’i mai i totonu o le Falesa, ona o ia sa i fafo o le Falesa. Na te lei vaai fo’i pe na faaoolima Soli i lona to’alua.

 

I le mae’a ai ona fa’afofoga o le Fa’amasinoga i mau uma sa folasia e le malo, na tuuina mai ai loa le faaiuga a le Fa’amasinoga, e le faamaonia le tagi fa’asaga ia Soli. Saunoa Patea e fa’apea, e atagia mai i mau sa folasia e le malo, e le i atoatoa la latou tapenapenaga mo lenei mataupu.

 

Mai le to’a 7 o sui o le Ekalesia na taofia faapagota ona o lenei mataupu, e to’a 5 i latou lea ua mae’a ona faamaonia a latou moliaga, to’atasi lea ua solofua e le Fa’amasinoga ona moliaga, ma le to’atasi o lo o fa’atali le aso o lona fa’amasinoga iloilo.