Pago Pago - AMERIKA SAMOA

O le aso 28 o Aperila na maua ai e le ofisa a leoleo i Tafuna, ia se valaau mai i le ‘taxi stand’ a le Lagoon i Nu’uuli, mo se fesoasoani, ina ua sauaina e se tagata ia se alii talavou i tafatafa o le alatele.

E tusa ai ma fa’amaumauga a leoleo, o le tulua o po ma ao, o le aso 28 o Aperila, na o’o mai ai le valaau mo se fesoasoani i le ofisa a leoleo, mai i le ‘taxi stand’ i Nu’uuli ona o se alii na sauaina e lona tuaoi.

Ina ua taunu’u leoleo i le nofoaga na tupu ai le faalavelave, na feiloai ai ma le na a’afia ma sa ia faamatala i leoleo e faapea, a’o aga’i atu i lona aiga, sa faateia o ia ina ua kola atu o ia i tua e se tagata ma tatu’i ona foliga ma pa’u ai loa i lalo.  Ae na o’o lava i lona pa’u i lalo, e le’i taofia ai gaioiga a le na molia, i le tatu’iina o ia.  Ma na amata ai loa ona ia vala’au mo se fesoasoani, ona ua ia lagonaina, lona fia ola.

Sa ta’ua e le na a’afia, ina ua amata ona ia valaau mo se fesoasoani, o i’ina na sola ‘ese ai loa le ua molia ae ona tamo’e loa i le ‘taxi stand’ ma o latou vala’au ai loa i le ofisa a leoleo.

O manu’a a le ua a’afia, e aofia ai le afaina o lona mata tauagavale ma lona papatua. O le alii lea ua molia nei, o se tasi o tuaoi a le na a’afia, e suafa ia Tuifao Tuifelasa’i.

Sa faapea loa ona valaau e leoleo ia le vaega a le EMS mo le togafitia o le na a’afia ma le aveina atu o ia i le falemai mo nisi suesuega. 

Ae ua agai atu nei leoleo e saili Tuifelasa’i ma o le vaveao lava lea, na toe maua ai e leoleo ia se telefoni mai i se tagata, na ia fa’aalia mai i leoleo le nofoaga o iai Tuifelasa’i.  Sa faapea loa ona aga’i atu iai leoleo ma lokaina mai ai loa o ia.

O le faamatalaga a le na a’afia i leoleo, i le mafuaaga na sauaina ai o ia e Tuifelasa’i, ona o lo’o ia nofo aitalafu ia Tuifelasa’i i le $30.

Ua molia nei Tuifelasa’i i le Faitauga e 1 o le Fa’ao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le falepuipu i le o’o atu i le tausaga e tasi, po o se sala tupe e $1,000; po o faasalaga uma e lua.

E $5,000 le vaegatupe faatulagaina na mafai ona tatalaina ai le ua molia mai i le falepuipui, e faatali ai lona faamasinoga.