Pago Pago - AMERIKA SAMOA

LOKA SE ALII MA MOLIA I LE GAOIA O SE TUPE MAI TOTONU O SE TAAVALE

O lo o ua tusia i faamaumauga a le ofisa a leoleo, le tulai mai o se faalavelave i le taeao o le aso muamua o Fepuari, 2024, lea sa molimauina ai e se leoleo sa agai mai i lana taavale, i Sisifo, ia le alu atu o se tuliga a ni alii se toalua, i Nu’uuli.

Sa toe liliu mai le taavale a le leoleo ma tuliloa mai le tuliga a nei alii e to’alua, ma maua mai e le leoleo ia le susuga Alapati Lopao’o, lea sa tuliloaina mai ia Gaupule Fulu, i tafatafa o le Laufou.  Ae o le taimi lea ua o’o atu ai le tamo’e a Fulu i totonu o le Laufou.

Na mauaina e le leoleo ia Fulu i tafatafa o le fale’aiga a le Carl’s Jr., ma ina ua su’esu’eina o ia e le leoleo, ae taunu’u atu iai ma Lopao’o ma fesiligia Fulu, po o fea le tupe sa i totonu o lana ta’avale.  Ae tu’i mai e Fulu ia Lopao’o ma tau i le fa’amalama a le fale’aiga ma nuti ai le tioata.

O i’ina na faatonuina ai e leoleo ia Lopao’o ina ia toe fo’i i le faleoloa (Lucky 7) lea na tupu ai le faalavelave, o le la ua agai atu iai seisi leoleo e la te talanoa.

Ae ua aveina e le leoleo ia Fulu i totonu o le taavale leoleo ma agai atu loa i le Lucky 7 mo le suesueina auiliili o lenei mataupu.

Sa faamatalaina e Lopao’o, i lona fo’i atu mai i le masini ATM, sa afe i le Lucky 7 e totogi sana ‘debit meter’.  Ma sa tago tu’u se tinoitupe e $120 i autafa o lona nofoa, ae alu i totonu o le faleoloa e aumai sana ‘debit meter’ e $40.  Sa ta’ua foi e Lopao’o, sa i lalo uma faamalama o lana taavale ma e le i lokaina foi lana taavale.

Sa faamatala foi e Lopao’o, na le fetaui ma Fulu i le faitoto’a o le faleoloa, ma sa faatalofa atu le alii ia te ia, a’o ia savali i totonu o le faleoloa.  Ae pe a ma se lima minute, ina ua toe fo’i mai Lopao’o i lana taavale, ae fai atu ni alii sa faatali pasi i tafatafa o le faleoloa, na vaai ia Fulu o su’e totonu o lana taavale ma ave se tupe na i totonu o le taavale.

Na alu atu loa Lopao’o siaki lana taavale ma iloa ai ua leai le $120.  Na fesiligia e Lopao’o ia le alii lea sa faatali pasi i tafatafa o le faleoloa e faasino atu le tagata lea na alu i totonu o lana taavale, ae fa’asino ifo iai ia Fulu.

E tusa ai ma faamaumauga a leoleo, na fesiligia e Lopao’o ia Fulu e uiga i lana tupe, ae sa tete’e Fulu e na te le’i aveina se tupe, ma tamo’e ese atu ai Fulu.  O iina lea na amata ai loa le tuliga a le to’alua lea.

Sa faapea loa ona agai atu leoleo i totonu o le faleoloa a le Lucky 7 ma fesiligia le pule o le faleoloa, mo ata vitio a latou masini pu’e ata.  Ma sa vaaia ai i ata vitio a le faleoloa ia le alu o Fulu i totonu o le taavale a Lopao’o ma aumai ai se tupe.  Ona savali lea o Fulu i leisi itu o le faleoloa ma faitau le tupe sa ia aumaia mai i totonu o le taavale.

Ua molia nei ia Gaupule Fulu i moliaga e tolu;

1. Faatupu Vevesi i Nofoaga Faitele – o se vaega ‘B’ o solitulafono mama, lea e mafai ona faafalepuipui ai se tasi i le ono (6) masina, po o se sala tupe e $500; po o faasalaga uma e lua.
2. Gaoi – O se vaega ‘A’ o solitulafono mama, e mafai ona faafalepuipui ai se tasi i le o’o atu i le tasi (1) tausaga, po o se sala tupe e $1,000; po o fa’asalaga uma e lua.
3. Faaleaga o Meatotino i lona tulaga e tolu – o se vaega ‘A’ i solitulafono mama, e mafai ona faasala ai se tasi i le falepuipui, i le o’o atu i le tasi (1) tausaga, o se sala tupe e $1,000; po o faasalaga uma e lua.

E $1,000 le tinoitupe faatulagaina e mafai ona tatalaina ai le ua molia mai i le falepuipui, e faatali ai lona faamasinoga.

FA’AFEFE E SE TAMALOA 47 TAUSAGA IA LONA TUAFAFINE MA LANA FANAU TEINE

O le taeao o le aso muamua o Fepuari, 2024 na telefoni ai se tina mai Leone, e iai sana fanau teine e to’atolu, i le ofisa a leoleo i Tafuna, i lona taufa’amata’u ia i latou.

(O le a le lomia suafa o i latou o lo o a’afia i lenei mataupu, aua le puipuiga o fanau iti).

E tusa ai ma faamaumauga a leoleo, na agai atu leoleo i le fale o lenei tina ma sa ia faamatalaina i leoleo, o le ta o le 5 o lea taeao, a’o sauni si ana fanau teine (18, 16 ma le 5 tausaga) mo aoga, sa tatalaina mai ai e le ua molia ia le faamalama ma faatonu lana fanau e nonofo i luga.  Sa ta’ua e le tina le toe tapunia vave e lana tama teine, 18 tausaga, ia le faamalama ona o la e sulu a latou solo ta’ele.

Na fa’aauau le faamatalaga a le tina, pe a ma se itula mulimuli ane, a’o iai i totonu o le potu e siaki pe ua sauni lana fanau teine mo a’oga, sa ia faalogoina le ua molia, i fafo, o lo o valaau mai igoa o lana fanau ma amata ona sasa le faamalama ma palauvale.

Sa faamatala foi e le tina, e le o se taimi muamua lea ua faia e le ua molia lenei tulaga, o le faapisa o le latou fale.  O le ua molia, e nofo na’o i lona fale e tuaoi ma le fale a le tina ma lana fanau teine, ae sa ta’ua e le tina, o so’o se taimi lava e ita ai lenei alii, e sau lava ma palauvale mai i lana fanau teine, ma talepe meatotino i autafa o le fale.

Ua molia nei lenei alii i moliaga e lua;

1. Faatupu Vevesi i totonu o Aiga – O se vaega ‘C’ i solitulafono mama, e mafai ona loka ai se tasi i aso e sefululima (15) po o se sala tupe, e i le va o le $150 ma le $300; po o fa’asalaga uma e lua.
2. Faaleaga o Meatotino i lona tulaga e lua – O se vaega ‘A’ o solitulafono mama, e mafai ona loka ai se tasi i le tasi (1) tausaga, po o se sala tupe i le va o le $150 ma le $1,000; po o faasalaga uma e lua.

E $1,000 le tinoitupe faatulagaina e mafai ona tatalaina ai le ua molia, e faatali ai lona faamasinoga.