VAEGA 72

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 72.

*******************************************************************

Na tau matapogia fafine o Eseta ina ua faapea mai le tamaloa o Tanielu ia po o Alesana foi, aua o lona igoa sa’o lea, o ia ua mana’o e toe liliu lona igoa ia Alesana Penaia.

“O e iloa afai e te faia le tulaga lena, o le a faafalepuipui ai oe?” o le fesili atu lea a Eseta i lona toalua.

“Ioe, ua ou iloa ma ua ou saunia foi e tali so’o se fa’asalaga e tu’u mai ia te a’u.  Ae ua ou lelava ola i le igoa o seisi tamaloa, e tusa lava pe afai o sa’u uo mafana,” o le tali mai lea a le tamalota o Tanielu/Alesana.

“Afai la ua e le popole ia oe, ae faafefea matou? E faafefea lau fanau? Ua e saunia e te alu e tausi  mai matou mai totonu o le falepuipui?  Ae o le mataga o le a o’o mai i luga o lau fanau ona o lenei mea?” o le toe oso atu lea a le fafine o Eseta.

“Ae o le a le mea e te mana’o e fai?  Ola pepelo ai pea faapea?” o le tali ita mai lea a le tamaloa o Tanielu/Alesana.  “O le la ua iloa e Taki le mea moni, out e iloa e toeitiiti iloa e le toatele.  Ona sili atu lea o le maasiasi o le a o’o mai i le tatou aiga.”

“E sa’o le tala a Dad,” o le faapea mai lea a le teine matua o Ruta.  “E mafai ona ou fesoasoani ina ia le alu Dad i le falepuipui.  Ae e tatau ona fai e Dad le mea sa’o, o le toe faafo’i o lona igoa i lona igoa sa’o.”

Ua fa’asaga atu nei le teine o Ruta i lona tina ma faapea atu iai, “Aua e te popole Mom, o lena e te iloa ua maualuga lo’u tulaga i totonu o le ofisa loia lea out e galue ai.  E mafai ona ou fesoasoani ia Dad.”

Ua tu sasa’e ifo nei i luga ia le fafine o Eseta ma faapea atu ma lona ita tele, “Ia ua lelei, o e fai le mea na e mana’o ai le tou tama.  A tou mataga atu ai lava, ia tou mataga ai pea.”

Ua savali ese le fafine o Eseta mai i le laulau ‘ai ma toe fo’i atu i totonu o lona potu.

Ae ua pupula atu le tamaloa o Tanielu ma ona fofoga alofa i si ana fanau.

“Ou te fa’ato’ese atu ia te outou, si a’u fanau, ona o lenei mea sa ou faia,” o le tala lea a Tanielu/Alesana i lana fanau.  “Ae sa ou manatu alofa ia te outou ma le tou tina, ina ia faasaoina mai outou i lena vaitaimi, i se olaga mafatia ma le pagatia, na mafua ai ona ou ioe i si a’u uo, e sui lo’u igoa.”

[E FAIA PEA]