VAEGA 70

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 70.

********************************

Ua fiu lava le fafine o Elena e tau faapelepele lana tama, le alii fomai o Taki, ina ia aua ne’i faia se tulaga i le tamaloa o Alesana, ia po o Tanielu e pei ona valaau ai i lenei vaitaimi, ae peitai sa le maluelue le loto ita o Taki.

“O lea ua uma ona ou logoina tatou loia e amata loa ona fa’agasolo pepa e su ai le tamaloa lea o Alesana ma lona to’alua, ona o le pepelo mai ia ta’ua, toe fa’aaogaina pepelo o le igoa ma faamaumauga a lo’u tama.” O le faamatalaga mulimuli lea a Taki.

Ua savali ese atu Taki, a’o tauvalaau atu pea lona tina i lona igoa.

Ae ua le toe liliu mai le alii fomai i le valaau atu a lona tina.

Ua tu le fafine o Elena ma va’ai atu i le oso a lana tama i lana taavale ma fa’a’i’i ese atu o pa’u o lana taavale

Ua toe saofa’i ifo le fafine o Elena, ma memumemu ona laugata i sana tatalo leleoa, ona o lona popole tele i le alu ese a si ana tama ma lona loto ita tele.

Ia se’i o tatou tu’u ai i’i o le alii fomai ma si ona tina, ae se’i o tatou toe liliu atu i le tamaloa o Alesana/Tanielu ma lona aiga.

Ua o’o i le taeao na soso’o ai, ua usu mai le tamaitai o Naomi i le fale’aiga a ona matua ma sa fa’ate’ia o ia i lona vaaia o lona tama, o lo’o pisi lava i tapenaga o taumafa mo le taeao.  Ma ona foliga, e pei lava e leai se mea na tupu, i le laumata ataata ma lona talatalanoa fiafia atu i tagata fa’atau.

Ua savali atu le teine o Naomi ma faapea atu i lona tama, “Dad, o okay oe?”

[E FAIA PEA]