VAEGA 69

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?

*************************************************

Na gata mai le tatou Fagogo i le vaiaso ua mavae, ina ua alu le alii fomai o Taki e faamatala i lona tina, mea uma ia ua tutupu e uiga i le fa’aaogaina e le tamaloa o Tanielu (po o Alesana Penaia, lona igoa moni) o le igoa o lona tama ma fa’amaumauga uma o le soifuaga o lona tama.

Atoa ai ma le fa’atonuga a lona tama sa fai ia Tanielu/Alesana, ina ua na iloa, e le toe o’o i se lelei ona manu’a ma lona tigaina, ona o le afi le ana mu ai i Egelani.  Sa mana’o le tama a le alii fomai o Taki, e tago le tamaloa o Alesana, e sui lona igoa ia Tanielu ina ia mafai ona fa’asaoina mai ai lona olaga mai i le falepuipui, lea o lo’o fa’atalitali atu mo ia, pe a toe fo’i mai i lo latou atunu’u.

Ae o le mea na sili ona fa’ate’ia ai le alii fomai o Taki, ona, ina ua mae’a ona ia fa’amatalaina uma nei mea i lona tina, sa le’i ita lona tina pe mana’o e tali ma sui ia Alesana (ia po o Tanielu lea ua igoa ai nei).

Sa matua’i fa’ate’ia le alii fomai, ina ua faapea atu lona tina ia te ia, “Si a’u tama pele, fa’amalie lou loto.  Tu’u loa lou ita.  Ma taumafai e faamagalo atu ia Alesana, ia po o Tanielu foi.  Aua o Alesana, o lou tama lava lena,”

Ina ua uma atu upu nei a lona tina, ua tu i luga ia Taki ma pupula mai i lona tina ma le ita tele.  “O le a le uiga o lena tala, e faamagalo?  O e malamalama ua alu lo’u olaga atoa, o o’u tu’ufesili po o fea lo’u tama ona sa e le mana’o e faamatala mai le mea na tupu ia te ia?   Ma ina ua ou maua faamatalaga o lo’o soifua lo’u tama – ona o lea sa ou faapea, o lo’o soifua lava lo’u tama – sa sili atu ma le lagi, lo’u fiafia.”

“Ae peitai, ina ua o’u tau atu iai ia Alesana (po o le tamaloa o Tanielu) ia lo’u iloa o ia o lo’u tama, ae fai mai e leai e le o ia o lo’u tama.  Lo’u faanoanoa ma lo’u maasiasi na iai?” o le ‘ava’avau mai lea o Taki i lona tina.  Ae ua na o le nofo o Elena ma pupula to’a atu i si ana tama.

“Ma le ita o lo’u loto ina ua ou iloa le mea moni, ua maliu lo’u tama, ae o lea e fa’aaoga e lenei tamaloa lona igoa ma lona tala’aga?” o a Taki lea.

“E leai, e le tatau ona faamagalo, e tatau ona fa’asala i tulaga o le tulafono.  Ailoga lava na tupu lea mea i le falemai i Egelani.  Lea e pelogia ai tatou, fai mai o le mana’oga a lo’u tama.  Ia o ai na iai?” ua alu lava le fasa a le alii fomai.

“O lea ua uma ona ou logoina tatou loia e amata loa ona fa’agasolo pepa e su ai le tamaloa lea o Alesana ma lona to’alua, ona o le pepelo mai ia ta’ua, toe fa’aaogaina pepelo o le igoa ma faamaumauga a lo’u tama.” O le faamatalaga mulimuli lea a Taki.

[E FAIA PEA]