O OE O LO’U TAMA?
VAEGA 63
E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa. E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.
Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LO’U TAMA?
*************************************************
Na gata mai le tatou Fagogo i le vaiaso ua mavae, ina ua mae’a le talanoaga a le ulugalii o Tanielu ma Eseta ma le la fanau ma ua nofo malamalama nei ia le fanau a le ulugalii, i le tala’aga o le olaga a lo latou tama ma le mafua’aga na masalosalo ai le alii fomai o Taki, o lona tama ia Tanielu.
Ua malamalama ai nei foi e le fanau a Eseta, e le o Tanielu le igoa moni o le latou tama, ae o Alesana Penaia. O Tanielu, o le igoa lena o le tama a le alii fomai o Taki. Ae ua mafua ona fa’aaoga e Alesana Penaia ia le igoa o Tanielu, ona o le mana’o o Tanielu (le tama a le alii fomai o Taki), ina ua na iloa, o le a maliu. Lea na ia fosi ai Alesana Penaia, e na te fa’aaoga lona igoa ma ana fa’amaumauga, ona ua ia iloa lelei, o lo o le mafai ona maua se galuega lelei a Alesana Penaia, e tausi ai lana fanau ma lona aiga, ona o le mea sa tupu a’o la talavou, lea sa fa’asaoina ai e Alesana o ia (le tama a Taki).
Ae paga lea, e taunu’u atu le alii fomai, ua o’o le talanoaga a le aiga i le vaega lea ua faia ai e Tanielu/Alesana ia le mea sa mana’o ai le tama a le alii fomai ma suia ai lona igoa, i le igoa a le alii fomai o Taki.
Ma sa matua’i pogisa atoa ai le lalolagi a le alii fomai ina ua ia fa’alogo i le faamatalaga a Tanielu/Alesana e uiga i le maliu o lona tama i Egelani, ae ua fa’aaoga e Alesana Penaia ia le igoa o lona tama.
Na alu ese ia Taki mai i le fale o le aiga a Tanielu/Alesana ma Eseta i lena afiafi, ma lana faamatalaga mulimuli ia Tanielu/Alesana, “Saunia e te toe fo’i i le falepuipui”.
Ua ta’ape le aiga i lena po, ua alu le tagata i lona lava potu, e mafaufau toto’a i le uiga o lenei mea ua tupu i lenei afiafi.
Se’i vagana ai le tamaitai o Naomi, le ui’i a Tanielu/Alesana ma Eseta. Ua oso i le ta’avale ma tuli tatao atu ia le alii fomai, i lona ofisa i le falemai.
Atonu ai ona o le va’ai alofa a le alii fomai o Taki, i foliga o le tamaitai o Naomi, sa ia tu’uina atu ai le avanoa ia Naomi e fai mai sana tala.
Ma sa muamua lava ona faapea atu Naomi, “Ou te iloa, e leai sa’u upu e mafai ona fai atu i le taimi nei, e ono ave’esea ai le loto ita ma le fia taui ma sui lena ua e lagonaina i le taimi nei. Ma ou te le’i sau foi e fai atu e te taumafai e faamagalo o’u matua. Ona a ou tilotilo atu i lenei mea ua tupu i lau itu, ou te fa’asa’oa lou ita”.
Sa tilotilo atu Naomi, e leai lava se minoi o Taki ma e le o suia lava ona foliga le fiafia.
Na vave ona toe faapea atu Naomi, “Ae pau o lea, ua na’o sina a’u talosaga vaivai. Ae e te le’i lipotia lenei mataupu i le ofisa a le malo, pe mafai ona e fa’alogo i le mafua’aga na tupu ai lenei tulaga.”
[E FAIA PEA]