VAEGA 4

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i a tatou tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 4.

**********************************

O le alii lenei o Taki Sanerivi, na ola mai o ia i se vaega o le nu’u e mau’oa ona tagata.  E na o ia ma lona tina le la aiga.  Ae sa le i avea lea ma tulaga na mafatia ai lenei alii.  Ona e talu mai lava i lona pepe meamea se’ia o’o lava ina matua o ia, sa alofagia lava Taki e le gata o lona tina, e faapea foi tagata o lona aiga, tuaoi ma ana uo.  O se alii e talenia tele.  O se alii e fiafia lava lona loto i taimi uma.  O se tagata e le iloa ita.

Sa auai atu Taki i aoga mo fanau a tagata mau’oa talu mai lava lona itiiti.  Ae na iloga lava le atamai o lenei tamaititi, seia o’o lava ina ulufale atu i aoga faafoma’i i lona matua.  Na tele ni falemai tetele na mana’o mai i lenei alii, ina ua salalau tala o lona atamai faafomai ma lona loto alofa i so’o se tagata e sulufa’i atu i falemai sa a’oga ai.

Ae ina ua o’o ina filifili e Taki le falemai e galue ai, sa faate’ia le toatele o tagata ina ua ia filifilia se tasi o falemai laititi, i le nu’u lea o lo o iai le aiga o Tanielu ma Eseta.  Sa o’o lava i le tina o Taki, ua fiu e fesiligia Taki i le mafuaaga ua ia filifilia ai lea falemai laititi, ae la e tele falemai tetele ma sili atu ona lelei ma e tele ai foi sana tupe e maua ai, ae peitai, na tasi lava le tali a Taki, o le falemai lea o lo o sili atu ona manaomia lona tomai ma lana tautua.

Ia ua leai lava se mea e mafai e le tina o Taki, le fafine o Elena, ua mautu le loto o Taki i le falemai lea o le a alu e galue ai.  Ma ua tapena nei le alii o Taki e lele atu i lona nu’u fou ma le falemai fou o le a galue ai.  Ua taunuu nei Taki i le faletalimalo e faamautu iai ae tau saili se fale mautu e nofo ai.  O le taeao na soso’o ai na usu ai loa Taki i le falemai o le a galue ai. 

I lea taeao na salalau ai tala i totonu o le falemai, ona e le gata i le fomai fou ae o le a amata ai foi ma le taitai fou o le vaega a le au tausima’i.  Na usu sa’o atu lava le alii o Taki i le ofisa o le pulesili o le falemai, e faamautu ai ona tiute.   Na fa’afeiloai fiafia mai le alii pulesili ia Taki ma ia fa’afetaia le alii fomai fou ona o lona filifilia o le latou falemai e galue ai.

Na liliu le talanoaga a le pulesili ma Taki i se fale e nofo mau ai Taki.  Na fa’ailoa atu iai e Taki, e tu’u atu lea mataupu ia te ia, e faitalia ia ma alu e saili se fale e mafai ona faamautu ai.

O le taeao lava lea na amata ai Taki, o le taeao foi lea na amata ai le supavaisa fou a le au tausimai, o le tamaitai o Salome.  Manatua foi le tamaitai lea o Salome sa fai ma faasalaga i si teine o Naomi a o latou a’o’oga faatasi i aoga maualuga a le latou nu’u, ae o lea o le a supavaisa i le au tausimai i le falemai lava lea e tasi o lo o galue ai Naomi.

E FAIA PEA!