VAEGA 148

E toe fa'atalofa atu i a tatou pa'aga i so'o se tulimanu o le kelope o lo'o maua mai ai lenei auaunaga, aemaise i nai o tatou tama ma tina matutua i Amerika Samoa.  E fa'atalofa atu i le faaopoopoga fou o le tatou Fagogo i lenei tausaga fou 2025.  E tatou te tau fai si'i faatasi le viiga ma le mua i lo tatou Tapa'au Sili i le Lagi, ona o Lana pule faasoifua ma Lana tausiga alofa ia i tatou taitoatasi, ua mafai ai ona o tatou toe fesilafa'i ma le manuia i lenei taeao fou, i lenei tausaga fou, i luga o lenei nusipepa.

Ia ae se'ese'e mai loa i ou se'etaga malu, ae o le a taumafai atu le soso'oga o le tatou Fagogo - O OE O LO'U TAMA?

***************************************************

Na gata mai le tatou Fagogo i le vaiaso ua mavae ina ua le manuia taumafaiga a le tamaloa o Alesana ma lana loia, po o lona afafine, o Ruta, ina ia saili ia le tamaloa o Semi Tagaloa, ina ia fesoasoani i le fa’amasinoga a Alesana, lea e taumafai e apili lona fa’asalaga mai i le faalavelave lea na tupu a’o talavou o ia.

Sa maua e Alesana ia Semi, ae peitai, na iloa e Alesana mai i le la talanoaga ma Semi, e leai se aoga, ona sa totogi tupe e le ulugalii mau’oa lea e ana le atalii lea na maliu i le faalavelave na molia ai Alesana, ia Semi ina ia molimau pepelo, o se gaioiga sa fuafuaina e Alesana ma Tanielu (le tua’a a le alii foma’i o Taki lea na maliu i Egelani), le fasiotia o le tamaititi mau’oa.

Ae manatua foi, na mafua ona tupu le faalavelave lea, ona o le alii talaovu mau’oa lenei, i le leaga o lona loto i le mafana o le faigauo a Alesana ma Tanielu, a’o talavou i latou.  Ma le ta’uta’ua o Tanielu i totonu o le a’oga, ae o le atamai o Alesana i totonu o le latou vasega.  Lea sa tau saili ai lava e le tamaititi mau’oa lenei se avanoa e fai ai se mea leaga ia Alesana ma Tanielu.

O le mea lea na ia tata’i atu ai e le alii mau’oa lenei ia ana uo uma (na aofia ai ma le alii o Semi) ma o latou lamaina ia Alesana ma Tanielu, e fasi, ina ua tu’ua le a’oga i se tasi aso.  Ae i le vevela o fusuaga, na ‘a’apa ai ia Tanielu (le tua’a a le alii fomai o Taki) ma u’u mai se ma’a ma sasau atu ai lana togi ma tau ai i le ulu o le tamaititi mau’oa.

Ma ina ua va’aia e ana uo ua lavea, sa fefefe ma sosola ese ae ua toe ai na’o Tanielu ma Alesana.  Ma sa faatonuina ai loa e Alesana ia Tanielu e alu ae tu’u atu ia te ia e na te saili mai se fesoasoani mo le alii lea ua lavea.  Ma na faatonuina foi e Alesana ia Tanielu, ia aua lava nei ona ta’u i seisi, o ia (Tanielu) sa na togiina le ma’a.

E ui ina e le’i auai Tanielu i le fuafuaga a Alesana, ae ona o lona talavou ma lona fefe fo’i i le mea ua tupu i le tamaititi mau’oa, na ia usitaia ai loa le faatonuga a Alesana ma ia alu ese atu foi ma ia, ae ua tu’u ai na’o Tanielu ma le tamaititi mau’oa lea ua lavea.

Na mafai ona saili mai e Tanielu ia se fesoasoani e mafai ai ona ave atu le tamaititi i le falema’i, ae paga lea, ona o le tuga o lona manu’a ona sa tau lelei lava i lona ulu le ma’a na lia’i e Tanielu, na i’u ai lava ina maliu le tamaititi mau’oa.

Ma ave ai loa Alesana e leoleo e su’esu’e le mafuaaga o le faalavelave, ae peitai, o se taimi mulimuli ane, na o’o atu ai le ulugalii mau’oa lea e ana le tamaititi ua maliu, ma avatu ia Semi i le ofisa a leoleo, ma faasino ai le lima a Semi ia Alesana, ma ia fai atu i leoleo, o ia lea na maliu ai le tama a le ulugalii mau’oa.

Ua fiu Alesana e finau e le o ia sa togiina le ma’a.  Ma e le o ia foi na mafua ai le fusuaga.  Ae ua malosi le paoa o le tupe ma i’u ai lava ina fa’asala Alesana i le falepuipui.

[E FAIA PEA]