Ads by Google Ads by Google

Maua fualaau faasaina ina ua osofa’i e Leoleo le toese i Tafuna


[ata: foa'i]
ausage@samoanews.com

O se osofaiga faafuase’i a le Vaega e Suesueina Fualaau Faasaina mai le Matagaluega o Leoleo, fa’asaga i le nofoaga o le Toese i Tafuna i le amataga o le vaiaso nei, na taua ai i ni ripoti le maua ai o fualaau faasaina, atoa ai ma se paipa tioata, lea e fa’aaoga e ula ai le aisa.

 

Na taua e se molimau fa’atuatuaina i le Samoa News e faapea, o le osofaiga a Leoleo sa fa’atautaia i le toese, o se tasi lea o gaioiga mo le latou suesuega fa’aauau i le mataupu lea na tula’i mai i le amataga o le masina nei, ina ua taumafai se tagata e fa’aulufale fa’asolitulafono i totonu o le toese se afifi sa i ai se vaega tele o le pauta o le aisa.

 

Pe tusa o le itula e 6:00 i le taeao sesegi o le aso Gafua na te’a nei, ae ulufale loa se vaega tele o Leoleo ma amata loa le osofaiga. O ni isi o Leoleo sa fa’aaupegaina ae o isi e lei fa’aa’upegaina.

 

O nofoaga sa sailia e aofia ai le nofoaga o loo taofia ai le to’atele o pagota o loo fa’atalitali faaiuga o a latou mataupu, sosoo atu ai ma le nofoaga tuai o le Max unit lea o loo taofia ai le tele o pagota, ma faai’u atu ai loa i le falepuipui o tama’ita’i.

 

Na taua e le molimau i le Samoa News e faapea, o se tasi o nofoaga sa autu lava i ai le sailiga a Leoleo, o le potu o loo loka ai le ali’i lea o loo masalomia na faamoemoe na te tauaaoina le afifi lea sa maua ai aisa i le amataga o le masina nei.

 

Ina ua sailia e Leoleo le sela o loo loka ai le ali’i lea, na maua ai loa le paipa tioata e fa’aaoga e ula ai aisa, faapea ai ma se vaega laiti o le pauta o le aisa. O vaega o fulaau fa’asaina sa maua e leoleo sa faia i ai se suega, ma faamaonia ai, o vaega ia o le pauta o le aisa. Ua tuuina atu nei vaega sa maua e Leoleo i le potu e teu ai mau faamaonia a le Matagaluega o Leoleo, e fai ma molimau i lenei mataupu.

 

Na taua e le molimau i le Samoa News e fa’apea, i le mae’a ai o le osofaiga a Leoleo, na auina atu ai loa le ali’i pagota lea mo suesuega atili fa’asaga ia te ia.

 

O le ali’i pagota e pei ona taua i ripoti sa maua i ai le paipa ma vaega laiti o fualaau fa’asaina i lona potu, e le gata e le i leva ona magalo mai i tua, i le mae’a ai lea ona tuli o sona fa’asalaga fa’a falepuipui, e mafua mai i le fa’alavelave lea na a’afia ai o ia i le osofaiga o se fale ma aveese meaafale, ae o lea fo’i na pu’e fa’apagota e Leoleo i le amataga o le masina o Iulai na te’a nei, ma tu’uaia i lona umia fa’asolitulafono o vaega o le pauta fa’asaina o le aisa.

 

E pei ona taua i faamaumauga a le fa’amasinoga, o le osofaiga a Leoleo e fa’ataunuu se poloaiga a le fa’amasinoga e saili ai se fale i Peseta sa masalomia le fa’aaoga o se nofoaga e tulei ai fualaau fa’asaina, ae maua atu ai ma le ali’i lea i totonu o le ta’avale a le tagata lea o loo taua lona igoa i totonu o le poloaiga a le fa’amasinoga.

 

Na saili e Leoleo le tino o le ali’i lea ma maua i ai se pepa iila o loo i ai vaega o le pauta fa’asaina o le aisa.

 

O le masina o Me o le tausaga nei na osofai ai fo’i e Leoleo le toese i Tafuna, ma maua i ai se paipa e ula ai le aisa. E leai ni fualaau fa’asaina sa maua ai i lea osofaiga.

 

O le fa’afitauli i le ulufale atu lea o fualaau fa’asaina i totonu o le toese, o se tasi lea o fa’afitauli o lo o fa’aauau pea alia’e mai talu mai le tele o tausaga.

 

Na taua e le afioga i le ali’i Fa’amasino Sili ia Michael Kruse i se tasi o aso na lau ai fa’asalaga o ni ali’i na ta’usala i le umia faasolitulafono o fualaau fa’asaina, sa i ai lona manatu o tagata mai fafo lea ua fai ma atina’e pito sili ona tele vave le tupu i le teritori i le taimi nei, ae foliga mai i lana vaavaai, o le fualaau fa’asaina lea ua sili atu lona televave.

 

O le masina o Me o le tausaga nei, na faia ai e le Ofisa Faanofovaavaaia se suega i ni alii pagota se to’a 3 o loo tuli a latou fa’asalaga, ma fa’amaonia ai i lea suega lo latou fa’aaogaina o le fualaau fa’asaina o le aisa.

 

Ua mae’a ona tuuina mai fa’asalaga a le fa’amasinoga faasaga ia i latou nei, e ala i le toe fa’aopoopo o a latou fa’asalaga e tuli i le toese.

 

O i latou ia e aofia ai Wayne Gasolo, John Tuupo ma Tolupo Hodges.