Finau le kapeteni a le Kite Runner sa iai faamaumauga o le faigamalaga i Samoa
Pago Pago - AMERIKA SAMOA
O le taeao o le aso Gafua na fa’aauau ai iloiloga a le Komiti Su’esu’e Filifilia a le Senate (SSIC) ma le kapeteni a le va’a o le Kite Runner, le susuga ia Faiai Loleni Faiai.
I le amataga o le iloiloga, ina ua mae’a ona fa’atautoina Faiai, sa faamanino ai e le Taitaifono a le SSIC, le afioga Senatoa Togiola T. A. Tulafono, o le mafua’aga ua toe talo ai le susuga i le kapeteni, ona o lo’o tete’e mai e le pule o le Kite Runner, le susuga ia Papalii Laulii Alofa faapea ma Tisha Peau (lea e galue ‘part time’ mo le Paramount), ia lana molimau, e faapea sa iai faamaumauga o le faigamalaga a le va’a.
Sa saunoa Togiola, e tusa ai ma molimau a Papalii ma Peau, e le’i iai ni faamaumauga a le Kite Runner, ae o lea na molimau le alii kapeteni, sa ia fa’amaumauina uma tulaga o la latou malaga i Samoa ma le toe fo’i mai, ma sa ia tu’uina le tusi o fa’amaumauga i luga o le va’a.
Ae peitai, sa fa’aauau pea ona finau Faiai, sa iai fa’amaumauga o faigamalaga a le va’a lea sa ia tu’uina i luga o le va’a ina ua ia alu ese. E le gata i lea, na molimau foi Faiai, le fesiligia o ia e Papali’i e uiga i le tusi o faamaumauga, lea na ia (Faiai) fa’ailoa atu ia Papali, o lo’o i luga o le va’a.
Na fesiligia foi e le kapeteni ia le tagata lea e tausia le va’a, ae na fa’ailoa atu e le tagata lea, e leai se tusi o faamaumauga i luga o le va’a. Sa faamanino e Faiai, e na’o le pau lava fa’amaumauga sa i totonu o le tusi lea, o fa’amaumauga e patino i le faigamalaga i Samoa.
Sa fesiligia e Togiola ia le alii kapeteni, pe sa iai le tusi i luga o le va’a, i le taimi na ia alu ai i luga o le va’a, pe o se tusi na ia alu atu ma ia i luga o le va’a.
Na tali Faiai, o le tusi sa ia alu atu ma ia, e fa’amaumau uma ai tulaga o le faigamalaga, i le alu ma le toe fo’i mai.
Sa ia ta’ua foi lona fa’amaumauina uma o pepa mai i ofisa eseese a le malo lea na pasia ma kiliaina le va’a mo le faigamalaga.
Na fautuaina e le alii kapeteni, ia le toe valaauina e le SSIC o i latou uma, e aofia ai ma Papalii ma Peau, ina ia mafai ona iloa ai e le komiti, po o ai o lo’o pepelo, ae o ai o lo’o tautala i le mea moni.
Sa lagolagoina e le Taitaifono o le Komiti ia lea fautuaga ma fa’alauiloa mai le toe fa’aauauina o lenei iloiloga, i seisi aso o i luma.
E ui ina sa le taliaina se tasi o le mamalu lautele i le iloiloga a le SSIC i le aso Gafua, ae peitai, sa mafai ona auai sui o vaega fa’asalalau.