Ads by Google Ads by Google

Fesiligia e Sunia le mafua’aga ua lua ai igoa o se ali’i mai Samoa

ausage@samoanews.com

Na tele fesili a le afioga i le ali’i Fa’amasino ia Fiti Sunia i le vaiaso na te’a nei, i lona fia malamalama lea i le mafua’aga ua ala ai ona 2 igoa eseese o se ali’i o loo fa’agasolo lana mataupu i luma o le fa’amasinoga.

 

O le ali’i o Pelesasa Faalemiga o loo molia i le faatupu vevesi i nofoaga faitele, talu mai se mataupu na tula’i mai i le masina o Setema o le tausaga na te’a nei. Ae ina ua toe tula’i o ia i luma o le fa’amasinoga i le vaiaso na te’a nei, na faailoa ai e le Ofisa o Femalagaaiga, o le igoa sa’o o le ali’i lea, o Ripine Faalemiga.

 

E le i mafai ona maua se tali i le fesili a le ali’i Fa’amasino, i le mafua’aga ua ala ai ona 2 igoa eseese o le ua molia.

 

E na o le fa’alua lava ona tula’i Faalemiga i luma o le fa’amasinoga talu ona amata lana mataupu i le tausaga na te’a nei, ae le toe vaaia loa o ia, o le mafua’aga lena na sainia ai loa e le fa’amasinoga le tusi saisai e saili mai ai o ia.

 

O ni isi o tuutuuga na tatala ai i tua e le fa’amasinoga ia Faalemiga i le tausaga na te’a nei, o le aua lea ne’i ona tuua le atunu’u, a  ia auai i soo se taimi e valaau ai lana mataupu. Talu mai le masina o Oketopa o le tausaga na te’a nei, e le i toe oo atu lava Faalemiga i le fa’amasinoga.

 

I faamaumauga a le Ofisa o Femalagaaiga o loo taua ai e fa’apea, na tuua e Faalemiga ia Amerika Samoa mo Samoa, e ui i le faatonuga mai le fa’amasinoga e faasa ai ona ia alu ese ma le atunu’u.

 

O le masina o Mati o le tausaga nei na ulufale mai ai Faalemiga i le pemita e 30 aso, atoa ai ma lona toe ulufale faalua mai i le amataga o le masina lenei o Aokuso i lalo o le igoa o Ripine Faalemiga. O lana sponsor o le tagata e suafa ia Joy Simi.

 

A o tau mafaufau le ali’i fa’amasino i se faaiuga e faia ia Faalemiga, na faalalolalo le loia a Faalemiga ia Ryan Anderson ma faapea atu i le fa’amasinoga, e foliga mai e le i malamalama lelei le ua molia i le faatonuga a le fa’amasinoga e aua ne’i ona tuua le atunu’u.

 

Saunoa Sunia e fa’apea, e leai se mea e ta’u o se tau le malamalama. Sa malamalama lelei lava le ua molia i le faatonuga sa tuuina atu, ae foliga mai e le manatu mamafa o ia i le poloaiga a le fa’amasinoga.

 

I le mae’a ai ona iloilo e le fa’amasinoga o faamaumauga na tuuina atu fa’asaga i lenei mataupu, na faatulaga ai loa e Sunia le tupe e $500 e totogi, ona fa’atoa mafai lea ona tatala Faalemiga i tua e fa’atali ai taualumaga o lana mataupu.

 

Afai e totogi le tupe ua faatulaga, ua fautuaina le ua molia ina ia aua ne’i ona toe tuua le atunuu i soo se taimi, se’i vagana ua tuuina atu se faatonuga a le fa’amasinoga. Ua poloaina fo’i o ia ina ia auai i soo se taimi e valaau ai lana mataupu.

 

O le aso 5 Setema lea ua fa’atulaga e toe valaau ai le mataupu a le ua molia, ma ua toe taofia nei o ia i le toese e fa’atali ai le taimi e tatala ai o ia i tua, pe afai ae totogi le tupe ua fa’atulaga e le fa’amasinoga.