Ua fa’ailoa mai, ua le toe mafai ona ulufale atu nisi e faamavae i nisi o latou pelega e malaga atu i Hawaii, pe fa’atali fo’i pasese o malaga mai a le Hawaiian Airlines. O le malaga a le Hawaiian Air i le aso Gafua na amata ai lea fo’i fa’asa.

“E pau lava le mea e faia e i latou e le malaga, ua na’o le tu o le ta’avale malaga ese atu le sui e malaga ma toe alu ese atu le ta’avale i le aiga,” o se saunoaga lea a le ali’i sui fa’atonu o le Uafu ma Malae Vaalele, Christopher King.

“O pasese, e na’o le alu lava o le tagata aveta’avale e piki mai le pasese i le itu e faatali a pasese ma toe alu ese mai le ta’avale ma le pasese na malaga mai ma ana ato.”

Ona o le ulua’i po o le aso Gafua ma fa’ata’ita’i ai lea suiga ma o le aiaiga fo’i ua fa’amalosia mai e le Kovana i lana poloa’iga fa’alaua’itele, o lea ua tima’ia ai le mamalu lautele ina ia matua utagia lenei talosaga i le fa’atinoga o le galuega ua tuuina mai e fa’atino fo’i e le latou matagaluega.

Ua fa’ailoa mai fo’i se isi fa’aalia fou a le Fa’atonusili o le Soifua Maloloina e tusa o pasese e malaga mai Hawaii, o i latou ia e le tau faia ni tui i Hawaii o mai ai. O tagata Amerika Samoa lava latou o toe taliu mai, ua le tau siakia ni tui puipuia o le misela i le malaga mai Hawaii.

E fa’apea fo’i le vasega o tagata Amerika Samoa sa si’ima’i atu i Niu SIla e ala i le polokalama a le Medicare/Medicaid, o lo’o ua mafai ona toe ulufale mai lava i latou aua e uia mai e i latou Samoa.

O lea vaega o le fa’alauiloaga ua fa’amaonia mai e le tama’ita’i fa’atonu o le Medicaid i Amerika Samoa, Sandra King. O lona uiga matua uma sa masi’i atu mo togafitiga e tusa o le 3 masina 2 masina talu ai, e le o taofia lava lo latou toe taliu mai.

O le fa’afesili fo’i ua o’o mai, ona ua le mautonu lava mafaufau o tagata matutua lea na soifua mai i tua atu o le 1957 pe faia ni o latou tui puipuia mai le Misela, ae maise fo’i pe afai e malaga i latou e asiasi i aiga i Samoa, ae fa’ailoa mai, e le ali’i Foma’i Dr. Saipale Fuimaono, “Ioe, ua fa’atulaga nei le tasi o le tui MMR o le tagata matua, so’o se matua lava, pe malaga fo’i i se mea pe leai.”

O le fa’aluafesasi ai fo’i o manatu o tagata, ona sa latou sailia mai le CDC le tulaga lea, i a latou fa’amaumauga o i ai, ae faailoa mai ai, “O i latou uma na e le afaina i le misela.”

“Peita’i, o le vaega sili lava ona ma’om ia ona faia tui, o le fanau pepe lea e na’o le ta’i ono masina le matutua ma fa’asolo a’e i luga. O isi uma lava o le a fa’atali seia ma’ea le faiga o tui mo le fanau lea ua lisia atu le matutua.

E ui ina va’aia le tau le toe i ai o nisi e o ane mo tui i le vaiaso ua te’a i Faga’alu ma Tafuna, ae ina ua toe tima’ia ua i ai le fanau ua maua i le misela i o tatou lava laufanua, na toe vaaia le toe tumutumu atu o talavai tui puipuia o le misela.

O lo’o matala pea faitoto’a o nei talavai mo mamalu lautele mai le 8:00 i le taeao se’ia o’o i le 6:00 i le afiafi.

I le taimi nei ua suia fo’i le faatautaiga o le tautua a le Matagaluega o le Alagamanuia mo le Lautele DHSS. Ua fa’ailoa mai fo’i ia i latou uma e malaga atu e aumaia latou pepa o le Polokalama a le Food Stamp ma le WIC, e ao fo’i ona toe ulufale atu i lea Ofisa o le Malo mo nei fa’amanuiaga, ae ua mae’a umia fo’i lou pepa tui.

Ma ua fa’asaina fo’i ona toe malaga atu matua ma avatu latou fanau i nofoaga uma o Amerika Samoa lea e masani ona tautuaina fanau i so’o se ala.

Ua tatau fo’i ona e silafia lelei, e aumai fo’i ma lou ID e iloa ai o oe e ona le pepa tui lea ua mae’a faia. O le siakiga o le pepa tui lava latou pe a e ulufale atu, e faia lea e le sui fa’apitoa mai le matagaluega o le Soifua Maloloina, lea o le a fa’atuina lana laulau i totonu o nei ofisa i Utulei lava.

O lenei fautuaga ua mana’omia ona usita’ia uma lava i nofoaga e 22 o lo’o tautuaina ai fanau i Utulei, Fagatogo ma Tafuna. Ua tatau lava ona tapena uma matua i le faiga o latou WIC ma Food Stamp.

Manatua e siaki tasi i latou uma i le Ofisa autu o le WIC ma le Food Stamp i Utulei fa’ato’a o ai i Ofisa uma o le DHSS i isi nofoaga.

Ua fa’ailoa mai i le aso Lua na te’a nei e le Fa’atonu o le Matagaluega o le soifua Maloloina, Motusa Tuileama Nua, “Ua tauau nei e toe talosaga i le Malo Tele mo se fesoasoani o ni foma’i ma tausima’i e fa’auia mai mo le galuega e faia tui puipuia MMR mo le mamalu lautele o le atunu’u o lo’o mana’omia ona tuia i latou. Ona o lea ua matauina e toe tui uma le fanauiti e 6masina le matutua se’ia o’o i le tasi le tausaga, o le vasega sili lea ona to’atele ma e mana’omia ai le isi 70 o fomai ma tausima’i mo lea fa’amoemoe, ia vave ona fa’amae’a le tuia o le lautele lea.”

Ua fa’atulaga le aufaigaluega a le malo e faia o latou tui i le aso Lua, e aofia ai ma i latou uma o lo’o ta’imua mai i le fa’amalosia o lenei fa’asa, ae fa’asolo lava tui o le fanau iti i aso ta’itasi uma o le vaiaso mai le itula e 8:00 seia o’o i le 6:00 i le afiafi.

O nofoaga lea ua fa’atulaga e aofia ai le Argosy Building i Ottoville, AP Lutali EOB, i Utulei e faia ai tui na.

Ua fa’atulaga fo’i se isi vaega o foma’i ma tausima’i mo le Kamupani I’a a le Star Kist ona ua talosaga mai fo’i latou e fia faia o latou tui a’o le’i manava galuega ma malolo mo le vaiaso o le Kerisimasi ma le Tausaga fou. E tapunia galuega  a le StarKist ia 20 Tesema, 2019 ae fa’ato’a toe tatala galuega i le aso 6 Ianuari, 2019.