Ads by Google Ads by Google

Falepuipui ali’i mai Fiti faia uiga mataga i se teineititi 16 tausaga

ausage@samoanews.com

O se ali’i mai Fiti lea na ta’usala e le Fa’amasinoga Maualuga i lona faia o uiga mataga fa’afeusuaiga i se teineititi e 16 tausaga le matua i le tausaga na te’a nei, ua faasala nei o ia i le Falepuipui i Tafuna mo le umi e 28 masina, o se tasi lea o tuutuuga o lana nofovaavaaia e 7 tausaga.

 

Peita’i ua manatu le Fa’amasinoga, o le a faamalumalu le tuliina uma e le susuga a Manoa Niukavu o le 28 masina, ae ua lava masina e 14 lea na taofia ai o ia i le toese e fai ma ana fa’asalaga i lenei mataupu, ae ua poloaina o ia ina ia tuua loa Amerika Samoa ae toe fo’i atu i lona atunu’u, e le mafai ona ia toe ulufale mai i totonu o le umi o lana nofovaavaaia.

 

O Niukavu, o tagatanu’u o Fiti na aumai e le Falema’i o le LBJ i Faga’alu e galue i le Faata (X-Ray Tech). Ma e i ai lona tomai faapitoa i le vaaia atoa ai ma le tausia o le masini Faata.

 

O le vaiaso nei na tula’i ai Niukavu i luma o le Fa’amasinoga mo le tuuina atu o lana fa’asalaga. Na taofia pea lava le ua molia i le Toese i Tafuna talu mai le taimi na loka ai o ia i le tausaga na te’a nei, ina ua le mafai ona ia totogi le tupe e $50,000 sa fa’atulaga e tatala ai o ia i tua.

 

Na ulua’i tu’uaia o ia i moliaga e 6. Ae i lalo o le maliliega na sainia e Niukavu ma le malo, lea fo’i na talia e le Fa’amasinoga i le masina o Iuni 2019, na malie ai le malo latou te toe faia se teuteuga i le tagi ina ia faailoa ai le moliaga o le faia o uiga mataga faafeusuaiga, o le vaega C lea o solitulafono mamafa, lea e mafai ona fa’asala ai se tasi i le toese mai le 5 e oo atu i le 15 tausaga.

 

I le tali ioe ai o Niukavu i le moliaga na ia ta’utino ai e fa’apea, i se taimi o le aso 6 o Tesema 2017, na ia faia ai uiga mataga i se teineititi e 16 tausaga le matua, e ala i lona faamalosia o ia la te feusua’i.

 

Ina ua maua le avanoa o Niukavu mai le Fa’amasinoga, sa ia faatoese ai loa e tusa ai o lana solitulafono, ma ia talosagaina ai se isi avanoa se tasi mo ia se’i toe mafuta atu ai i lona aiga.

 

Na faatoese le ua molia i le malo o Amerika Samoa, o le Pulega a le Falema’i o le LBJ, ae faapitoa lava i le tama’ita’i talavou na a’afia ma lona aiga, ina ia faamagalo sona sese.

 

Na taua e le ua molia e fa’apea, o masina e 14 na taofia ai o ia i le Falepuipui, ua ia a’oa’oina ai se lesona taua i lona olaga, e ala i aoaoga faa faufautua sa mafai ona fesoasoani atu ai Ekalesia ma Faalapotopotoga i le atunu’u, lea ua mafai ai ona toe suia lona mafaufau mai le olaga pogisa sa ola muamua ai.

 

Na taua e le ua molia lona salamo moni e tusa ai o lana solitulafono, ma ia augani ai i le Fa’amasinoga mo se avanoa se tasi, se’i toe fo’i atu ai i tua e fa’aauau lana tautua mo tagata lautele e pei ona ia fa’atinoina i le tele o tausaga o lona soifua.

 

Na maua le avanoa e faaleo ai e le to’alua a Niukavu lana molimau i luma o le Fa’amasinoga, e fa’atatau i le ituaiga tagata e i ai le ua molia. Na taua e le Tina e fa’apea, o Niukavu, o le Tama mo lana fanau e to’a 3, ma ua 24 tausaga o le la ulugali’i. O se Tama e alofa ma agamalu, e galue malosi fo’i mo le manuia o le aiga.

 

E ui i le matuia o lenei mea ua tula’i mai, ae fa’aauau pea ona latou lagolago ma lana fanau ia te ia, aua e i ai lona talitonuga, e mafai ona toe suia e le Atua lona olaga faaletonu, ma toe avea ai o ia o se tagata e fa’atuatuaina e tagata uma.

 

Na talosaga le loia a Niukavu ia Michael White i le Fa’amasinoga ina ia talia le fautuaga a le Ofisa Faanofovaavaaia, ma faasala le ua molia i se fa’asalaga faanofovaavaaia, e aofia ai ma le tuutuuga e toe fo’i atu ai i lona atunu’u.

 

Na taua e White e fa’apea, o Niukavu o se ali’i ua tele tausaga o tautua i le galuega o le faatautaia lea o le Faata mo tagata gasegase i Fiti, lea fo’i na malaga mai ma fa’aauau lea auaunaga i le falema’i o le LBJ.

 

Na lagolagoina e le loia a le malo ia Christy Dunn le talosaga a White.

 

A o le i tuuina mai le faaiuga a le Fa’amasinoga, na maua le avanoa e toe faatepa ai e le afioga i le Fa’amasino Sili ia Michael Kruse mau faamaonia e lagolago ai le tagi fa’asaga i le ali’i ua molia.

 

Saunoa Kruse e fa’apea, o le tama’ita’i talavou na a’afia i lenei mataupu, sa nofo i le aiga o le ua molia e pei lava o sona afafine. O le tama’ita’i fo’i lenei, o se tagatanu’u fo’i o Fiti. I le aso na tula’i mai ai le fa’alavelave, sa nofo ai le tama’ita’i lea i le fale ua le aoga, ona sa lagona lona ma’i. E le i faigaluega atu ai fo’i ma le ua molia, ae na nofo atu ai fo’i ma ia i le fale.

 

O le taimi la lea na tula’i mai ai loa ma le faalavelave, ina ua aga’i atu le ua molia ma amata ona faia uiga mataga i le tama’ita’i na a’afia, seia i’u lava i lona faamalosia o ia la te faiaiga.

 

E 7 tausaga na manatu le Fa’amasingoa e faasala ai Niukavu i le toese i Tafuna, peita’i ua faamalumalu lona tuliina o lea fa’asalaga, ae ua nofovaavaaia o ia mo le 7 tausaga i lalo o tuutuuga e ao ona ia usita’i i ai.

 

E tatau ona lesitala o ia i le lisi o tagata ua ta’usala i le faia o uiga mataga i tama’ita’i e talavou i lalo o le tulafono, e tatau fo’i ona faia se suega i lona tino mo le siama o le HIV, e pei ona faatonuina i lalo o le tulafono.

 

Ua faasa o ia ona toe taumafai e fa’afesoota’i le tama’ita’i na a’afia poo nisi o lona aiga, e le tatau fo’i ona ia toe solia se tulafono a le malo.

 

Ma ua tatau loa ona totogi lona pasese ma toe fo’i atu ai loa i lona atunu’u, e le mafai ona ia toe ulufale mai i Amerika Samoa mo le umi o lana nofovaavaaia.

 

Ua fautuaina foi le loia a le malo ina ia tuuina atu se kopi o le faaiuga a le Fa’amasinoga i le Pulesili o le Ofisa o Femalagaaiga a le malo, ina ia mautinoa e aofia le igoa o Niukavu i le lisi o tagata e le faataga ona toe ulufale mai i le atunu’u.