Ads by Google Ads by Google

Faatulaga e le faamasinoga le aso e lau ai lana faaiuga mo Pulumu Fifita


[ata: foa'i]
ausage@samoanews.com

O le aso 31 o Me lea ua fa’atulaga e le Fa’amasinoga Maualuga e tuuina atu ai lana faaiuga fa’asaga i le ali’i pagota lea ua faamaonia lona le usitaia o tuutuuga o lana nofovaavaaia e 5 tausaga.

 

O le vaiaso nei na tula’i ai le ali’i o Pulumu Fifita i luma o le fa’amasinoga mo lana iloiloga faapitoa, ma ia ta’utino ai, e faamaonia tuuaiga o lona le usitaia o tuutuuga o lana nofovaavaaia.

 

Na taua e Fifita e fa’apea, e ui o lea sa poloaina o ia e le fa’amasinoga e aua ne’i ona toe tagofia le ‘ava malosi pe na te toe soliina fo’i se tulafono a le malo talu mai le masina o Novema 2016 na lau ai lana fa’asalaga, o le tausaga na te’a nei na toe loka ai o ia e Leoleo ma molia e le malo i le moliaga o le faatupu vevesi i nofoaga faitele, e mafua mai ina ua ‘ona ma pisapisao solo.

 

O le ali’i loia ia Rob McNeill na tula’i mo Fifita ae o le tama’ita’i loia sili lagolago ia Laura Garvey na tula’i mo le malo.

 

Na taua e McNeill e fa’apea, ua silia i le 12 masina o taofia Fifita i le toese e faatalitali ai lana iloiloga lenei. Na faamatala e McNeill le mafua’aga na ala ai ona tuai ona tula’i Fifita mo lana iloiloga.

 

Na taua e McNeill e fa’apea, ia Novema 2016 na lau ai le fa’asalaga a Fifita ina ua ta’usala o ia i le moliaga o le talepe fale, ma faanofovaavaaia ai loa o ia mo le 5 tausaga.

 

O se tasi o tuutuuga o lana nofovaavaaia, o lona tuliina lea o masina e 20 i le toese, faasa ona ia toe tagofia le ‘ava malosi pe soli fo’i i se tulafono a le malo. E na o le 6 masina na tuli e Fifita i le toese ae tatala loa o ia i tua e le fa’amasinoga e saili sana galuega e totogi ai lana salatupe.

 

O Aperila 2017 na tatala ai i tua Fifita e saili sana galuega, peita’i e lei umi ona tatala o ia i tua ae toe loka o ia e Leoleo ona o tu’uaiga o le ‘ona ma le fa’atupu vevesi i nofoaga faitele, ma taofia ai o ia i le toese mo le silia i le 3 masina e fa’atali ai se fa’aiuga o lana mataupu.

 

O Tesema 2017 na faamaonia ai loa e le Fa’amasinoga Faaitumalo le moliaga mama o le fa’atupu vevesi i nofoaga faitele fa’asaga ia Fifita, ma faasala ai loa o ia e le fa’amasinoga mo le umi sa taofia ai o ia i le toese e fa’atali ai se faaiuga o lana mataupu.

 

O le aso lava lea na lau ai le fa’asalaga a Fifita i le Fa’amasinoga Faaitumalo i le masina o Tesema o le 2017 e pei ona taua e McNeill, o le aso lava fo’i lea na tuuina atu ai le poloaiga a le fa’amasinoga maualuga, ina ia oo atu Fifita mo lana iloiloga e tusa ai o lona le usitaia o poloaiga o lana faamasinoga.

 

Talu mai lea taimi atoa seia oo mai i le vaiaso na te’a nei, sa taofia ai pea Fifita i le toese e faatali ai le taimi e valaau ai lana iloiloga.

 

Na taua e McNeill e fa’apea, na faateia o ia ina ua asiasi atu i le toese, ae fa’ailoa ane loa e Fifita ia te ia le tulaga o lo o tula’i mai i lana mataupu, ma mafua ai loa ona toe tuuina lona igoa i luga o le kalena a le fa’amasinoga.

 

Na faailoa e McNeill i le fa’amasinoga, le taliaina lea e le ua molia o lona le usitaia o poloaiga o lana fa’amasinoga, e ala i lona ‘ona ma soli le tulafono a le malo.

 

Na talosaga McNeill i le fa’amasinoga ina ia faasala Fifita i se fa’asalaga faanofovaavaaia, ma ia fa’aaoga aso e 346 lea na taofia ai o ia i le toese e fa’atali ai se faaiuga o lana iloiloga lenei e fai ma ana fa’asalaga i lenei mataupu.

 

Na lagolagoina e le loia a le malo le talosaga a le itu tete’e. Sa talosagaina fo’i le fa’amasinoga ina ia fa’aauau pea le nofovaavaaia o Fifita.

 

Na faamanatu e le afioga i le alii Faamasino Sili ia Michael Kruse i loia e fa’apea, o le faaiuga mo le nofovaavaaia, o le faaiuga lena e fai e le faamasinoga. Sa ia faaalia atili fo’i e fa’apea, tusa lava pe ua 346 aso talu ona taofia Fifita i le falepuipui e faatali ai se faaiuga o lana mataupu, e tatau ona manatua e loia, e 5 tausaga o loo nofovaavaaia ai le ua molia, lona uiga, tusa lea e 1,825 aso.

 

O loo taofia pea Fifita i le toese e fa’atali ai le aso 31 o Me lea ua fa’atulaga e lau ai lana fa’asalaga.