E ui o lea ua sola ese ma le atunu’u le susuga a Faletoi Misiluti e aunoa ma se fa’atanaga a le Fa’amasinoga, na faatinoina lava e le Fa’amasinoga le lauina o lana fa’asalaga i le vaiaso nei, ma tuuina atu ai loa e le afioga i le ali’i Fa’amasino Sili lagolago ia Fiti Sunia le umi e 5 tausaga e taofia ai o ia i le Toese i Tafuna.

O le fa’asalaga a Misiluti, fa’atoa amata ona tuli i le taimi e maua ai o ia ma tuuina atu loa i totonu o le Toese i Tafuna.

O le 2 vaiaso talu ai na fa’atulaga e lau ai le fa’asalaga a Misiluti, peita’i ina ua le tali o ia i le taimi na valaau ai lona igoa, na finagalo ai loa le afioga i le ali’i Fa’amasino ia Sunia e toe tolopo mai i le vaiaso nei le lauina o le fa’asalaga.

Na tuuina e Sunia i loia a itu e lua se fesili la te sailiina se tali, pe mafai i lalo o le tulafono ona lau se fa’asalaga a se tagata ua ta’usala i se solitulafono, e ui e le o i ai lea tagata i totonu o le potu fa’amasino, ona ua sola ese o ia ma le atunu’u.

Ina ua valaau le mataupu a Misiluti i le vaiaso nei, na fesili ai loa Sunia i loia a itu e lua, pe i ai se isi e fia fautua atu i le Fa’amasinoga e uiga i le fesili sa tu’uina atu.

Na taua e le loia a le malo ia Christy Dunn e fa’apea, e manino le Vaega 43 o Tulafono o loo lima ta’ita’iina ai galuega Fa’a Fa’amasinoga, e i ai le malosi i le Fa’amasinoga na te tuuina mai ai le fa’asalaga i se tagata ua nofosala i se solitulafono, pe afai o lea tagata ua sola ese ma le atunu’u i lona lava loto fuatiaifo.

Na siitia e Dunn nisi o mataupu tau fa’amasinoga ua mavae e lagolagoina ai lana mau, e fa’atatau i ni tagata na ta’usala i solitulafono eseese na lau e le Fa’amasinoga a latou fa’asalaga, e ui e le i i ai i latou i totonu o le potu fa’amasino.

Na lagolagoina e le loia a Misiluti, susuga Rob McNeill le folasaga a le malo, ma ia taua ai le manino o le tulafono, i le mafai lea ona tuuina mai e le Faamasinoga o lana faaiuga mo se tasi ua nofosala tusa lava pe ua tuua faamalosi e lea tagata le atunu’u.

Na ulua’i tu’uaia e le malo ia Misiluti i le moliaga mamafa o le umia fa’asolitulafono o vaega o le laau fa’asaina o le mariuana, o se solitulafono mamafa.

Ae i lalo o le maliliega na sainia e le ua molia ma le malo, na malie ai loa le ua molia e tali ioe i le moliaga na toe teuteu e le malo.

I le tali ioe ai o Misiluti i le moliaga e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le aso 14 o Me 2018, sa ia umia fa’asolitulafono ai se sikaleti mariuana e aunoa ma se fa’atanaga faaletulafono.

Na talosaga McNeill i le Fa’amasinoga mo se fa’asalaga mama mo Misiluti, e ui e le o i ai o ia i totonu o le potu fa’amasinoga, ae i lona talitonuga, ua lagona e ia lona salamo e tusa ai o lana solitulafono sa faia.

Na taua atili e McNeill e fa’apea, talu mai le taimi na tatala ai i tua Misiluti e fa’atalitali ai taualumaga o lana mataupu, e leai se taimi na misi ai e ia sana iloiloga i le Fa’amasinoga. Na te le iloaina pe i ai se mafua’aga ua ala ai ona sola ese le ua molia mai le atunu’u i le mae’a ai lea ona tuuina mai o lana tali ioe e tusa ai o le solitulafono fa’asaga ia te ia.

Na lagolagoina e Dunn le talosaga a McNeill, ma ia talosagaina ai loa le Fa’amasinoga ina ia tuuina atu se fa’asalaga faanofovaavaaia mo Misiluti.

A o le i tuuina mai le faaiuga a le afioga i le ali’i Fa’amasino ia Sunia, na fa’aalu a le Fa’amasinoga sina taimi e talatalanoa ai e fa’atatau i lenei mataupu.

Saunoa Sunia e fa’apea, o Misiluti, o ia lea e toa 7 i ai ali’i na taofia faapagota e Leoleo ina ua latou osofaia se fale i luga o le mauga i Logotala i le taeao po o le aso 14 o Me o le tausaga nei. O lea fale e tu i le va o Vaitogi ma le afioaga o Iliili.

I lea osofaiga, sa maua ai e Leoleo fualaau fa’asaina i totonu o le fale, o se fana, o se tinoitupe tele, faapea ai ma le anoanoa’i o mea e masani ona umia ma fa’aaoga e i latou e fa’aaogaina fualaau fa’asaina.

I le mae’a ai ona fesiligia e Leoleo o i latou nei e to’a 7 e tusa ai o le osofaiga sa faia, na molia ai loa nao i laua e to’alua, ae toe tatala i tua le isi to’a 5 e aunoa ma le faila i ai o ni moliaga. O i laua e to’alua o loo molia i lenei mataupu e aofia ai Misiluti, ma le susuga a Alesana Tipi, poo SULU fo’i e pei ona iloa ai o ia e le to’atele.

O SULU e pei ona taua e le malo, o ia lea e ana le fale lea na osofa’i e Leoleo fa’a aupegaina ma maua i ai fualaau fa’asaina, i lalo o se poloaiga mai le Fa’amasinoga e sailia ai lea nofoaga.

Saunoa Sunia e fa’apea, o lo o manino i mau fa’amaonia o lenei mataupu, sa i ai Misiluti i totonu o le fale i le taimi na taunuu ai le osofaiga a Leoleo. Ae ina ua saili e Leoleo lona tino, sa maua i ai se sikaleti mariuana.

Ina ua fesiligia e Leoleo ia Misiluti e uiga i le sikaleti mariuana sa maua i lona tino, sa ia taua ai lona le iloaina poo ai na tuuina le sikaleti mariuana i totonu o lona ofu. Sa ia taua atili fo’i i Leoleo e fa’apea, na te le tagofia fualaau fa’asaina, e le aafia fo’i o ia i le tulei atoa ai ma le fa’atauina atu o fualaau fa’asaina i isi tagata. I lona talitonuga, e foliga mai ua sese le nofoaga ua i ai o ia i le taimi sese, lea ua mafua ai loa ona aafia o ia i le tulafono.

Na taua e Sunia le faanoanoa o le Fa’amasinoga, ina ua tuua faamalosi e Misiluti le atunu’u e aunoa ma se fa’atanaga mai le Faamasinoga, poo se poloaiga fo’i e mafai ai ona ia malaga ese atu.

O le faaiuga o le masina o Novema na te’a nei e pei ona taua e le Fa’amasinoga, na faamaonia atu ai e Loia a itu e lua i le Fa’amasinoga, le tuua lea o Misiluti o le atunu’u i lona lava loto fuatiaifo.

Ona o lea tulaga, na faia ai loa e Sunia le fa’aiuga e faaleaoga ai le vaega tupe e $5,000 lea sa tatala ai i tua ia Misiluti, ona o lea ua ia le usitaia tuutuuga sa tatala ai o ia i tua.

E 5 tausaga lea ua faasala ai e le Fa’amasinoga ia Misiluti e taofia ai i le toese i Tafuna. O lea fa’asalaga, faatoa amata ona tuli i le taimi e maua mai ai Misiluti.

Ua poloaina fo’i e le Fa’amasinoga le itu a le malo ina ia tapena le poloaiga e saini e le Fa’amasinoga e fa’amaonia ai le faaiuga e fa’aleaoga ai le tupe e $5,000 lea sa tatala ai i tua Misiluti.