Ads by Google Ads by Google

Amata aloaia le fa’amasinoga autu a Manu Lefatia


Manu Lefatia [ata AF]
ausage@samoanews.com

O le aso Lua ua te'a nei na amata aloaia ai le fa’amasinoga autu a le ali’i talavou lea o lo o tu’uaia i le fa’alavelave lea na tula’i mai i le vaveao o le aso 24 o Tesema 2017, ina ua fai se latou tuliga ta’avale ma Leoleo i se saoasaoa uiga ese e sili atu ma ala o le tulafonno.

 

O lo o tu’uaia e le malo ia le susuga a Manu Lefatia i moliaga e 3 e aofia ai moliaga mamafa e 2 o le faaoolima i le tulaga muamua ma le tete’e atu i Leoleo ao taumafai e pu’e fa’apagta o ia, faapea ai ma le moliaga mama o le faaoolima i le tulaga tolu.

 

O tama’ita’i e to’a 6 o sui o le vaega iloilo iuga na filifilia i le aso Gafua latou te iloiloina se faaiuga o lenei mataupu.

 

O le ali’i loia tua ia Marcellus Talaimalo Uiagalelei o lo o tula’i mo Lefatia, lea o lo o taofia pea i le toese i Tafuna i le taimi nei e aunoa ma se tupe na fa’atulaga e tatala ai o ia i tua, ae o tama’ita’i Loia Sili lagolago e to’alua ia Laura Garvey ma Christy Dunn o lo o fai ma sui o le malo, fa’atasi ai ma le ali’i Suesue Faapitoa ia John Seumanutafa o lo o lagolago i le itu a le malo.

 

ULUA’I FOLASAGA

 

Na taua Garvey i lana ulua’i folasaga e fa’apea, i le vaveao o le aso 24 o Tesema 2017 i le itula e 1:20, na tula’i mai ai se fa’alavelave mata’utia i luga o le alatele i Iliili ma fa’asolo mai ai i Tafuna, ina ua fai se tuliga ta’avale i le va o Leoleo ma se ta’avale lanu mumu.

 

O lo o tu’uaia e le malo le ali’i o Lefatia, o ia lea sa fa’afoeina le ta’avale mumu lea na fiu Leoleo e tuli.

 

Na taua e le malo e fa’apea, ao tiute Leoleo i luga o le alatele i lea vaveao, na fa’afuase’i ona vaaia se ta’avale lanu mumu o aga’i mai i le auala i Iliili e aga’i atu i le itu o lo o i ai le Malaeva’alele i Tafuna i se saoasaoa mata’utia e le fa’atagaina i le tulafono.

 

E 6 ta’avale Leoleo faatasi ai ma se vaega to’atele o Leoleo na auai i le tuliga ta’avale sa faia. Na amata le tuliga ta’avale mai le auala i Iliili, fa’asolo atu ai i le auala i Tafuna ma aga’i atu ai i le auala e aga’i i Fagaima.

 

Na toe fa’aauau le tuliga ta’avale i Fagaima ma fa’asolo atu ai i le auala i le Fatuoaiga, seia toe oo atu i luga o le auala tele i Iliili ma aga’i atu ai loa le ta’avale a le ua molia i Vaitogi, o iina lea e finau le malo na tula’i mai ai loa se tulaga mata’utia ina ua fa’apapa ai iina ni fana.

 

Ina ua oo atu le tuliga ta’avale i le auala i Fagaima, na taua e le malo le afe o le ta’avale a Lefatia ma paka i tafatafa o se faleoloa fou i Fagaima. Na aga’i atu fo’i ma Leoleo ma latou taumafai e poloka le ta’avale a le ua molia ina ia le mafai ai ona toe alu ese mai i le vaega o loo paka ai.

 

O se ali’i Leoleo na taumafai e aga’i atu i le itu o le ave ta’avale ma le faamoemoe e fia talanoa i le ave ta’avale, peita’i na fa’afuase’i ona oso le ta’avale ma toeitiiti ai lava lavea le ali’i Leoleo. O ia lea o Satia Leulu.

 

Na toe fa’aauau le tuliga ma i’u ina le iloa ai e Leoleo poo fea le itu lagi ua alu aga’i i ai le ta’avale a le ua molia, e mafua mai i le ova tele o le saoasaoa na alu ai lana ta’avale.

 

Ina ua le mafai e Leoleo ona tuliloa le ta’avale a Lefatia, na fai ai loa le tonu o le a taape solo ta’avale a Leoleo i vaega eseese i Tafuna e tau saili poo fea ua alu aga’i ai le ta’avale.

 

Na taua e le loia a le malo e fa’apea, o isi fa’alavelave na tula’i mai i Vaitogi, ina ua maua e Leoleo le ta’avale a Lefatia i Vaitogi, ma taumafai ai loa e taofi, peita’i na oso le ta’avale a le ua molia ma toeitiiti ai lava lavea le ali’i Leoleo ia Det. Justin Thomsen.

 

O gaioiga uma sa faia e le ua molia, na faia ma le manatu ina ia sola ese mai i Leoleo ao taumafai e pu’e fa’apagota o ia i le soona alu saoasaoa o lana ta’avale, peita’i, na avea ia gaioiga ma auala na lamatia ai le saogalemu o Leoleo.

 

ULUA’I FOLASAGA A LE ITU TETE’E

 

Na matua teena e Uiagalelei le folasaga a le malo e faapea o Lefatia lea sa fai a latou tuliga ta’avale ma Leoleo i le vaveao na tula’i mai ai le fa’alavelave. O le faalavelave tonu lava na tula’i mai e pei ona finau Uiagalelei, o le faalavelave e fa’atatau i se ti’eti’ega ta’avale a Leoleo ma le ave ta’avale a le ta’avale lanu mumu, ae leai se tuliga ta’avale sa faia.

 

Sa faailoa e Uiagalelei i le vaega iloilo iuga e fa’apea, soo se tala lava e 2 ona itu, e fa’apena fo’i i le tala lea ua faamatala e le malo, e 2 itu o le tala lea. E tatau foi ona latou faatali sei o latou faalogo i mau faamaonia uma lava o lenei tala, ona faatoa latou faia lea o le faaiuga poo fea le tala latou te talitonu i ai.

 

“O molimau o le a folasia e le itu tete’e, o le a outou faafofoga ai poo fea sa i ai Lefatia i le taimi o le vaveao lea e finau mai le malo sa ia faafoeina ai le ta’avale lanu mumu. Aua la ne’i vave faia sa outou faaiuga sei vagana ua outou faafofoga i mau faamaonia uma o lenei mataupu,” o le saunoaga lea a Uiagalelei i le vaega iloilo iuga.

 

Saunoa atili Uiagalelei e fa’apea, afai e naunau le malo e faamautu le latou tagi, e tatau ona lava ma mautu a latou mau e folasia ina ia lagolago ai le latou tagi fa’asaga ia Lefatia.

 

“E le nofosala Lefatia i lenei mataupu, e le o ia fo’i na fa’afoeina le ta’avale lanu mumu lea e finau mai Leoleo na alu i se saoasaoa uiga ese. E tatau i le malo ona latou faamaonia i mau o le a folasia, o Lefatia lea sa ia faafoeina le ta’avale.”

 

E silia i le to’a 6 molimau ua fuafua itu e 2 latou te valaau mo lenei mataupu, ma ua fa’amoemoe fo’i e tatau ona mae’a le fa’amasinoga a o le i oo i le faaiuga o lenei vaiaso.

 

O afioga i ali’i Fa’amasino Lagolago ia Faamausili Pomele ma Muasau T. Tofili o lo o lagolagosua i le afioga i le Faamasino Sili ia Michael Kruse i le faatautaiga o lenei mataupu.