Ua amata nei ona galulue le Matagaluega o Faatoaga a le malo ma le Ofisa o le Loia Sili, i le tau faataotoina lea o se tulafono e tuuina atu i le Fono Faitulafono, e taofi ai le toe aumaia o le talo mai Samoa e faatau i le teritori nei, ae maua ai le avanoa o le aufai faatoaga a le atunuu e faatau atu a latou talo i pisinisi ma faleoloa i totonu o le teritori.

O lea manatu e pei ona faamaonia mai e le faatonusili o le Matagaluega ia Lealao M. Purcell i le Samoa News, na alia’e ina ua maea le Faaaliga a le Aufai Faatoaga sa faia i le vaiaso na te’a nei, ma maitauina ai le oo atu o taumafaiga a le au fai faatoaga, i le tulaga ua latou gafatia ai ona sapalai le meamata e pei o le talo, taamu ma le fa’i i pisinisi ma faleoloa i le teritori o lo o manaomia lea oloa.

Saunoa Lealao e faapea, o le fesili sa tula’i mai pea i le tele o tausaga, pe gafatia e le aufai faatoaga a le atunuu ona sapalai meamata aemaise lava le talo i pisinisi ma faleoloa i le atunuu o lo o manaomia lea oloa.

O lea fesili e pei ona toe saunoa Lealao, na toe fesiligia ai fo’i o ia e nisi o taitai o le atunuu i le vaiaso na te’a nei, e aofia ai ma ni alii faipule e to’alua, i lo latou fia malamalama lea i le malosi ua i ai faatoaga talo i le atunuu.

“O la’u tali le atunuu, ua leva ona sauni le aufai faatoaga a le atunuu latou te sapalaia le meamata e pei o le talo,” o le saunoaga mautinoa lea a Lealao.

“O fua o faaeleeleaga e pei o talo, taamu, fa’i atoa ai ma fualaau ‘aina sa maimoa i ai le atunuu i le vaiaso na te’a nei o le faaaliga a le aufai faatoaga, ua na o se vaega laiti lea o fua o faaeleeleaga na aumai e le aufai faatoaga e faalauiloa, ae i ai fo’i le manatu e le o fai faatoaga uma ia na auai i le faaaliga, atonu sa i ai nisi e le’i lesitalaina o latou igoa ona o le pisi ma le tuatuagia i nisi o fuafuaga faaleaiga, ae o le mea moni, ua lava ma totoe faatoaga e tali ai lea manaoga pe a tula’i mai,” o le saunoaga lea a le alii faatonu.

E toatele nisi o le aufai faatoaga na o latou faaalia i le Samoa News i le vaiaso na te’a nei, ua oo i le taimi ua tatau ai i le malo ona taofi fua o faaeleeleaga mai fafo o lo o ulufale mai i le teritori, ina ia maua ai e le aufai faatoaga le avanoa latou te inuina ai le tamaoaiga e maua mai i a latou faatoaga.

“E le o se mea matagofie le alu atu o le fai faatoaga Amerika Samoa ma ana talo e faatau atu i se faleoloa, ae alu atu ua uma ona faatau e le faleoloa talo mai Samoa, o fea la o le a ave i ai e le fai faatoaga a le atunuu ana talo e faatau ai pe afai o lo o tatala lava le avanoa e talia ai talo mai fafo,” o le saunoaga lea Lafoga Nuu o Pava’ia’i.

Ae na saunoa le susuga a Keneti Onosa’i o Tafuna e faapea, o le mataupu lenei sa latou finauina mai i le tele o tausaga ua mavae ao nofoia e le afioga i le matua ia Togiola Tulafono le nofoa mo le taitaiina o le atunuu, peitai o le tali na aumai, e le o lava faatoaga e tali ai manaoga o pisinisi.

“Ou te talitonu la a’u i le taimi nei, ua fau ma soloi faatoaga e tali atu ai i manaoga a pisinisi ma faleoloa, ma ou te lagolagoina ai loa se manatu, ua tatau ona taofi le toe aumaia o le talo mai fafo,” o le saunoaga lea a Onosa’i.

O le isi laasaga lea ua sauni le Matagaluega o Fa’atoaga e faalauiloa i se taimi e le o toe mamao, o le fuafuaina lea o ni polokalame fou e unaia ai tagata fai faatoaga a le atunuu, e faavae ni a latou pisinisi fou laiti e fesoasoani ai i le atina’e ma le tamaoaiga o aiga i le atunuu.

I le taimi lava fo’i lea e tasi, o le a unaia ai fo’i ma pisinisi lotoifale ina ia ave la latou faamuamua e faatau mai fua o faaeleeleaga mai le aufai faatoaga, ina ia fesoasoani ai fo’i latou i le atina’e a le aufai faatoaga.

O polokalame e pei ona saunoa Lealao, e aofia ai le taumafai o le matagaluega e faatulaga ni auala e unaia ai tagata fai faatoaga o lo o i ai isi agavaa faaopoopo e pei o le kuka ma le fagota, e faavae sina pisinisi fou laititi e fesoasoani ai i le atina’eina o le aiga.

“O le a taumafai fo’i le matagaluega ia faalautele nisi avanoa e la’u aga’i i ai fua o faaeleeleaga a le aufai faatoaga, ina ia unaia ma faamalosia ai pea loto o le aufai faatoaga e toaaga e toto faatoaga ina ia maua ai latou tupe,” o le saunoaga lea a Lealao i se faatalatalanoaga ma le Samoa News.

“O le isi polokalame ua fuafua le matagaluega e faia, o le unaia lea o faleoloa ma pisinisi i le atunuu, ina ia o e faatau mai fua o faaeleeleaga a le aufai faatoaga e pei o talo, fa’i ma ta’amu, aemaise ai fualaau ‘aina taumafa mata ma fualaau ‘aina, ina ia maua ai pea e le aufai faatoaga le avanoa e faatau atu ai a latou fua o faaeleeleaga, nai lo le faatau mai i maketi i fafo,” o le saunoaga lea a le alii faatonu.