O le i’ugafono so’ofa’atasi lea na fa’aulu e le afioga i le ali’i Senatoa mai Manu’a ia Galea’i M. Tu’ufuli i le vaiaso na te’a, nei a o lumana’i ai le malologa a le Fono Faitulafono mo le lua vaiaso, e talosagaina ai suiga o le Fa’avae Toe Teuteuina a Amerika Samoa i le Vaega II, Maga 2 ma le 4, ina ia mafai ai ona toe fa’aopoopo isi Senatoa e lua mo le Itumalo o le Manu’atele.

O le finagalo o le ali’i Senatoa ia Galea’i, e le tatau ona to’a 18 sui o le Senate i le Fono Faitulafono a Amerika Samoa, ae tatau ona to’a 20.

O Senatoa e to’atolu mai Manu’a o lo o i ai i le taimi nei e aofia ai le to’alua mai le Itumalo #1, lea e aofia ai Ta’u, Fitiuta ma Faleasao, lea e pei ona sui mai e le afioga i le na Muaiao ia Galea’i, fa’apea ai le Sui Peresetene o le Senate, le afioga a Nuanuaolefeagaiga S. Nua, ma le to’atasi o lo o fai ma sui o le Itumalo #2 o lo o aofia ai Ofu, Olosega ma Sili, le afioga i le Fa’atui ia Laolagi Fonoti Savali Vaeao.

Na taua e le afioga a Galea’i i lana i’ugafono soofa’atasi e fa’apea, i totonu lava ia o Amerika Samoa, e 15 Itumalo mavae fa’aleaganu’u o lo o i ai, ma o le 5 o ia Itumalo mavae o lo o i totonu o le Motusa i Manu’a.

E ui e 5 Itumalo mavae a Manu’a, ae na o le to’atolu Senatoa o lo o suia maia i latou, e pei ona taua e Galea’i i lana i’ugafono so’o fa’atasi.

O Amerika Samoa e pei ona saunoa le ali’i Senatoa, e na o le pau lava lea o le vaega o Amerika e lua maota Fono e le o atoa sui a ona Itumalo i le Senate. O le teritori o Saipan, le Atu Mariana i matu, e to’a 9 Senatoa mo Itumalo Fa’a Senatoa e 3.

“O isi Setete o le malo tele e pei o Hawaii, e palotaina lava a latou Senatoa mai le aofa’i tutusa o latou Itumalo fa’apalota o lo o i ai, e fa’apena fo’i i Kalefonia, e palota le Senatoa e tasi mo Itumalo ta’itasi”, e pei ona taua i le i’ugafono so’ofa’atasi.

Saunoa fo’i Galea’i i lana i’ugafono so’ofa’atasi e fa’apea, o isi setete e pei o Louiana, e palota a latou Senatoa e alu i le Itumalo e tasi, o lona uiga, e palota le Senatoa e to’atasi mo le Itumalo fa’apalota e tasi, o lona uiga fo’i la, e fa’atusatusa lava le aofa’i o Senatoa i le aofa’i o Itumalo palota.

“Ua tele naua tausaga e le o atoa pea sui o Manu’a i le maota maualuga a le Senate, ma ua oo i le taimi ua tatau ai ona atagia i sui o le Senate a Amerika Samoa, mea ia o lo o faia i isi vaega o le Iunaite Setete, e aofia ai le tofu o Senatoa ma Itumalo palota o lo o filifilia mai ai,” e pei ona taua i se vaega o le i’ugafono so’ofa’atasi.

O le suiga lava o le “Maga 2” o le Fa’avae Toe Teuteuina a Amerika Samoa e pei ona taua i le i’ugafono so’ofa’atasi, o le Senate e 20 ona sui lea e aofia ai le to’alima mai le Itumalo o Manu’a e aofia ai sui ta’ito’atasi mai Itumalo ta’itasi e pei o Ta’u, Fitiuta, Faleasao, Olosega/Sili, fa’apea ai ma Ofu.

Saunoa le afioga i le ali’i Senatoa ia Soliai T. Fuimaono ma le afioga ia Tuiasina S. Esera i le taimi na fa’aulufaleina ai lenei i’ugafono so’ofa’atasi, o le taua o le suiga lenei o le Fa’avae, o le a mafai ai ona malamalama tupulaga ma fanau a le atunu’u i le tulaga tonu e tatau ona taoto i ai le Fa’avae i tulaga o sui o itumalo i totonu o le Senate.

E pei ona taua e le afioga i le ali’i kovana ia Lolo Matalasi Moliga i lana saunoaga e tatala aloaia ai le ulua’i tauaofiaga a le Fono Faitulafono mo lana nofoaiga lenei 34, o le a taoto atu i le Fono le malosi e fa’aulu ai suiga tala talafeagai mo le Fa’avae, ina ia mafai ona pasia ma tu’uina atu loa i le atunu’u mo le palotaina.

O le agaga atoa o le Vaega Fa’amalosi Tulafono fa’apea ai le Fono Faitulafono, afai e lelei ma manino le atunu’u i le agaga o lo o mafua ai suiga i le Fa’avae, o le a fa’a faigofie fo’i ona faia la latou palota e pasia ai so o se suiga e tu’uina atu.