E le i nofo lelei i le finagalo o le afioga i le ali’i fa’amasino ia John L. Ward II, le mataupu e fa’atatau i le ali’i pagota lea na poloaina na te tuliina aso e 90 i le toese i Tafuna, ae emo ane le ata ua tatala i tua i le mae’a ai o sana iloiloga sa faia i luma o le fa’amasinoga maualuga i le masina na te’a nei.

O le fa’aiuga la o lea mataupu, ua taofia ai loa le ali’i o Martin Sega i le toese e aunoa ma se tupe e tatala ai o ia i tua, e fa’atali ai le isi ana iloiloga lea ua fa’atulaga.

O le vaiaso nei na valaau ai e Ward se iloiloga fa’apitoa i le va o loia o lo o taulimaina le mataupu a Sega, ina ua fia maua e le fa’amasinoga le mafua’aga na ala ai ona tatala le ali’i pagota i tua, ae o lea ua mae’a ona faia le poloaiga a le fa’amasinoga e tuli ai lona fa’asalaga.

O Sega na taofia mai e leoleo i le tausaga na te’a nei fa’atasi ma lona uso, ona o tu’uaiga i lo la faia lea o ni amioga mataga i se tamaititi e talavou i lalo o le tulafono.

A o taofia ai o ia i le toese i Tafuna e fa’atali ai le aso e fofogaina ai le la fa’asalaga ma lona uso i luma o le fa’amasinoga maualuga, sa ia fa’atinoina ai le solitulafono lea e pei ona ta’usala ai o ia e le fa’amasinoga fa’aitumalo, i lona fa’ao’olima lea i se isi ali’i pagota.

O le aso 4 Aperila na te’a nei na fa’asala ai e le fa’amasinoga ia Sega na te tuliina le umi e 90 aso, ina ua fa’amaonia le moliaga o le fa’aoolima i le tulaga tolu sa tuuaia ai o ia e le malo, peitai o le masina o Me na te’a nei, na lau ai le la fa’asalaga ma lona uso matua, ma poloaina ai loa e le fa’amasinoga maualuga le avea o le umi lea na taofia ai i laua i le toese i Tafuna, e avea ma la fa’asalaga i lea mataupu, ma tatala ai loa Sega i tua.

Na fa’ailoa e Ward i loia a itu e lua i le vaiaso nei, o faiga fa’avae a le fa’amasinoga o lo o i ai, so o se taimi e fai ai sana fa’aiuga i so o se mataupu, e tu’uina atu ai fo’i le kopi o lea fa’aiuga i le fa’amasinoga maualuga, ina ia silafia e le fa’amasinoga maualuga le fa’aiuga ua faia.

A o fesili Ward pe na fa’apefea ona tatala i tua Sega mai le toese i Tafuna a o lea ua mae’a ona i ai le fa’aiuga e fa’asala ai o ia mo le 90 aso, na taua ai e le itu a le malo e fa’apea, e tusa ai ma feso’otaiga sa faia ma le Ofisa o le Falepuipui, latou te le i taulimaina se pepa e avatu i le fa’amasinoga e fa’ailoa atu ai lana fa’aiuga ua faia mo Sega.

Saunoa Ward, so o se taimi la e toe mana’omia ai e le fa’amasinoga fa’aitumalo se mataupu mai le fa’amasinoga fa’aitumalo, e tatau ona latou fesili muamua atu i le fa’amasinoga fa’aitumalo.

Na ona mae’a lava o le saunoaga lea a le ali’i fa’amasino, fai loa ma lana poloaiga ina ia taofia Sega i le toese e aunoa ma se tupe e tatala ai o ia, e fa’atali ai le isi aso lea ua fa’atulaga e toe tula’i ai i luma o le fa’amasinoga.