Ads by Google Ads by Google

FASI LE TO’ALUA MA’ITAGA

E le fou ituaiga solitulafono nei i luma o le faamasinoga o i latou e taofia atu ona o sauaga e faia i o latou ta’ito’alua a’o maitaga nai fafine, e pei ona tuuaia ai foi se tama talavou i lona faaoolima lea i lona to’alua ma’itaga, ina ua ia ita i le alu atu o si fafine e saili mai o ia i le nofoaga e faigaluega ai.

O loo tuuaia e le malo le ua molia i lona una’iina lea o lona to’alua ma’itaga i lalo atoa ai ma lona po ina o lona gutu.

Na teena e le ula lea tuuaiga o le faatupu vevesi i totonu o lona aiga faasaga ia te ia, ina ua tulai i luma o le faamasinoga faaitumalo i le taeao ananafi, ma toe tolopo ai loa lana mataupu seia aulia le aso Gafua o le vaiaso fou, lea ua faamoemoe le malo e tatau ona oo atu i ai ua maea ona o latou failaina moliaga faaopoopo faasaga i le ua molia.

O loo manino i faamaumauga a le faamasinoga, e le o se taimi muamua lenei ua tulai ai le ua molia i luma o le faamasinoga faaitumalo atoa ai ma le faamasinoga maualuga, o loo faanofovaavaaia fo’i o ia i le taimi nei i faamasinoga uma ia e lua.

O le mataupu na oo atu i le Ofisa o leoleo ina ua talosagaina e le toalua o le ua molia se fesoasoani, ina ua faaoolima le ua molia ia te ia. Na taua e lefafine e faapea, o ia sa alu i le nofoaga o loo i ai le StarKist e saili mai ai lona toalua i le afiafi o le aso Lulu na te’a nei.

Na taua e le fafine i leoleo e faapea, o ia o loo maitaga ma ua 7 masina o lana maitaga, ae na unai e lona toalua o ia i lalo ma po lona gutu.

Ina ua fesiligia e leoleo le ua molia sa ia faamaonia ai faamatalaga a lona to’alua, e ala i lona po ina o lona gutu atoa ai ma lona una’iina lea o ia i lalo.

Ao taumafai leoleo e faatalanoa le ua molia mo nisi faamtalaga, na alu i le atoa o ia ma sola ese mai le ofisa o leoleo ma fai ai loa a latou tuliga ma leoleo. Na valaau atu i ai leoleo e  aua le sola peitai sa faaauau pea ona tamoe le ua molia.

Ina ua maua o ia e leoleo, na taumafai leoleo e loka ona lima peitai sa tafiti solo o ia ma taumafai e tete’e atu i leoleo, mulimuli ane, na mafai lava ona loka e leoleo ona lima ma auina atu loa i le toese e taofia ai, e faatali ai lana uluai iloiloga i le taeao ananafi.

E ono faila e le malo moliaga mamafa faasaga i lenei alii, peitai e fuafua lava i suesuega a leoleo o loo faagasolo i le taimi nei.

E $250 le tupe ua faatulaga e tatala ai le ua molia i tua i lalo o poloaiga ua tuuina atu e le faamasinoga ia te ia, ma o nisi o ia poloaiga e aofia ai le faasa lea ona ia toe taumafai e faafesootai lona toalua i soo se taimi, ia sui foi le nofoaga e nofo ai, aua nei toe nonofo faatasi ma lona toalua.

Ua poloaina e le faamasinoga lenei alii ina ia usitai i isi poloaiga sa tuuina atu muamua ia te ia, e aofia ai le faasa lea ona ia toe tagofia le ava malosi pe na te toe soliina foi se tulafono.

E ese mai i le aso Gafua lea ua fuafua le malo latou te failaina ai moliaga faaopoopo faasaga i le ua molia, o le aso Tofi o le vaiaso fou lea ua faatulaga ai le isi ana iloiloga, ma iloilo ai loa iina pe faamata ua ia soli poloaiga sa tuuina atu muamua e le faamasinoga ia te ia, ina ua lau lona faasalaga i le masina o Mati o le tausaga nei.