Vaega: 77

Taeao manuia i le alafa’i mai o le atunu’u i fanuga lelei o lenei aso, tatou si’i ai pea le vi’iga ma fa’afo’i le fa’afetai i le Atua Soifua, ona o Lana tausiga alofa mo i tatou e le mavae i aso uma o lo outou soifua fa’apea ma si o’u nei ola. Ae alo maia, o le a toe fa’aauau atu la tatou tala fa’asolo, “O le Sone Vevela.” Ia manuia lou alo atu i fiva ma tiute o le a feagai ai ma oe i lenei aso.

O le tala moni lava i mea na tutupu ma a’afia ai tagata i virusi ‘ese’ese, ae maise fo’i o su’esu’ega sa gafa ma ali’i foma’i ma saienetisi Amerika, ona o lo latou naunau alofa, ia maua se vaifofo mo tagata soifua.

Ina ua uma le feiloa’iga ma le talatalanoaga a Peter Jahring ma le ali’i o Tom Geisbert, na manatu ai nei, ua tatau ona logo vave le ali’i  o Colonel Clarence James Peters, MD. O Colonel Peters, o ia sa ta’ita’ia le isi malaga a tagata su’esu’e na o i Aferika e tau sa’ili le virusi o le Ebola. Fai mai le fa’amatalaga, o se tagata e le fefe i se mea, o se tagata fo’i sa ia taumafai malosi ina ia fa’atula’i mai tagata su’esu’e i mea tau i virusi ‘ese’ese, ae maise ai o kasa o’ona, ina ia faia ai su’esu’ega mo le saogalemu lautele o tagata uma.

Ua alu nei le solo fa’aniutu a Peter Jahring ma Tom Geisbert i totonu o le ofisa o Colonel Peters, e taunu’u ane, o lo’o fai le fonotaga a le ali’i ma isi foma’i. E le i fa’atali ai le ali’i o Peter Jahring, na savali sa’o atu nei ua musumusu i le taliga o Colonel Peter, “E i ai le mataupu fa’avavevave lava ou te fia talanoa ai i a te oe.”

Na tau fa’ali’i le ali’i o Colonel Peters ona ua fa’alavelave ane o lo’o feagai o ia ma lana fono. Ae na naunau lava le ali’i o Jahring ina ia maua se avanoa se i va’ai ai i ata e pei ona la matamata i ai ma Tom. Na i’u lava ina fa’aaliali e Jahring i a Colonel Peters sina vaega o le ata. Na ona va’ai atu lava o Peters, o ata o anufe, e le i toe fa’atali, na tu a’e loa i luga ma savali ‘ese mai le fonotaga, e le i fa’amavae fo’i, ua galo mea uma, ina ua va’ai i le ata o anufe tavi’ovi’o.

Ua taunu’u i le ofisa o le ali’i o Peters, ma e le i toe i ai lava ni upu e tele, na fesili nei le ali’i po’o fea e sau ai le ata, ae alu atu le tali a Jahring, o le ata na pu’e e Tom Geisbert o manuki na avane mai Reston. Ua na o le pupula to’a nei o Colonel Peters i ata, e moni lava o anufe, ma e fai lava si lapopo’a te isi na i lo anufe sa maua i totonu o le virusi o le Malburg. E le i tau talitonuina e le ali’i o Peters ia ata nei, ona ua fai mai a ia, e tele isi tala ma ata na auina atu i totonu o le nofoaga su’esu’e lenei, ma o le tele fo’i o ia ata, o ata e le i maua ai ni fa’amaumauga mautu, o ata tau fa’asese ma ata tau fa’ase’e.

Na toe tilotilo nei le ali’i o Peters i ata nei, ma na i’u lava ina fesili i a Jahring pe o le a le isi mea e soso’o ai, pe o le a toe faia se isi su’esu’ega ina ia mautinoa ai loa o le virusi o le Malburg lea na maua ai manuki. O le isi itu sa fia iloa e Colonel Peters, pe mafai ona su’esu’e ai ma le virusi o le Ebola. Na tali le ali’i foma’i o Peter Jahrings, ioe, o le a faia ia su’esu’ega uma, ma o le a ia fa’aaoga ai le toto o le tagata e tu’u fa’atasi ma toto o manuki nei ina ia vaai ai pe ono i ai se mea e tupu mai ai.

Na toe fesili mulimuli lava Colonel Peters pe o le a le umi e faia ai ia su’esu’ega ae na tali Jahrings, pe tasi i le lua vaiaso, ona maua ai lea o le tonu. Na toe tilotilo ane nei le ali’i o Colonel Peters i a Tom Geisbert, ma fa’atonu loa, ina ia faia ni ana su’esu’ega, pe fa’amaonia o lo’o sosolo le virusi i totonu o tino o manuki, ina ia maua ai loa le  fa’ai’uga tonu ma le mea e ao ona fai.

E faia pea …

Fa’aliliu: Akenese Ilalio Zec