[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faailoa ane ai e le teine faigaluega ia Kati, ua mafua ona loka e leoleo ia Mena ona o ana solitulafono tuai ua leva na tau su’e ai o ia e leoleo.]

Na vaaia e le tamaitai faigaluega a le kamupani vaalele le mumu uma o mata o Kati i le ita, ona ia toe fesili lea i ai i le tama, pe mana’o e faaauau pea la latou malaga to’atolu ma le olomatua ma le toeaina, pe mana’o e toe tolopo sei faatali le faaiuga o le mataupu a Mena, na tei le fafine ina ua aapa atu Kati ma se’i mai a latou tusi folau sa uu i lona lima ma fai atu i ai, “E leai sau feau ete suesueina ai le mea lena.” E fai lava tala a Kati ma savali faanatinati i le vaega tonu o lo o faatali mai ai le olomatua ma le toeaina, o matua ia o Mena, ona ia faailoa lea i ai o le faaletonu ua tula’i mai, atoa ai ma lana fautuaga, e tatau ona la muamua i le va’alele lea ua toeititi malaga ese atu mo Enelagi, a’o lea o le a ia fesoota’i i lona pule e faailoa i ai tulaga uma e tatau ona fai faatasi ai ma se isi e fesoasoani i le la taunuu atu.

O le talitonuina e le ulugalii o gaioiga uma a Kati na mafua ai ona la malilie la te malaga na o laua i le vaalele lea o le a sosoo, ae se’i nofo Kati e toalua atu ma Mena i lana mataupu lea ua ala ai ona taofia o ia i totonu o Enelagi. Na avea le masalosalo o Kati i gaioiga a le tamaitai faigaluega o le kamupani vaalele atoa ai ma leoleo ia na latou aveina Mena ma itu na manatu ai, e sili pe a nofo e tuli mata’i tulaga uma e oo i ai Mena ina ne’i ona faatamala ae avea ma itu e fasiotia ai si ana manamea e le au faatupu faalavelave. E vevesi fua nei mau gaioiga ae leai ma se popole i ai o Kati, aua ia ia mautinoa lelei e faigofie uma nei mau gaioiga o lo o tutupu mai i le taimi e tali atu ai i ana gaioiga faa leoleo nana. Na ona maea lava ona momoli e Kati o le ulugalii i le vaega e agai ai i totonu o le vaalele, faamavae loa i ai ae faanatinati atu lana savali i totonu o le fale taele ma le manatu, ua tatau ona sui ana sikaili ina ia faigata ai ona iloa o ia e leoleo o le malae vaalele aemaise ai tagata o le vaega a le tamaloa o Tomasi lea na ia fasiotia.

“Faatopetope toeititi tapuni le fale o le malaga mulimuli lenei o le aso ua sauni e tuu vaa ese atu,” o le alaga atu lea a le tagata leoleo po lea o lo o vaaia fale taele i totonu ia Kati, ao le taimi lea o lo o pisi le tama i le suiina o ona lavalava ma ana sikaili, e le i umi ae toe savali mai loa i fafo, ma le vaai atu o le leoleo po, e ese le tagata lea e savali mai i fafo, e le o le tagata lea na ia vaaia o lo o ulufale i totonu, ona toe nofonofo foi lea o le leoleo po e faatalitali le tagata lea na ia iloa mai o lo o savali i totonu o le fale taele, ae lilo i lona manatu, o Kati lava lea na savali i totonu ao lea ua ese ana teuga lea ua sau ma ia i fafo. E fetaui loa le taunuu atu o Kati i luma tonu o le faitoto’a e ulufale ai i le isi itu o le malae vaalele ae ona vaaia loa Mena ua taitai mai e leoleo ma ona lima o lo o loka mai i cuff.