[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na logo mai ai e le ofisa o leoleo le tama o Kati i le uaealesi, ua fasioti e le au faatupu faalavelave ali’i leoleo na momoliina atu le ali’i sa latou pu’eina, ma ua sola ese o ia i le ta’avale na o atu ai le fau faatupu fa’alavelave.]

Na ona taunuu lava o le tama o Kati i le vaega lea e paka ai taavale i le pito i tua o le falema’i, oso loa i fafo ma lana taavale ma faataga savali i totonu o le tama’i fale’aiga o lo o faasaga mai i le isi tulimanu o le falema’i ma saofa’i mai ai, o lana ipu kofe i le isi itu o le laulau ae o lana nusipepa i lona lima, ona punou lea ma faitau nusipepa mo ni nai minute, ae ona vaaia loa se sosolo atu o le taavale lea o lo o ia faatalia i le vaega lea e paka mai ai lana taavale, ona ia vaaia lea o se tama’ita’i foma’i ua oso i fafo ma se ato lanu uliuli, o se ato ta’ita’i tamaloa, ma savali aga’i atu i tua o isi taavale o lo o paka i le isi itu ma tu tu ai ma vili le telefoni.

E le’i toe misi gaioiga uma a le tama’ita’i lea i le vaai a Kati, o le taimi lea ua tuu faamaualuga ai e Kati lana nusipepa i ona luma ina ia sa’o lana nofo ma faigofie ona ia iloa gaioiga uma a le tama’ita’i lea o le a faia.

E silia i le 10 minute o talanoa le tama’ita’i foma’i lenei i le telefoni, ona tago lea o Kati i lana uaealesi ma send lana text i le leoleo o lo o la feso’ota’i ina ia faalatalata mai ni ta’avale i le nofoaga o lo o i ai le falema’i, e foliga mai e i ai se tagata na te masalomia o lo o fesoota’i ma le au faatupu faalavelave, ma o ia fo’i o se tama’ita’i foma’i, e iloa gofie i lana toniga o lo o fai. Pe a ma le lime minute ae vaaia loa e Kati se ta’avale sipi soloatoa ua sosolo atu ma paka i tafatafa tonu lava o le ta’avale lea na alu atu ai le tama’ita’i foma’i, ona ia vaaia lea o se ali’i fai pelaue lanu uliuli ua oso i fafo mai le sipi lanuuliuli na alu atu ai ae oso i totonu o le ta’avale na alu atu ai le tama’ita’i foma’i o lo o paka i tafatafa ane lava o le vaega o lo o paka ai le sipi uliuli, faatasi ai ma ni atopa’u se lua ua tu’u atu i tua o le keli o le tama’i ta’avale lea ua oso i ai, ona toe alu ese atu loa lea o le sipi lanu uliuli ae ua ia vaaia le savavali to’alua atu o le tama’ita’i foma’i ma le ali’i pelaue uliuli lea i totonu o le falema’i, ma e foliga mai o lo o tofu laua ma fana i totonu o la ofu talanoa ia ua tui atu i tua o la ofu o lo o faia.

Na ona tulioso lava o le toalua lea i totonu o le falema’i, fesootai loa ma Kati i ana leoleo ina ia loka pa’u o le ta’avale lea o lo o paka i tafatafa o lana taavale, ma aua ne’i toe tu tu mamao o lea ua ia masalomia o le isi lea vaega o le au faatupu faalavelave ua aga’i atu i totonu o le falema’i, ma e mana’omia fo’i ni leoleo ofu savili e tofu ma a’upega i totonu o le falema’i i le taimi lava lea. E fetaui lava le oo atu o Kati i totonu o le falema’i ae ona vaaia loa le toalua lea na muamua atu ia te ia ua la tulioso i totonu o le potu lea o lo o taofia ai tama’ita’i faigaluega e to’alua mai le fale’aiga lea na mu.