Vaega: 105

Tatou fa’afo’i fa’atasi le vi’iga ma le fa’ane’etaga i le Atua le Tama, ona o Lana tausiga alofa mo i tatou i aso uma o lo tatou ola. Afai fo’i o luti i tatou i faigata ma puapuaga o le soifuaga nei, ia o tatou maua pea le fa’atuatua i le Atua, aua e leai se mea e faigata i Lana Afio. Ae alo maia,o le a toe fa’aauau atu la tatou tala, ae ia manuia lou alo atu i feau ma galuega o lenei aso.

Na muta mai la tatou tala ina ua feiloa’i nei le aiga o Paulo, o ona uso e to’alua o Sila lea o lo’o Faifeau i le afio’aga o Tula fa’apea ma lona uso o Pati, ae maise o le latou tuafafine e to’atasi o Salamasina. O se po ‘ese lea po i le fale o Sala ma lona to’alua palagi o Larry. Fai mai, ua pei o se nu’u atoa ua i totonu o le fale, ua le ofi, ma ua fai mai i fafo le tele o tagata.

Na vala’au ane nei i ai Samuelu ma le tuagane la’ititi o Salamasina le tama o Pati, ma tu a’e lava i luga Pati ua savali ane e fa’afeiloa’i i a Larry, aua e lelei le simili a Pati ona e faia’oga i le A’oga o lo’o i Vatia. O le tama fo’i o Samuelu e matua’i selau pasene le inilisi a Samuelu, ona e toaga le tama e faitau tusi. E le gata i le gagana fa’ainilisi, ae ua fa’apea fo’i i le gagana fa’aSamoa e matua’i selau pasene e maua e Samuelu i le lelei i gagana uma e lua.

Ua ma’ea lea ona savali loa lea o le ali’i palagi i totonu o lona fale, e matala mai le faitoto’a, na muamua lava tau lana va’ai i le lo’omatua o Eseta, manatua fo’i e ‘ese le fiafia o si ali’i palagi i le lo’omatua o Eseta. E le i poi lava le palagi, na savali sa’o atu lava ua feiloa’i i a Eseta, “Seta, how are you?” Na ‘ata le lo’omatua ma tau mafaufau po’o le a le nanu o le a fai ane i a Larry. Ae na ‘ata nei ma fa’apea ane, ‘O, Larry, me okay mea uma.” E fai lava le tala a Eseta ma fai ana taga ina ia iloa ai e Larry o lea e malosi lava.

Ua fa’asolosolo nei le fa’atalofa a le tamaloa palagi i le to’atele o tagata o le aiga o Salamasina ua fa’atasitasi nei i totonu o lona fale, ae na mulimuli lava i si ona to’alua fa’apelepele o Sala. Ua nofo ifo nei i lalo Larry ma faitau tagata, e ofo le tamaloa e to’a 38 o lo’o i totonu o le fale, ae le taulia ai le isi anoano o lo’o i fafo.

Pau tama  e le o auai i le fa’atasiga lea a le aiga, o le tama o Falaniko ma Eteuati, ona o lo’o nonofo i latou i Amrerika ma a la fanau. E le o i ai fo’i se fanau a Sala ma Larry i le fa’atasiga lea, ona o le tausaga fa’au’u lenei o le tama’ita’i o Caroline Vaitimaleata i le sa’iliga o lona tikeri fa’aLoia. O lea la ua au ai uma le aiga, o le mataupu lava i le fanua o lo latou aiga o Alava’a lea ua talanoaina nei.

E moni lava le upu, e ese le tagata ma ona manatu, o le ala lea na tu’u ta’itasi ai le tagata e fa’ailoa sona manatu e tusa ai ma le mataupu. Manatua fo’i, a potopoto loa se aiga i le talanoaina o suafa matai po’o ‘ele’ele, e leai se leo o le au faiava ma le au nofotane, o le mea la lea ua tupu i le po lea. Ae sa talosaga le lo’omatua o Eseta mo sona avanoa, aua fo’i o Eseta ua iloa uma mea o le aiga, ona o ia na soifua lava matua o Paulo ma Sila ma Sala, o lo’o i totonu o le aiga. O le ala fo’i lea ua manatu ai le lo’omatua e sili pe a fai sana tala, ona o le to’atele o le aiga ma fanau e le o malamalama i le fanua lea o lo’o talanoa ai nei, o Alava’a.

E faia pea…