Vaega: 97

Fa’atalofa atu i lou maleifua mai i fanuga lelei i lenei teaeo fou, i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Atua e, fa’afetai tele i Lou alofa, fa’amalo i lou agalelei mo i matou i aso uma o lo matou ola, matou te fa’afo’i atu pea le vi’iga ma le fa’amanu i a te Oe Tama e le aunoa, amene.

Ae alo maia, o le a toe fa’aauau atu la tatou tala mo lenei aso, ae ia manuia lou alo atu i faiva ma tiute o le a feagai ai ma oe. Na muta mai la tatou tala ina ua maua e Petelo le tusi na alu atu ma Misi mai i a Losalia. O lea la e tauanau lava e Misi ia Petelo e tatau lava ona fai se tali o le tusi, ae i le mafaufau o Petelo, o lona uiga, o tusi uma lava o le a ona tusiina e ave i a Losalia, e muamua faitau ai Misi, ona fa’atoa ave ai lea.

Ia o mea lava ia sa o tatou o mai ai i la aso, a mamao le ala ma mea e nonofo ai, o le peni lava ma le laupepa sa fa’aaoga e molimoli ai alofa’aga ma mana’oga o le tasi i le isi. A le o le na fo’i, e sopo i le mamao o le ala, aua o upu a fo’i a le atunu’u, a i ai le mea e mana’o ai, fai loa, ‘aua ne i toe fa’atali. E fa’apea la le faiga lea ua fai nei e Losalia, ona o le naunau o lona loto e fia maua sina taimi e talatalanoa ai ma Petelo, ma se i fa’amalamalama ai le mea moni na tupu.

Ae se o tatou tulituliloaina pea, po’o fea o le a o’o i ai le loto o le tama o Kelo, ae po’o le a fo’i sana fa’ai’uga e uiga i le tusi na avane e si tama’ita’i o Losalia. Ua tu nei Petelo ua le tautala, aua o lea ua fa’atoa uma ona ia faita’u i le tusi na au mai i a Losalia. Na iloa lelei lava e Misi le tulaga ua o’o i ai si ana uo o Petelo i lea taimi aua ua va’ai atu nei ua ‘ese lava foliga o Petelo. “Kelo, ‘aua e te popole, va’ai oe le uso, se o mea e mafai ona fai, afai e i ai se mea e te fia talanoa ai i a Losalia, ona e fai mai lea i a te a’u, o a’u i a Losalia.”

Ua tu Petelo ma mafaufau, afai o le a fai le mea lea ua fai mai ai Misi, o lona uiga, e uma tusi a Losalia ona faitau e Misi, e uma fo’i ana tusi ona faitau e Misi. Ua le iloa la le mea o le a fai i le va lea. ia ua o tatou iloa uma lava, o mea lava fa’apenei, e uma ane, ua  malo le fa’asoa ae valiano ai ta ita nei. O le tulaga tonu lava lea na mafaufau i ai Petelo.

Na i’u ina fa’apea ane Petelo i a Misi, “Misi, e sili ona tu’u, ua uma ona fai la’u fa’aiuga e uiga i a Losalia, o le a le mea na tupu, o le Atua e silafia mea uma, a’o a’u, e leai, atonu lava o lo’o i ai se isi teine e fa’asino mai e le Atua mo a’u, a’o Losalia, ua uma, ma ou te le toe fia mafaufau i ai. O oe fo’i ali’i Misi, ‘aua ne i e toe sau ma ni tusi a Losalia i a te a’u, ta’atia ai fa’apea, ua e fa’alogo mai.”

Na fa’ate’ia Misi i le tala a Petelo i lea taimi, ona sa i ai lava lona manatu o le a tali e Petelo le tusi a Losalia, ae se i a’o ai lana faitau tusi fa’aSamoa. A’o lea la ua tu’u ane le tali a Petelo, ia ua uma mea uma, fulu sitopu mea uma. Na toe tali ane Misi ma lona loto fa’anoanoa, “ia ua lelei, ae o le a la la’u tala e fai i a Losalia?” Ua punou ifo i lalo Petelo ona toe ea ai ai lea i luga ma fa’apea ane i a Misi, “Misi, e leai sa’u tala e fai atu, ae e pei ona ou tautala atu, ua fulu sitopu mea uma, uma lava pisupo, ua alu fo’i i le va’a tu’u sa’o.”

E le i umi, ae fa’alogo atu ua sau le vala’au, “Kelo, Kelo, o fea oe, Kelo, se o le tama lenei se, e le iloa po’o moe i lalo o se ta’amu, Kelo, Kelo, ua o’o au miti i le lagi, Kelo, Kelo o fea oe.” E pei e ‘ai e ni pi le tino o Petelo i lea taimi, “ Oi ta fe fe, o lo’u tina, Misi, punou ifo e fa’ataga vele ifo vao na.” Na fa’apea mafaufauga o Misi, “Isa la’ia, ua sau le aitu, o aitu uma fo’i e feoa’i na o po, a’o le aitu lea, e fealua’i fa’asolo atoa i po ma ao.”

E faia pea…