Vaega: 20

Fa’atalofa atu i lou alafa’i mai i le manuia i lenei taeao fou, i le tausiga alofa a lo tatou Matai oi le lagi, e ao ai ona o tatou fa’apea ifo, “Le Ali’i e, e vi’i a’e pea o matou loto i Lau Afio i aso uma o lo matou ola, ia E alofa ma foa’i mai le loto tele i a i matou, ina ia mafai ai ona fa’atino a fuafuaga o lenei aso, a  ma’ea, ona matou fa’afo’i atu lea o le vi’iga ma le fa’ane’etaga i Lau Afio e fa’avavau, fa’avavau lava, Amene.”

Ae alo maia, o le a toe fa’aauau atu la tatou tala mo lenei aso, ae ia manuia faiva ma tiute o le a feagai ai ma oe i lenei aso. Na muta mai la tatou tala ina ua iloa nei e le toeaina o Paulo ma le lo’omatua o Eseta, o le fasi moa e tasi na totoe, na teu lava e Petelo mo si ona uso o Samuelu. Ua malie lava Petelo e le ‘ai, ae ua tu’u mo Samuelu, atonu ua iloa ai e le toeaina ma le lo’omatua, o a lava uiga fa’alogogata o Samuelu, ae o lo’o ta mau pea le alofa o Petelo i si ona uso.

Tatou liliu atu e sa’ili po’o fea ua o’o I ai le ti’eti’ega pasi a Samuelu lea ua alu I le uso o lona tama o Sila. Na tali le ave pasi, “E te uluvale ali’i, o fea e te sau ai?” Na toe tali Samuelu, “Ou te sau mai le lagi, fai fa’alelei au mea, e le totogia ni o matou pasese.” E fai lava tala a Samuelu ma la’a i fafo. Na liliu nei le ave pasi ua u’u mai le u’amea o lo’o teu lelei lava i ona talane, e fa’aleoleo pe a o’o i tulaga fa’apea. E tau tu a’e i luga le ave pasi ae o’omi i lalo e le isi toeaina, “Emani, e sa’o le tama, afai ua e le alu e  momoli matou i le nu’u matou te nonofo ai, o mea sa’o lava ma mea amiotonu, e le totogia ni o matou pasese.”

O le taimi lea, ua sauni lelei Samuelu, e ga pa loa le mea, ‘emo loa ma le avepasi e le toe fa’atali. Na fai nei finauga a le ave pasi ma le toeaina, na i’u lava ina fa’apea ane le avepasi, “ia ua lelei, fai si ga lelei, ae o lea ua ou maitauina lelei lava outou, tou te le toe ti’eti’e i la’u pasi.” E le i uma ane tala a le ave pasi ae tali Samuelu lea ua tu nei i fafo ma fa’atalitali mai ai, “E a ali’i, a’o ai e toe fai ti’eti’e i sau pasi pa la, toe salukuluku, toe auleaga mai ma ou foliga, e le fia ti’eti’e ai se tagata, alu e fufulu somo o ou mata, ua tiga mata e tilotilo atu i ai.”

Na ona uma lava o tala a Samuelu, la’a mai i lalo ma le toeaina ma isi tagata na i totoe ai, alu loa ma le sopo e aga’i i le nu’u lea ua le o’o i ai le pasi. Ua alu nei le solo, ae ua tu’u fesilisili le toeaina i a Samuelu, po’o fea e sau ai, ae po’o fea fo’i e alu i ai. Na tali Samuelu, e alu i le fale o le Faifeau ona o le uso o lona tama. Ua tilotilo ane i ai le toeaina, ma fa’apea ona mafaufauga, “Se leitioa lava, e fa’apea uma lava uiga o le Faifeau pe a le lava lana peleti i Aso Sa.”

Ua alu pea le savaliga, ae ua alu a’e fo’i ma le pogisa, ua fa’amavae isi tagata ona e nonofo i le nu’u e soso’o ma le nu’u o le avepasi, ae ua alu nei na o le solo a Samuelu ma le toeaina. i le taimi atoa lava a’o alu le solo a Samuelu ma le toeaina Seve, ua mata’i lelei lava e le toeaina nei ia uiga o Samuelu. Na ta’u i ai e Samuelu lona igoa, na fa’apea manatu o le toeaina, “Letioa fo’i, leaga o le tama o Samuelu, o le tama e mamafa.” O mafaufauga ia o le toeaina na ‘ata ai nei ma tilotilo ane i a Samuelu.

Na toe fesili Seve i a Samuelu, “O fea la na e sau ai nei a’o ai ou matua?” Na tali Samuelu, o lo’u tama o Paulo, a’o lo’u tina o Eseta.” Ua pupula to’a ane nei le toeaina i a Samuelu i lea taimi, ae e le o iloa lava e le tama, o lea lava e topetope lana la’a ona ua o’o ifo le fia inu. A’o le toeaina lava lenei, e tu’u atu lava ana fesili i a Samuelu ua le motu, ona o le fia iloa lava ma le faitatala.

Na fa’apea mafaufauga o Samuelu, “Ana e le matua nei ua e va’ai i ai, tu’u lou isu i le mea e tatau ona tu’u i ai, leaga lava lenei mea o lalo o le isu e faigata tele.” Ua ‘ata’ata Samuelu ma tilotilo ane i le toeaina, “Tama, topetope mai lau savali, ua toe titi lava ta o’o.”

E faia pea…