Ads by Google Ads by Google

Fagogo: Alofa, se ia tiga

Vaega: 62

 

Malo le soifua i le mamalu o le atunu’u, fa’amalo fo’i le onosa’i i faiva ma tiute o lo’o feagai ai. E i ai pea le fa’amoemoe maualuga, o lo’o aoina pea le masina i le soifua laulelei o le atunu’u, ae maise i latou o lo’o fiafia e faitau i la tatou tala fa’asolo, Alofa, se ia tiga.

 

E pei ona fetalai lo tatou Ali’i Fa’aola, a’o le sili o na mea uma, o le alofa lea. O a lava mea uma o lo’o maua e le tagata, o a fo’i le tamaoaiga ma le oa e tele, ae afai e aunoa le tagata ma le alofa, e leai se aoga  o mea uma. O le alofa o Keriso mo o tatou tagata lea sa ia malie ai, ina ia o’o puapuaga ia te ia ina ia o tatou toe maua ai le feso’ota’iga vavalalata ma le Atua le Tama le Mataisau o mea uma lava. Tatou fa’afo’i la’ia o le mua ma sunu’i lapalapa o malo i le Atua Soifua, ona o Lona agalelei ma Lona alofa mo i tatou lea na maliu ai lava Lona Alo Pele i le Satauro mo i tatou.

 

Tatou a’ea’e laia o lea manu ua ulu, ona o fa’amanuiaga mai le Atua, lea o lo’o tatou ‘oa’oa ai pea i faleseu ma o tatou sa’a ai i ma’a o malie i aso uma o lo outou soifua fa’apea ma lo’u nei ola. Ae alo maia o le a toe fa’aauau atu la tatou tala fa’asolo mo lenei aso.

 

Ua fa’ate’ia ma’ua ma Ana i tala na lafo e lo’u tuagane la’ititi e uiga i lo ma tina fa’apea ma Peteru. Na mamao lava ma lo’u mafaufau ia tulaga, peita’i, ina ua ou fa’alogo atu i upu ua tautala mai ai lo’u tuagane o Ioane, ua te’i lava ua ‘ese o’u mafaufauga i lea taimi, ua foliga mai ua mamafa lava mea i lo’u loto ma lo’u mafaufau. Ua foliga fo’i ua tau tonu lava i lo’u fai’ai tala ia ua lafo nei e Ioane, a’o lea ma te fa’alogologo atu i ai ma lo’u tina tausi o Ana. Na ou tu a’e nei i luga ma ou savali atu i le itu o lo’o tu ai si o’u tuagane ma tagi lava, ma tatu’i le pa puipui o le potu malolo o lo matou fale.

 

“Ioane, Ioane, alofa mai si o’u tuagane, fa’amama mea i lou mafaufau, sau se o tatou talatalanoa pea i lenei mea, ae ‘aua e te ita fa’apena, sau loa se fai sa tatou tala.”

 

Na ou aunagi atu nei ia Ana, e sau e fai mai sana tala ia Ioane ma na tu mai ai loa i luga si o’u tina tausi ma ma taumafai e toe ta’ita’i mai Ioane ina ia mafai ai ona matou toe talatalanoa i lea taimi, e tusa ai ma le mataupu ua o’o nei i ai lo matou aiga.

 

“Ioane, fa’alogo lelei mai lava oe lo’u tuagane, o upu ua e lafo e uiga i lo ta tina, Ioane, ia gata ai i le aso, ia ‘aua fo’i ne i o’u toe fa’alogo atu lava ia te oe o e toe lafo ni upu fa’apea e uiga i lo ta tina, e sa tatapu lava i se fanau ona lafo ni upu fa’apea i matua,  e sa, sa lava.”

 

Na ou iloa lelei atu lava le liuliu fa’ali’i o Ioane, ai ona o lona manatu alofa mai ia te a’u, ai fo’i o ona manatu e fa’apea, ua ia iloa le leaga o lo ma tina o Makerita, ua ia iloa fo’i le leaga o Peteru. Ae ia te a’u lava ia, sa ou lagona le filemu o lo’u loto ma o le ala fo’i lea sa ou tamafai atu atu ai ina ia fa’ato’ato’a le matou mataupu, ma ia maua ni o matou manatu lelei, ae le o le leaga.

 

“Ioane, o e va’ai mai ia te a’u o o’u amanaia uiga ia o lo ta tina e leai, o e va’ai mai ia te a’u, ou te talia se upu po’o se fa’atonuga e fai mai e lo ta tina, e leai, pe sa’o pe sese ou te usita’i lava, e pau lava i luga o le tagata latou ona leaga, ae ia e usita’i ona lelei lea o mea uma.”

 

Ua atili ai ona tagi ioane i lea taimi ma punou ifo i luga o le laulau. “Ioane, o lena ua tautala atu lou tuafafine, amuia Averia, e i ai sona tuagane e alofa fa’amaoni ia te ia, amuia Averia, e i ai sona tuagane e tu i mea lelei, ma tautala i le mea amiotonu, va’ai oe Ioane, ua leva ona ou iloa mea uma, mai lava o tou laiti ae e le mafai ona tautala lo’u gutu i se mea e tasi, aisea, ou te iloa le tulaga ou te tu ai i totonu o lo outou aiga. E ui fo’i ina fa’apea sa tautua si o’u tina i matua o lou tama mo le tele o tausaga, ae sa tautua gugu lava, e leai se upu e tali. Ua ou iloa lelei lava ou manatu, e le o oe o se tagata leaga, e leai Ioane, ae ua e fa’alogo ma ua e va’ai i mea o lo’o tutupu i totonu o le aiga, atonu o iina o lo’o fafau mai ai ou manatu ia, ma upu ua e lafo e uiga i lou tina, Ioane, ia tau mamao lava ma oe ia tulaga. Ia e ava i ou matua, ona fa’alevalevaina ai lea o lou ola.”

 

E faia pea