Vaega: 22

Fa’atalofa atu i lenei taeao fou, malo le soifua, taeao manuia fo’i i le alofa ma le agalelei o le Atua. Ae alo maia o le toe fa’aauauina fo’i lenei o la tatou tala fa’asolo e pei ona masani ai.

Na muta mai la tatou tala, ina ua alu le tina ia Lea e va’ai le foma’i, ma ua amata nei ona faia su’esu’ega a le ali’i foma’i, ma ua mautinoa ai nei, ua ma’itaga Lea, ma o le a ia fanau mai se pepe fou. Manatua fo’i e le o iloa e Maka lea tulaga, ona e le i ta’uina i ai e Lea.

Ua fa’alogoina nei e le ali’i foma’i le tagi aue a le tina ia Lea i lea taimi, ua toe fesili ma toe fesili pe moni le foma’i ua ma’itaga. Na a’apa ane nei le ali’i foma’i ma fusi atu Lea i lea taimi. Ua e matu loimata o le tina, i lona loto fiafia ma lona agaga fa’afetai i le Atua ina ua tali mai i lona mana’oga.

Na logo loa e Lea ia le ali’i foma’i ina ia logo vave lona to’alua o Maka ina ia alu ane i le faema’i. Peita’i, o le taimi tonu lea ua lau ai e le Fa’amasino ia le iuga o le fa’amasinoga sa feagai ma Maka. Ua sauna fo’i Maka po’o le a le fa’aiuga a le Fa’amasinoga, e toe apili lava e ia lea fa’aiuga. Ae sa sologa lelei taualumaga uma o le fa’amasinoga, ma ua tula’i manumalo ai le tama ia Maka i lana itu fa’afinau e tusa ai ma le mataupu sa feagai ai ma ia.

Na vala’au le foma’i peita’i sa le i maua atu Maka i lona ofisa ona o lea ua i totonu nei o le fale fa’amasino mo lauina o le fa’aiuga. Na tu’u nei e le ali’i foma’i le feau a taunu’u ane Maka ona vili vave ane lea o le falema’i. Na toe fesili mai i ai le tama’ita’i failautusi pe i ai se fa’alavelave ua tupu ae sau le tali a le ali’i foma’i, e leai, o se feau fiafia e fia fa’ailoa atu ia Maka pe afai e taunu’u ane i lona ofisa.

Ua le matu loimata o le fiafia, ua le mafai fo’i ona taofiofi le agaga fa’afetai o Lea, ina ua ia maua le tala fiafia mo ia. Ua tu a’e nei i luga ma savali atu i le isi itu o le potu o le foma’i, ma tilotilo atu i le matagofie o la’au o lo’o i totonu o le Paka lea e si’omia ai le falema’i. Tau tonu lava lana va’ai i le pelesepe lea sa o la toe fa’afouina ma lona to’alua. Sa ia pupula to’a lava i ai, ma na fa’apea ifo i lona loto, “Le Atua le Tama, fa’afetai, fa’afetai tele, e moni lava, e leai se mea e faigata ia te Oe Tama, a’o ai ea a’u le auauna fa’atauva’a ma le le atoatoa ua e manatu mai i ai, fa’afetai tele i mea uma lava, ae maise ai o Lou tali mai i lo’u mana’oga.”

Na toe liliu nei Lea ma tilotilo atu i le ali’i foma’i, “Fa’afetai lava, ae sili pe a ‘aua ne i ta’uina ia Maka, ae se i o’u fa’ailoa i ai pe a manava galuega i le afiafi. Na tali le ali’i foma’i ua lelei, o le a faia le mea o lo’o ia manatu i ai.

Ua na o le patipati o Agelu e toatolu lea sa auina mai e Kapilielu i lalo nei, ua ‘eu’eu e le tasi le isi i ona apa’au, “E fa’afetai ua tali le Ali’i i le mana’oga o Lea.” Ua le tautala le Agelu numera tolu, ia ua a la na ou fai atu lava e logo vave mai Kapilielu, ona e tele ma anoanoa’i le mau talosaga ae e te lua nonofo lava.” Ua ‘ata’ata le Agelu numera muamua, ma tilotilo ane i lona uso ulavale. Na liliu nei le Agelu numera tolu ma fesili, “A’o fea o i ai Kapilielu, se o le toeaina lenei se e sili fo’i ona puipui ona mata, na o le aukilokilo solo i lalo, ua toe titi va’ai atu i se mea ‘ese…”

E faia pea…