Ua lauiloa le kamupani a le Nana's Landscaping, Car Wash, Security ma le Construction i le atunu'u i lo latou mau fa'atuatuaina, e vave ma lelei a latou fausaga o falea'oga, falesa ma isi maota eseese, ua mae'a fausia. E matagofie fo'i le fa'atinoga o latou galuega teuteu lotoa ma le totoina o togala'au e matagofie ai le siomaga o Amerika Samoa i ona tafa ala.

Ma ua faailoa mai, le atoaga o le latou 10 tasuaga, talu ona tautua ia Amerika Samoa.

"O le mea lava lea e masani ona mau fa'atuatuaina ai le Nana's e le faigamalo, aua e vave ma e lelei fa'atino o latou tiute, e le fa'atuai ae va'aia ua fua mai galuega. Nana, fai i ai lou fai mea lelei, ia mae'a le falea'oga lea i le 3 masina,” o le saunoaga lea a kovana Lolo M Moliga i le aoga tulaga muamua i Aua i le masina ua te’a, ae le’i suaina ai le eleele e amatalia ai galuega mo le fausaga o le falea'oga fou i lea aoga.

O le agaga o le tausi o Fiapa'ipa'i Tuolo Fruean, lea o lo'o avea ma Pule Sili ma e ona fo'i lea Kamupani, "Ia vave le galuega, aua o le taugata lava fo'i o le galuega, e fuafua i le umi o e taumafai e fausia. E le mafai ona sefe se tupe a le kamupani pe afai e le vave le fa'atinoga o le galuega atoa."

I le taimi na litaea mai ai Pa'i Fruean mai lana galuega sa umi o tautua ai i le vaega o Fa'amasinoga, na ia mafaufau i se mea na te faia e sili ona aoga i ona tagata ae maise lona afio'aga o Pago Pago. O se tala a le tofa Tuaolo Fruean, "Se'i o'u taumafai ia e fa'atu se kamupani  e fa'aaoga ai lo'u taimi ma le tele o nai isi alo o le atunu'u ma le afio'aga e le o maua ni galuega, ou te iloa lava e tele le tomai i o tatou tupulaga, ae le o lava le sapaia o latou mana'oga, ia maua ni galuega e fa'aaoga i ai."

Lea na mafua ai ona fa'atuina le kamupani ma sa amata mai i mea e mafai ona faia e tagata uma o Samoa, ma e agava'a ai lava so'o se tasi e to'aga. Na tatala lea o faitoto'a o le Car Wash ma e le'i leva ae mae'a faia laisene mo le Landscaping e fa'amama ai nofoaga fa'apitoa e fa'akonekarate e le malo.

I le tarmi nei, ua manumalo fo'i i le fa'amamaina o le Malaeva'alele ma o se tasi lea o nofoaga fou lava ua latou maua. Na soso'o lea ma le fa'atuina o le Kamupani Leoleo Faitoto'a ma Lotoa, [Nana's Security]. O lea itu o le auaunaga, ua matua faia a'oga a ali'i uma o avea ma leoleo po i so'o se nofoaga ua fa'akonekarate mai ai i latou.

O le fa'atuina o le Nana's Construction fa'atasi ai ma le lisia atu o masini tetele e aoga mo le fausaga o fale ma alatele ma pakaga o ta'avale, na alia'i fo'i ina ua va'aia lava le mo'omia fo'i o lea ituaiga o kamupani i le atunu'u.

Lea la ua matele ina lalamua mai le Nana's Construction i tauofoga o galuega o le fausia i falea'oga, falesa ma galuega toe fa'afouina o fale tetele, ona o le  vave ma le lelei ona fausia e i latou o maota.

O le kamupani mulimuli lava sa fa'atuina o le "Nana's Financing" po'o le kamupani mo Tupe Nono, ma sa toe fa'ataoto teisi lava lea fa'amoemoe, ina ua motusia le polokalama fa'apitoa e to'esea sa'o mai ai totogi o e nono le tupe mo nei nogatupe laiti i vaiaso totogi ta'itasi a le malo.

"Ona o le faigata fo'i ona tau aoina mai o tupe nono mai sui na talosaga ma talia, o lea e sili ai ona fa'aoto teisi se'i toe maua fo'i se avanoa mulimuli, ae o loo fa'aauau lava ma nai matou tagata faigaluega,” o se tala lea a Shirley, se tasi o le taupulega ma o se alo fo'i o Tuaolo Fruean.

Ina ua fesiligia se tasi o ali'i Leoleopo a le Nana's Security, i sona lagona fa'aalia e tusa ai o le latou galuega, sa ia fa'ailoa ai, "Sa leva tausaga o avea a'u ma tagata faigaluega i le Samoa Packing, ae le'i maua lo'u agaga fiafia lea ua i ai nei i le Nana's Security, aisea, leaga fo'i e leai ma se mea ou te toe popole ai, e le fa'aletonu le maua o le siaki lelei le totogi, toe maua le mea'ai e tausia lelei ai lota tino a'o faigaluega, e kiliva atu lava i le lotoa pe a tiute, ae toe asiasi atu i taimi uma po'o a mai le galuega. E i ai le alofa i le taupulega, ma e matua pei lava o lota aiga le matou Kamupani."

Ua fesiligia fo'i se tasi o le au kamuta, pe o le a sona lagona i le latou kamupani lea o le a fa'ailoga le latou 10 tausaga, "Oka e le ma'i le matou kamupani, e lelei tele fa'ailoga o le matou tauvaga lea e sauni atu i ai, ae o le aso galuega latou, e matua naunau lo'u tagata e fia sau e faigaluega, e le fia nofo i le fale e tiga ai le ulu, ae a sau e faigaluega e leai se tasi e fia ita fua i le tasi, aua e vevela mai le tipoti ti po'o le malulu mai le vaiinu, ae ma'ona fo'i i aso uma aua e muamua lava tapena e Nana le mea taumafa, ia lelei fo'i malosi o tama mo le galuega. E tusa la pe tigaina le galuega, ae le lagona aua o lo'o lelei ona tausia i matou, ae ua tele fo'i se poto fa'aopoopo ua ta maua mai lenei kamupani, ua iloa oso tatau i galuega.”

Ina ua fesiligia totogi, ae fa'ailoa mai e se tasi o ali'i faigaluega, "Pau a le mea e fia iloa e Nana pe fia le mea e te mana'o ai, e faia mea uma ia fa'afaigofie galuega i lota mafaufau. E le popole a fai lava ia Nana e to'ese auaua'i le nogatupe e fa'apena lava ona fai. E pei lava o sota tina le matou Pule Sili, ae tasi lava le mea e mana'o ai Nana, ia lelei fa'atino le galuega, aua le tuai, ma ia sa'o ona fai, ae o isi popolega uma o le aiga, fa'ailoa atu le mea e mo'omia."

Mo le fa'ailogaina o le latou 10 tausaga, ua fa'ailoa mai e faia i le Malae o Suigaula ia Tesema 26, 2014 i le 10:00 i le taeao ma ua fa'ailoa mai e faia fa'aaliga taleni, tauvaga siva i vaega ta'itasi ua tofusia ma tofia o latou ta'ita'i, ina ia manumalo ai i fa'ailoga tupe.