tagata tafafao ...

Na taua e le ulua’i molimau a le malo i luma o le vaega iloilo iuga i le taeao ananafi, e ese lava galuega na folafola e sau i Amerika Samoa nei e galue ai, ese galuega na fa’atonu o ia e le pule o le Karaoke Bar e fa’atino i le taimi e gasolo atu ai ali’i e tafafafo ma fa’atau a latou pia i totonu o le fale kalapu.

O ni isi o ia galuega e aofia ai le faia o gaioiga uma e fa’atosina mai ai ali’i tafafao ina ia fa’aalu uma a latou tupe e fa’atau ai pia a le fale kalapu, atoa ai ma le faia o isi gaioiga e fa’apelepele ma fa’atosina ai i latou ina ia fiafia pe e tafafao i le fale kalapu.

Mo se fa’ata’ita’iga o fa’atonuga na taua e le molimau na fai atu e lona pule tama’ita’i ia te ia atoa ai ma isi tamaitai sa latou galulue i totonu o le Karaoke Bar, afai e mana’o le tagata tafao e tago atu i lona fatafata (tulou) e tatau ona talia, afai fo’i e fia sogi atu le ali’i ia te ia e tatau fo’i ona talia.

O ni isi ia o vaega o le molimau a se tama’ita’i e 36 tausaga le matua mai Samoa, ina ua amata aloaia le fa’amasinoga autu o le tama’ita’i pule o le fale kalapu o le Karaoke Bar ia Fa’asaina Park, fa’apea ai ma se tama’ita’i sa avea ma fesoasoani ia te ia o Lusia Tusi po o Sheila e pei ona iloa ai o ia e le to’atele, lea o lo o tuuaia i lo la taumafai e fa’alauiloa faiga fa’atalitane i ni isi o tama’ita’i sa galulue i le fale kalapu, atoa ai ma tu’uaiga o le fa’ao’olima lea i tama’ita’i e to’alua na a’afia.

Na taua e le itu a le malo i fa’afinauga muamua o lenei mataupu e fa’apea, o le faia o amioga e fa’atosina ai tagata tafafao i totonu o le fale kalapu, faapea ai gaioiga e pei o le pa’i atu, kisi atu aemaise ai o le taumafai faapele tagata tafafao ina ia faaalu uma a latou tupe e fa’atau ai pia mai le fale kalapu, o uiga ia na finau le malo o lo o autu i ai le mataupu atoa e pei ona molia ai tama’ita’i e to’alua i luma o le fa’amasinoga.

Na taua e le ulua’i molimau i luma o le vaega iloilo iuga e fa’apea, o galuega i totonu o le Fale’aiga fa’apea ai ma le Fale Kalapu, o galuega ia sa fa’ailoa atu ia te ia e se tamaitai sa latou tuu tala i Apia e sau galue ai, ae ina ua taunu’u mai i Amerika Samoa mo le taimi muamua o lona olaga ma amata galue i le galuega, sa ia vaaia ai ni isi o uiga e ese fo’i i lana vaai.

Ina ua fesiligia e le loia a le malo le molimau po o a ia uiga, na taua e le molimau e fa’apea, e i ai taimi na ia vaaia ai ni isi o alii tafafao i totonu o le fale kalapu o lo o kisi ma ni isi o teine faigaluega, o isi fo’i taimi latou te tagofia ai tino o tamaitai faigaluega.

Na taua foi e le molimau e faapea, ina ua taunuu mai i Amerika Samoa i le aso 14 Oketopa 2013, o le po lava fo’i lea na amata galue ai i le Fale Kalapu o le Karaoke Bar, ma e masina atoa e leai sona totogi, ae ina ua tuana’i le masina lona lua, sa maua atu ai lona totogi e $50 mai ai Park.

O taimi o fonotaga a le aufaigaluega e pei ona taua e le molimau, e fa’atonu ai e Park teine faigaluega o le fale kalapu ina ia taumafai e faia gaioiga uma e fa’atosina atu ai tama tafafafo ina ia tele a latou tupe e fa’aalu i totonu o le fale kalapu.

O ni isi o ia gaioiga e aofia ai le inu ia vave uma pia ina ia faaalu ai pea e tagata tafafao a latou tupe e fa’atau ai pia i totonu o le fale kalapu.

Na fesili le loia i le molimau pe sa mana’o i ai lona loto e fai gaioiga e pei ona fa’atonu ai o ia e Park, na tali le molimau “e leai”.

O le ali’i loia ia Fiti Sunia o lo o tula’i mo Park, ae o le ali’i loia ia Joel Shiver o lo o tula’i mo Tusi, ma le tama’ita’i loia ia Jessica Bargmann o lo o tula’i mo le itu a le malo.

O le vaega iloilo iuga e aofia ai tama’ita’i e to’atolu ma ali’i e to’afa, ma o lo o fa’atautaia lenei fa’amasinoga e le afioga i le ali’i fa’amasino sili ia Michael Kruse, i lalo o le lagolagosua a afioga i ali’i fa’amasino lagolago ia Fa’amausili Pomele ma Satele Lili’o.