Ua tula’i mai o Oketopa o le masina e fa’alauiloa mai ai e le Ofisa o le Enetia a le tatou Malo, e fa’alauiloa mai ai Auala ua taumafai i latou e fa’ao’o mai i aiga taitasi le fe’au taua, Fa’asao le Enetia i o tatou lotoifale.

O ala sa mua’i fa’ao’o mai e i latou o le Fa’aleleia lea o pusa’aisa ma moli i totonu o tatou fale. Ua suia matauila tuai i ituaiga e fa’asao ai le enetia, ma ua va’ai toto’a fo’i le matagaluega i le uaeaina o le eletise i totonu o maota o le atunu’u. O nei mea uma, ua taofia mo le taimi nei se’ia mae’a fa’auia mai alagatupe sa fa’atautaia ai.

Ua ia fa’ailoa fo’i, “O lo’o maua pea lava matauila nei e fa’asao ai le eletise, masalo toe pau ia o mea o totoe mai mo lea auaunaga, e mafai lava ona o’o mai aiga i le tatou Ofisa mo lea auaunaga a le tatou Ofisa autu.”

Ina ua fesiligia fo’i le tinoitupe sa fa’aalu e le Matagaluega o le Enetia e fesoasoani e totogia ai se vaega tupe mo lau pili eletise i le ASPA, ae fa’ailoa mai fo’i, “Ua i ai fo’i le tatou talosaga mo lea fesoasoani, ua mae’a fa’aulu fo’i ae o lo’o tatalia fo’i se tali mai mo i tatou.”

Ona o le to’atele o aiga sa aoga i ai lea fesoasoani, ua toe gasolo mai e fia toe fa’atutumu pepa talosaga, ae o lo’o taoto fo’i lea fesoasoani i le tulaga e le’i fa’auia mai fo’i se tinoitupe e fa’aauau ai.

Peita’i, o le vaega mulimuli sa nafa ma le matagaluega lona fa’alauiloaga talu mai le masina ua te’a se’ia pa’ia le amataga o Oketopa, o le fesoasoani lea ina ia avatu ni au Panele mo lau Eletise e puaina mai le La.

“O lenei poloketi e le’i mae’a aiaia atoatoa mo le tautuaina o le mamalu o le atunu’u i le taimi nei. Ua taoto atu i le afioga le Fa’atonu le toega o tapenaga o totoe mo lea fa’amoemoe lelei, ae o ia panele o le a fesoasoani sa’o i aiga, ina ia fa’aitiitia ai lau pili eletise.”

O lea galuega lelei, ua iai fo’i isi kamupani tuma’oti mai le Malo o lo’o latou fa’atinoina, ma ua fa’ailoa mai, “O le to’atele o i tatou e ofoina atu lenei tautua aoga mo aiga ta’itasi, o se to’omaga aoga fo’i lea mo aiga uma o le atunu’u, ina ia fa’aitiitia teisi mai a latou pili eletise, ae fa’aaoga lea tamaoaiga, ia fa’asoa mo nisi tausiga o aiga e ala i mea taumafa pe atina’e ai aiga ia mautu atili.” O se fa’apupulaga lea a Apeta Talafaiga e tusa o le poloketi a le latou matagaluega, o lo ua i ai nei i lona tulaga toeitiiti ona fa’ao’o mai lea i aiga ta’itasi e mo’omia.

E le’i i ai fo’i se latou polokalama fa’ataoto fa’alemasina mo lenei fa’amoemoe atoa, peita’i, ua faailoa mai, o a’oa’oga ma fa’alauiloaga o lo’o fa’ailo atu lea i lomiga o le tatou nusipepa ma alaata o le tatou televise.