O le aso Faraile na te’a nei na tuuina atu ai le fa’asalaga a le fa’amasinoga maualuga, i le ulugali’i (grandparent) lea na ta’usala i lo la sauaina o se teineititi e 8 tausaga le matua, o le tama a se tasi o le la fanau, ina ia faasala i laua i le taimi lea ua maea ona la tuliina i le toese i Tafuna.

E silia i le 6 masina na taofia ai Taumaoe Fa’amasino ma Leoloa Fa’amasino i le toese ina ua faatoa faila e le malo lenei mataupu, ma ua maua ai le fa’amasinoga maualuga, ua lava le umi lea ua maea ona tuli e le ulugali’i i le toese e fai ma la fa’asalaga i lenei mataupu.

Na tau fai fa’atoese uma le ulugali’i i le faamasinoga e tusa ai o le mea sese sa laua faia, ma la talosagaina ai le fa’amasinoga mo se avanoa se’i tatala ai pea i laua i tua e faaauau le la tausiga i le la fanau.

Na taua e Taumaoe, 49 tausaga le matua e faapea, o le gaioiga sa ia faia ua mafua ai ona ia soli le tulafono ma ua ia lagona fo’i le salamo i masina e 6 na taofia ai o ia i le toese.

E fa’apena fo’i i le fa’atoesega a lona to’alua o Leoloa, 48 tausaga lona matua, e le gata sa ia taua lona salamo e tusa ai o le mea sa tupu, ae sa ia taua fo’i le aoga o masina e 6 na taofia ai o ia i le falepuipui, ua ia a’oa’oina ai se isi lesona mo ia i lumana’i.

E leai ma se isi o i laua na faatoese i le la granddaughter sa la faapologaina po o ona matua fo’i.

Na finau le ali’i loia ia Joel Shiver na tula’i mo le ulugali’i e faapea, talu ai o i laua nei sa tutupu mai i le auga tupulaga lea ua amata ona matutua i le taimi nei, e atagia mai ai o le auala lea sa a’oa’oina ai e matua a latou fanau i lea augatupulaga, o le sasa ma fa’atonu ina ia usita’i, ma ua manatu ai i laua nei, o le auala lelei lea e a’oa’oina ai le la fanau, ae ua avea ma itu ua la soli ai ma le tulafono.

Na faaiu le faafinauga a Shiver i lona talosagaina lea o le fa’amasinoga ina ia nofovaavaaia i laua nei, ae aua ne’i toe tuuina atu i ai se isi fa’asalaga fa’a falepuipui, ae na taua e le loia a le malo e faapea, tusa lava po o le a le auala e a’oa’i ai e i laua ua molia le teineititi na aafia, e le tatau lava ona la soli ai le tulafono.

Na faailoa fo’i e le loia a le malo ia Tony Graf i le faamasinoga e faapea, o lo o manino i le ripoti a le Ofisa Nofovaavaaia le faamatalaga a Taumaoe, e oo mai lava i le taimi na fesiligia ai o ia e le Ofisa Nofovaavaaia, na te le o iloaina pe aisea na loka ai fua o ia e leoleo i lenei mataupu, ae o ia sa ia aoaoina lona afafine (granddaughter).

I faamaumauga a le faamasinoga, o lo o taua ai le titina e Taumaoe o le ua o le teineititi na aafia, ina ua asiasi atu ni faiaoga mai le aoga sa aoga ai le teineititi, ma fesiligia i laua i le mafuaaga o unaoa e tele sa maua i le tino o le teineititi na aafia.

Na taua e Graf e faapea, ua lava ma totoe le gaioiga a Taumaoe sa faia e ta’u mai ai le matuia o aafiaga sa oo i ai le teineititi na aafia.

E tolu moliaga o le faaoolima i le tulaga lua na molia ai e le malo Taumaoe, ae tasi le moliaga o le faaoolima i le tulaga tolu sa molia ai Leoloa. Sa molia fo’i i laua i moliaga taitasi o le faia o gaioiga e ono lamatia ai le saogalemu o fanau laiti, ae i lalo o se maliliega na sainia e i laua ua molia ma le malo, sa la tali ioe ai i moliaga mama ta’ilua, o le faaoolima i le tulaga tolu atoa ai ma le faia o gaioiga e ono lamatia ai le saogalemu o fanau laiti, ae solofua e le faamasinoga isi moliaga sa totoe ai i le pepa o tagi.

Na ta’utino Taumaoe sa ia titina le ua o le teineititi na aafia, ae na ta’utino lona to’alua sa ia sasa le tino o le teineititi ma mafua ai ona unaoa uma vaega o le tino, ae sa musu e ave o ia i le falema’i mo ni togafitiga.

O le teineititi na aafia e pei ona taua e le itu a le malo, ua i ai nei o ia i Amerika i lona uncle, le tuagane o lona tina.