Ads by Google Ads by Google

FA’ALAUILOA OLAGA SAMOA TOTONU SAINA E ALA I SE ATA TIFAGA

O le faalauiloaina o le soifuaga o lo o soifua ma ola ai tagata Samoa i totonu o Amerika Samoa nei, e pei o le gaseseina o taumafa i aso fai soo, o tu ma aga masani a aiga Samoa, faafiafiaga i aso faapitoa, atoa ai ma le lanu lauava o ona atu falega, o le autu lea o se ata o lo o taumafai se kamupani televise mai Saina e taua o le NHJ Television Company e pu’eina i totonu o le atunuu ma le faamoemoe e faalauiloa atu i totonu o Saina i le masina o Iulai 2103.

 

O le vaiaso nei na taunuu mai ai i Amerika Samoa le Faatonu o lea kamupani televise, faatasi ai ma se ali’i pu’eata mo le tu’u faatasia o lenei faamoemoe.

 

O le tama’ita’i Faatonu ia Takako Matsumoto na toe malaga ese atu ma le atunuu i le po o le aso Tofi na te’a nei, ae o le ali’i pu’e ata ia Jackie Hirai o lo o i ai pea o ia i le atunuu ma le faamoemoe o le aso 3 Iuni, 2013 e toe tu’u vaa ese atu ai i Hawaii ma agai atu loa i Saina.

 

Na taua e Hirai i le Samoa News e faapea, o le ata o lo o taumafai le latou kamupani e tuu faatasia i Amerika Samoa nei, o le ituaiga soifuaga o lo o soifua ai aiga Samoa faavae i lana aganuu, ona ua aave tala i le matagofie o tu ma aganuu a Samoa e ala i tala o lo o faasalalau i upega o tafa’ilagi (website) i soo se vaega o le lalolagi, ma ua latou iloa fo’i le ta’uta’ua o tagata Samoa i taaloga ona o le tino malolosi.

 

O le fesili pe na faapefea ona a’e se manatu e avea Amerika Samoa ma nofoaga e afua atu ai le latou ata tifaga o lo o tau tuu faatasia i le taimi nei, na taua ai e Hirai e faapea, o le alii Hawaii-Samoa o lo o ta’uta’ua i Saina i le taaloga o le Sumo, le susuga ia Konishiki, o ia lea o lo o avea ma ave fu’a a Hawaii-Samoa i totonu o Saina, ma ua latou manatu ai e fia pu’eina talaaga o atunuu ia e lua na tupuga atu ai lea alii ta’uta’ua.

 

“E le gata o le a aofia ai tu ma aganuu a Hawaii i le isi vaega o le polokalame lenei, ae o le a faapea fo’i ona aofia ai ma Samoa i le isi vaega,” o le saunoaga lea a Hirai.

 

“O vaega o le a aofia ai Samoa e mafuli lea i tu ma ana aganuu e pei o pese, aua o pese a Samoa e mafuli i pesega faaleaganuu, o le a aofia ai fo’i ma le soifuaga i aso fai soo e pei o le gaosiina o ana taumafa, olaga galulue o tagata atoa ai ma le ituaiga olaga (life style) e fiafia lava tagata Samoa e ola ai i aso uma,” o le isi lea tala a Hirai.

 

Fai mai Hirai, o lea ua toe malaga atu le latou Faatonu ia Matsumoto e feiloa’i ma Konishiki i Hawai’i mo le pu’eina o le isi vaega o le latou polokalame, ona malaga mai ai loa lea o le alii lenei i Amerika Samoa nei i le vaiaso fou mo le faaauauina o le isi vaega o le ata tifaga.

 

O le afioaga i Tula lea o lo o mafuli i ai le faamoemoe o le NHJ Television e fia pu’eina ai vaega o le latou polokalame, ona o iina lea o lo o taua e tupuga mai ai le aiga o le alii o Konishiki.

 

I faamatalaga o lo o mai luga o le ‘Wikipedia’ e faatatau ia Konishiki o lo o taua ai e faapea, o le alii lenei o Konishiki Saleva’a Fuauli Atisano’e, o se alii Samoa na soifua a’e i Hawaii, ma o ia le ulua’i tagata taalo Sumo e le o se Saina na ausia le vaega pito i maualuga i le taaloga Sumo.

 

O le tausaga e 1982 e oo mai i le 1997 na taalo ai lenei alii i le taaloga Sumo, ma faatolu ai ona avea o ia ma siamupini i le lalolagi. O lo o faamauina foi i faamaumauga e faapea, o ia le tagata pito i mamafa ua taalo i le taaloga lenei o le Sumo, i pauna e 630, tusa lea o le 287 kilo.