Ua mae’a fa’atulaga le vaiaso mo le Coastweek a le Matagaluega o Fefa’ataua’iga ia Setema 14 - 26, 2015 ae e i ai lona fa’amutaina i le masina o Novema, lea e faia ai loa le ma le tu’uga fautasi.

O le manulauti o lenei tausaga ua fa’ailoa ai le so’otaga o le Ola Laulelei i le va o Tagata, le Laufanua, le Sami ma le Ea.

O lea vaitaimi atoa, o le a fa’atautaia ai polokalama eseese, mo le fanau a’oga, e ala lea i ni a’oa’oga fa’apitoa e fa’ao’o atu i potu a’oga, ma o le a fa’atino fo’i e i latou nisi o galuega e fa’ailoa ai lo latou fiafia i le tatou gataifale ma ona sosia.

O le amataga o le vaiaso mo le Coastweek e fa’aoso ai lava tu’uga alo paopao, ma ua fa’ailoa mai ua i ai matagaluega o le malo ua mae’a kolenia a latou ‘au alo paopao mo lea fa’amoemoe.

E mae’a uma tu’uga i le aso 15 Setema, peita’i, e le’i fa’amautuina uma mea e ono fa’atino mo le vaiaso atoa i le taimi nei, aua o lo’o fetogia’i lava le tele o fa’atulagaga i le va o le DOC, o isi matagaluega ua latou soalaupule mo le fa’apolokalama fa’ataoto mo le fa’amoemoe atoa, ae maise ai kamupani tua.

Peita’i, e le gata i nei kamupani a’o le vaega fo’i o matagaluega a le malo e aofia ai le Matagaluega o le Vaomatua ma le Gataifale [DMWR] lea ua latou ofo mai e fa’atautaia le tu’uga alo paopao.

O le Matagaluega o Tupulaga & Tama’ita’i ua latou ofo mai e fa’atautaia le aso fa’apitoa mo aiga i le Malae o Suigaula lea e fa’amae’a ai le vaiaso ia Setema 26, ma e tele fo’i ta’aloga eseese ma mea e fa’afiafiaina ai le fanau fa’apea ma tausami o lea aso.

O le matagaluega o le Puipuiga Saogalemu Lautele, [DPS] ua latou fesoasoani mai mo le tele o le puipuiga i luga o le sami i taimi o le tu’uga paopao ma le saogalemu fo’i i taimi e fa’atasia ai le to’atele o le atunu’u mo le vaiaso atoa, ae maise o le vaega fuimu lea ua latou fa’ailoa mai e saunia fa’ase’e vai mo le fanauiti i le aso fa’apitoa i le matafaga i Utulei.

I le taimi nei ua matauina le tau fai kolenia o ‘au alo paopao ta’itasi i gatai o le Sadies by The Sea i Utulei i afiafi ta’itasi, aua ua fa’ailoa mai e nisi o ‘au nei, “E le fia tulua fo’i le matou va’a! O le mua lava e tausinio uma i ai.

O le fa’ai’uga o le Coastweek 2015 ua fa’atulaga e faia ia Setema 26 i le fa’atasiga atoa a aiga i le Malae o Suigaula a le Atuvasa i Utulei lea ua fa’atulaga e amatalia i le 12:00 i le aoauli ae fa’ato’a tapunia i le afiafi i le 4:00, ona soso’o ai lea ma le fa’aaliga o tausami eseese mai le sami mai le itula e 5:00 se’ia pa’ia le 7:00 i lea lava afiafi.

Manatua o ‘au alo paopao nei e fa’aulu, ua talia uma lava so’o se ‘au e tu’ufa’atasia mai e afio’aga, kamupani tumaoti po’o matagaluega o le malo.