E talitonu ni isi o le aufai fa’atoaga aemaise ai le atunu’u o lo o i ai a latou tama’i maketi e fa’atau ai fua o fa’atoaga i luma o a latou maota ma laoa, e leai se malosi o le malo e taofia ai i latou mai le fa’aaogaina o a latou meatotino e saili ai a latou tupe, aua o meatotino sa fausia i a latou lava tupe, o lo o fa’atutu fo’i i luga o a latou lava fanua.

O le mataupu lenei ua lagalaga ai finagalo mai ni isi o le atunu’u, e mafua mai i le fa’aiuga lea ua faia e le Fa’atonusili o le Matagaluega o Fa’atoaga a le malo, e aveese mai ai le fualaau ‘aina o le kapisi saina mai le toe fa’atau atu i le mamalu o le atunu’u, ina ua fa’amaonia i suesuega le tele o le a’afiaga i ni isi o kapisi saina sa suesueina e le Ofisa o Fa’atoaga i le vaiaso na te’a nei.

“Afai ua faamaonia le aafia o kapisi saina a tagata Asia o lo o la’u i le School Lunch, ua talafeagai la le taofi o le toe fa’atau atu o kapisi na i le atunuu, ae o le taofi atu ai fua ma a matou kapisi saina e le o aafia i ni fa’ama’i, o se faaiuga ua le talafeagai tele”, o le saunoaga lea a le tina o Lili Tupuana’i o Malaeimi.

Na taua e Lili i le Samoa News i le fa’aiuga o le vaiaso na fa’apea, o le vaiaso na te’a nei na aga’i atu ai sui o le Ofisa o Fa’atoaga ma taofi le toe fa’atauina o ana kapisi mai lana tama’i maketi i luma o lona fale ma le fa’aupuga, ua tele le anufe ua aafia ai kapisi saina, ma ua faatonuina le le tatau lea ona toe faatau se kapisi saina i so o se vaega o le atunuu.

Na taua e Lili i le Samoa News, na te le fa’aaogaina ni vailaau e tausi ai lana fa’atoaga laau ‘aina, e mautinoa fo’i la e le a’afia i ni fa’ama’i.

Na fa’aalia fo’i e le alii fai fa’atoaga ia Vincent Ropati o Pava’ia’i lona le lagolagoina o le faaiuga a le Ofisa o Fa’atoaga, e taofia ai le toe fa’atauina atu o ana kapisi saina i luma o lana tama’i maketi.

“Afai ua faamaonia le aafia o kapisi saina a tagata Asia, taofi na o kapisi a le tagata Asia, ae le o le aafia atu ai fua ma nai a matou fa’atoaga o lo o saili ai ni tupe mo le aiga”, o le saunoaga lea a Ropati.

Na fa’amaonia mai e le Fa’atonusili o le Ofisa o Fa’atoaga a le malo ia Lealao M. Purcell i le Samoa News i le faaiuga o le vaiaso nei, lona faia o le faaiuga e taofia ai le toe faatauina atu o le fualaau ‘aina o le kapisi saina i so o se vaega o le atunu’u, ina ua maua i a latou suesuega le aafia o kapisi saina a se alii fai faatoaga mai Asia i le anufe, i se latou asiasiga sa faia i le vaiaso na te’a nei.

O kapisi saina uma lava o lo o fa’atauina i tafatafa o le auala e aofia ai ma uta o lo o kiliva i faleoloa, ua taofia uma e le Ofisa o Fa’atoaga, ae se’i fa’aauau a latou suesuega mo le puipuia o le soifua maloloina o le atunuu.

Na taua fo’i e le ali’i Fa’atonusili e fa’apea, e ui e taua atu le tupe e tausi ai aiga, ae sili ai le taua o le saogalemu o tagata taitoatasi.