O le aso Faraile na te’a nei, sa fa’atulaga i le a’oga maualuga i Leone, e faia ma aso e toe fa’ailoa ai i le fanau le Aganu’u a Samoa sa soifua mai ai ona tagata, ma e ao ina fa’aauau.

O le ‘autu o lea aso sa fa’ailo, “Ia Taofi mau lau Aganu’u ne’i se’e Fa’ai’a o le Tai.” E fa vaega na vaevae ai le a’oga atoa i ona vasega e amata mai le 9 se’ia o’o i le vasega 12. Na fa’atulaga fo’i mea uma e lautogia ai i latou ma tauaofia ai togi mulimuli e saili ai le vasega manumalo i lenei tausaga.

O le ulua’i taumafaiga sa lautogia ai i latou o le umu, e tapena ai le “fa’ausi talo.” E ta ane le itula e 8:00 i le taeao, ua leva ona nofo sauni le fanau i a latou toniga lautogia mo le latou Savali Fa’aaloalo, e amatalia ai le polokalama fa’ataoto.

I se va’aiga lautele, sa matele toniga sa fa’aalia mai vasega e tolu o le a’oga maualuga i le toniga lava a le a’oga, ae fa’aopoopo i ai le sei pua taunofo po’o sei fugala’au matagofie lanu papa’e e fa’apaleni ai le va’aiga lautele, ae o le vasega 11, sa mata’ina le latou savaliga, ona o le toniga lanu samasama le i’e ae pa’epa’e le mitiafu ma le ofutino o tama’ita’i, toe keke atu i ai ma le fusi Siapo Samoa e fa’amau ai le sulugatiti.  E mautinoa o le isi lea togi fa’aopoopo sa maua e le Vasega lea.

Ina ua nofoia le lotoa i lona malae mo lea aso fa’ailogaina, sa mua’i tula’i le susuga le Faife’au Tanuvasa ma molita’i le vi’iga ma le fa’asao i le Atua ua taunu’u lea fa’amoemoe. Soso’o ai le lauga fa’afeiloa’i mai le Taiulu o lea a’oga, soso’o ai ma ta’aloga fa’asamoa sa lautogia mo le aso.

O le tauvaga lalaga ma’ilo, tauvaga o’a popo ma valu toe tatau le pe’epe’e, lalaga o laupola e molita’i mai ai sua talisua i fa’aaloaloga fa’asamoa, ma sa fa’apea loa ona pasi mai le fa’ausi na tapena e vasega ta’itasi, ina ia tofoina e le vasega o Fa’amasino Lautogia mo le latou fa’atulagaga o lea vaega o le tauvaga, ae mo le mamalu lautele na aofia, mo se tausamiga e tatalia ai toe fa’afiafiaga o le aso iloga o aganu’u a Samoa.

O Ma’uluulu ma Siva fa’asamoa fa’atasi ai ma le Taualuga sa tauva i ai Taupou filifilia a vasega ta’itasi, sa aofia i le tauvaga. Ina ua mae’a fa’afiafiaga uma ona taualuga loa lea o le aso fasamoa e le taualuga a le Tausala o le Taumafai a Leone High, Miss Jadine Laumoli, ma le ‘ai’aiuli a le Manaia o le Taumafai a Leone High, Mr. Tofili Peniamina.

I le vasega lava ia o Taupou sa tauva mai vasega ta’itasi, ua mautinoa ai, na tulaga muamua le taumafaiga a Taupou Kulia Talofa o le vasega 11 i lenei tausaga.

O laugatogi o taumafaiga uma a le fanau a’oga i Leone na fa’ai’u ai le aso ma sa fa’ailoa mai ai: Vasega ua Togisilia i lenei tausaga: Vasega 11, Vasega tulaga lua: Vasega 10, Vasega tulaga tolu: Vasega 12 ma le vasega mulimuli o le vasega 9.