O lo o fa’agasolo i le vaiaso nei i luma o le fa’amasinoga maualuga le fa’amasinoga autu o se ali’i ave taxi, o lo o tu’uaia e le malo i lona taumafai lea e faia ni uiga mataga i se tama’ita’i sa ti’eti’e i lana taxi i le vaveao o le aso 3 Aokuso 2013.

O moliaga mamafa e lua o loo tu’uaia ai e le malo le ali’i o Tamiano Tino e aofia ai le taumafai e tagofia itutinosa o se tama’ita’i, atoa ai ma le moliaga o le gaoi, i lona ave fa’agaoi lea o le tupe e $180 a le tama’ita’i na a’afia.

Sa i ai le fuafuaga o le mataupu a Tino e fofogaina lea i luma o tagatanu’u e filifili mai e le fa’amasinoga latou te iloiloina se fa’aiuga o lenei mataupu, ae ina ua oo mai i le vaiaso nei, na toe suia ai e le itu tete’e la latou talosaga, ina ia tu’u atu le mataupu a Tino e fa’amasino ina e ali’i fa’amasino o le fa’amasinoga, le fa’amasino sili lagolago ia Lyle L. Richmond faapea ai ali’i fa’amasino lagolago ia Mamea Sala Jr ma Tunupopo Alalafaga.

O ulua’i molimau e to’alua sa valaauina e le malo i le taeao ananafi, e aofia ai le tama’ita’i na a’afia, fa’apea ai ma lona to’alua, o ia fo’i o se ali’i leoleo.

Na taua e le tama’ita’i na a’afia e fa’apea, e ui sa ona i le po na tula’i mai ai le fa’alavelave, peita’i sa ia malamalama uma lava i gaioiga sa tutupu, e aofia ai lona fai atu lea ia Tino e momoli o ia i le Ofisa o Leoleo i Leone, peita’i sa fa’aauau pea lava le alu a le ta’avale a Tino i le auala i Malaeloa.

Na taua e le molimau i leoleo e fa’apea, i le mae’a ai o se latou tafaoga ma ana uo i le vaveao o le aso 3 Aokuso 2013, sa aga’i atu ai loa i le fale’aiga o le McDonald’s i Tafuna ma aai ai, ina ua mae’a, sa vili loa sana taxi e alu ai i lona aiga i Leone, lea na alu atu ai le ta’avale a Tino na momoli o ia.

Na taua e le tama’ita’i na a’afia i leoleo le fa’afuase’i ona moe i totonu o le ta’avale, ae na te’i ina ua ia fa’alogoina se tagata o lo o mamafa atu i ona luga, ae ina ua ala i luga, sa ia vaaia ai le ali’i ave taxi o loo taumafai e kisi atu ia te ia.

Na taua fo’i e le tama’ita’i na a’afia i leoleo e fa’apea, ina ua musu le ave taxi e momoli o ia i le mea sa mana’o i ai, sa oso ai loa i fafo ma lana ta’avale ina ua alu lemu le ta’avale i luga o le auala.

Na fesili le loia a Tino o Joel Shiver i le tama’ita’i na a’afia, pe moni na te le o manatuaina foliga o le ave taxi sa taumafai e faia uiga mataga ia te ia, na tali le molimau, “sa ou manatuaina i le taimi na fesiligia ai a’u e leoleo.”

O le molimau lona lua a le malo sa valaau, o se ali’i leoleo, o ia o le uo tama a le tama’ita’i na a’afia, ao lea ua avea nei i laua ma ulugali’i ina ua tu’u fa’atasia i laua i le Sakalameta o le Faaipoipoga.

Na taua e le ali’i leoleo i lana molimau e fa’apea, i le mae’a ai o se latou tafaoga ma lana uo teine faapea ai ma isi o a laua uo i le Bowling Alley i le po na tula’i mai ai le fa’alavelave, na latou aga’i atu ai loa i le McDonalds mo sina meaai.

O se feeseesega laititi i le va o ia ma lana uo teine i le po lea, na mafua ai ona ia le iloa le taimi na alu ai lana uo teine i le fale, ona alu fo’i lea o ia i lona fale i Ottoville ma malolo ai, ae na te’i ina ua tatagi lana telefoni i le taeao na sosoo ai, ma ia vaaia ai o le Ofisa o Leoleo i Leone o lo o vili atu, fai mai e alu atu i le Ofisa latou te talanoa ai i se mataupu e fa’atatau i lana uo teine.

Na taua fo’i e le alii leoleo e faapea, e i ai isi numera sa vili atu i lana telefoni, ae na te le iloaina poo ai e ana ia numera, sa pau le itu sa ia iloaina, o se tasi o feau (message) sa ia maua i totonu o lana telefoni, o se feau mai lana uo teine, o loo ita atu ia te ia ma fai atu o ia lea ua savali i le latou fale.

Na fesili Shiver i le ali’i leoleo pe na te iloa tonu le taimi na vili atu ai lana uo teine ia te ia ma tuu atu le feau i lana telefoni, na tali le molimau “ou te le manatua,” Sa toe fesiligia e Shiver le molimau pe na te iloa le tagata e ana le numera sa vili atu i lana telefoni, na tali le molimau “ou te le manatuaina.”

Na toe fesili Shiver i le molimau poo ia manatua lana tala sa fai i leoleo, e fa’apea na te iloaina o le numera a Tamiano [Tino] lea na vili atu ai lana uo teine i le 4:50 i le vaveao, ae na tali le molimau “ou te le manatuina.”

Na siisii le leo o le ali’i loia fautua o loo tula’i mo Tino ma fa’apea atu i le molimau, “O le uiga la o lau molimau atoa, e ui o lau uo teine lea na tula’i mai ai le fa’alavelave, ae leai ma se isi o ana uo na vili atu ia te oe e fa’ailoa atu le mea sa tupu, e leai fo’i sou popole e te toe vili i ai ina ua e ala a’e i luga o lo o i ai telefoni ese sa vili atu i lau numera,” o le avaavau atu lea a Shiver i le ali’i leoleo ae na fa’apea atu i ai Richmond, “Lau susuga i le loia, pei lava ua e tau leo tele i le molimau,” o lea na toe fa’amalie ai Shiver i le molimau ma fai atu i ai, “E te alofa i lau uo teine,” na ata le molimau ma tali mai, “O lea lava.”

O le itula e 9:00 i le taeao nei e toe fa’aauau ai lenei mataupu i luma o le fa’amasinoga maualuga.