Ina ua taunu’u Tagiilima i le ta’avale lea e fa’atali mai ai Lameko, na ona tapuni lava o le faitoto’a liliu ane loa i a Lameko, “Lameko, talofa e, i si a’u tama, ua pei ua ta tu’ulafoa’i atu na o ia.” Na ‘ata’ata Lameko ma fa’apea ane, “Tagi, tu’u le teine e alu, e le o se mea leaga lea e alu i ai, ae ia e loto tele. Va’ai oe, e le mafai ona maua e le ta fanau se olaga taumafai, ona o lo’o e pipi’i mau pea i o latou lima, tu’u tamaiti e o, tatou te le mafuta pea, e sau le aso, o le a le finagalo o le Atua i a ta’ua, ae ua maua e tamaiti le lumana’i manuia e ola ai latou, tu’u tamaiti e o e saili so latou lumana’i.” Ua soloi mata o le lo’omatua ma fa’apea ane, “Ioe Lameko, ou te malamalama i lau tala, ae va’ai fo’i oe, ua mautu galuega a tama, a’o si a’u tama teine o Loimataoapaula, e lagona lava le popole o lo’u loto, ona e le ma iloa le finagalo o le Atua i a te a’u, ae o le a fa’afefea si a’u tama e pele i lo’u loto.”

Ua le toe talia e Lameko le tala a Tagiilima, aua ua iloa lelei e le toeaina e so ona lafo lava e Tagiilima tala i lana tama teine ona o le a’oa’i ma fa’atonu, a’o totonu o lona loto ua na o Loimata lava.

Ua fai nei le talatalanoaga a Tagiilima ma Lameko, e pei ua fou i a la’ua lea tulaga, ae ai fo’i ona o le suiga ua i ai i lea taimi, ua o ‘ese fa’atasi mai le fale, ma ua o fa’atasi i le ta’avale. Na afe nei le ta’avale a Lameko, i se tasi o fale’aiga mo se malu taeao, e le i sao i le mafaufau o Tagiilima lea tulaga, na fesilisili nei i a Lameko, “O fea o le a ta o i ai?” O le fesili ane lea a le lo’omatua. Na tali le toeaina e fa’apea, “Se i fai se ta ti o le taeao, ma se’i e matamata fo’i i le manaia o le fale’aiga latou, ona ou alu ai lea e momoli oe i le fale.”

E le i uma le tala a le toeaina, ae fa’asalavei e le lo’omatua, “O, manaia, o le mea la lea e fai nei e oe i taeao uma, o lou sau e te inu ti i le fale’aiga, letioa a ta tigaina e fai au ti i taeao, ae e fai mai o le a e tuai i lau galuega, ona o lea la, e te inu ti i le fale’aiga. Se ou te ofo a’u Lameko i au faiga. E tau fa’asoasoa mea o le ta aiga, ona o le tele o fa’alavelave o lou aiga, ua tau sau ai lo’u fi’u, a’o lea e te sau e inu ti i le fale’aiga, se o mea na e fai e papalagi. O le Samoa na ola a’e lava o le koko Samoa ma le ‘ulu ma’alili uma le aso, letioa lava la lau fanau ali’i, lea o oe e mafua ai.”

Ua ‘ata’ata Lameko ma lulu lona ulu, “Se Tagi, o aso nei o le malamalama se e te sau lava oe mai tua, ia e malamalama lelei i la’u galuega lea ou te i ai nei, matou te feiloa’i ma tagata i falea’iga e fai ai a matou fonotaga.” Ua le tautala le lo’omatua i lea taimi, ua na o le fa’alologo o ona taliga i le fa’amatalaga a lona to’alua lea e fai ane ia te ia. “Va’ai oe le lo’omatua, e tatau ona e fiafia, o lea ua ta o mai, se’i e tofo i le kuka manogi a le falea’iga, ona e alu ai fo’i lea e te fa’asagasaga i lau fa’atoaga i le aso atoa.” Na toe tali le lo’omatua e fa’apea, “Lameko, ou te malamalama lelei i le tulaga o lo’o i ai lau galuega, ae va’ai fo’i oe le toeaina, o mea lava fa’apenei e tilotilo atu ai i le isi lo’omatua, a le o le na fo’i, ia o se fogaumi e talavou, ona te’i lava lea ua e alu ma e alu atu ai lava, ae tia’i a’u ma si a’u fanau.”

Ua ‘ata Lameko ma tilotilo ane i si ona to’alua ua silia ma le 30 tausaga o mafuta pea, e leai se mea e tasi e fa’aletonu o le la mafutaga. “Tagi, va’ai oe si o’u to’alua, e pele lava oe i a te a’u i mea uma lava, ua siliga fo’i na tulaga, ua ta matutua, se ua na o oe i lo’u loto ma lo’u fatu, uma mea uma o le olaga lenei.” Na tilotilo ane nei Tagiilima i a Lameko, “Meko, ia e mafaufau lelei ma e saga mafaufau loloto i le ie na au mai i a Timena ma le Aualuma, o lea lava ou te teuina, ia e toaga la e teu lelei mai le ta va fealoa’i.”

Ua ‘ata Lameko ma tilotilo ane i lona to’alua o Tagiilima, ua na o le lulu o lona ulu. le toeaina ona sa i ai lona manatu, tau lava o sina ipu ti e fa’amatagofie atili ai le taeao ma sami ai fo’i le a’e o si a la tama i le Kolisi, a ma’ea, ona alu ai lea e toe momoli le lo’omatua i lana fa’atoaga, a’o lea ua utia i le va lea.

E fou i le olaga o Tagiilima lea faiga ua fai nei e Lameko. O le tele o taimi e mo’omia ai le la o fa’atasi ma Lameko, ona o mea e fai a le ofisa, e lulu mai o le ulu o le  lo’omatua. Ua sili i a Tagiilima ona nofo i le fa’atoaga e fai le lafo ma vele le ma’umaga na i lo le fa’ama’imau o lona taimi i ia mea. E alu a la le solo a Lameko na o ia, a le o le na fo’i, e o ma se tasi o lana fanau tama.

Na saofafa’i ifo nei i le la laulau ma ua alu atu le teine e ‘okaina mea’ai. “Oi, talofa lau susuga Lameko, ua leva ona tau mai lau susuga?” Ua na o le ‘ata’ata o le toeaina ma tali ane i le teine faigaluega. E le i umi, ae savavali atu isi tagata i totonu o le fale’aiga, ma o latou iloa ane Lameko, ona fa’atalofa lea i ai.