O le taeao ananafi sa fa’atautaia ai le fa’au’uga o le to’a 58 o sui mai le TAMM - Toe Afua Mai Matua, lea ua so’otaga nei ma le Matagaluega o A’oga a le tatou Malo, ina ia avea i latou o faia’oga fa’apitoa mo le aoaoina o fanau a’oga o le atunu’u i le Mataupu fa’apitoa o le “Amio Pulea ma le Soifua Feavata’i” i totonu o a’oga.

O lenei so’otaga, ua iloga lona aoga tele, ma ua maua ai nei faia’oga agava’a, aua o i latou o matua o fanau, ma ua latou iloa foi uiga fa’aalia o fanau i mafutaga i totonu o aiga.

 Peita’i, ina ia fa’aauupegaina i latou mo nei mataupu fita i mafutaga a fanau a’oga i taimi o latou a’oga, ua toe tapuia ai lo latou tomai i le “va fealoa’i” ina ia mautu lo latou iloa, e fesoasoani ai i fanau, ia tausia le filemu i taimi a’oga, ae maise fo’i o taimi e mafuta ai ma fanau a’oga mai isi a’oga uma i le atunu’u.

I le saunoaga a le Fa’atonu o A’oga, Vaitinasa Salu Hunkin Finau, sa fa’ailoa lona taofi, “O le amio pulea ua masani ai le tagata Samoa, o le mataupu autu lava lea ua avea ma tou mataupu tau’ave i totonu o a’oga, ou te iloa, ua leva ona fa’amau fa’ailoga ai outou uma lava o matua.”

Sa ia saunoa fo’i e tusa ma le ese ai lava o lea fa’au’uga nai lo fa’au’uga uma, “Aua o fanau a’oga e talavou, pe latou maua ni tusi pasi ua fiafia, aua ua ausia se tapula’a fou, ae o le vasega lenei, ua leva ona savalia le la’asaga lea ua toe a’otau pe toe fafagu atu i le a’oga fa’apitoa lenei.”

O ali’i ma tama’ita’i faia’oga sa latou toe tapuia le tomai tau le amio pulea ma le va fealoa’i mo lea vasega, o nisi ua ofoina mai le latou tautua, e aofia ai Peseta Tialuga Seloti, Judy Mata’utia, Mona Uli, Tina Ta’aga, Rona Talaeai, Frances Thomsen ma Maria Tuato’o o le DOE Guidance & Counseling.

O a’oa’oga sa fa’atautaia mo le 40 itula lea sa latou faia ai vasega e fa’alua i le vaiaso i vasega ta’i 4 itula le umi. O le lona tolu ai lea o vasega a le TAMM/DOE ua mae’a fa’ai’u manuia  a latou taumafai, ma ua aga atu e fa’atautaia o latou tiute i totonu o a’oga eseese a le Malo lea e aotelega fa’atasi ai Aoga tulaga muamua ma A’oga Maualuluga i le teritori.

O ulua’i fa’au’uga e lua, ua fa’ailoa mai e le Ofisa autu o le TAMM i Utulei, “Ua silia ma le 160+ o i latou ua mae’a fa’au’uina mai ai mo galuega tima’i i fanau aoga, ae a fa’aopoopo atu i ai ma lenei to’a 58, ua tulaga lelei mai le ta’avea o lea kosi fa’apitoa i totonu o a’oga.

Mai le tina o Mataoavii Sivia, ina ua taua’aoina lona tusi pasi ma ua fa’ailoa mai lona taofi, “E matagofie lenei lagona, aua ua iloa fo’i ua agava’a i se auaunaga e ao ina fesoasoani ai i le fanau ma le latou tauiviga ai i totonu o a’oga. E le faigofie le tiute, ae fa’amoemoe lava i le alofa mai o le Atua, e fa’afaigofie ai loto o fanau.”

O le sauniga lava latou, o se sauniga o le fa’afetai mai le vasega fa’au’u, ae o le fiafia fo’i o le tama’ita’i Fa’atonu o A’oga, aua e le faigofie le mataupu tau le nofo lelei ma amio pulea o fanau a’oga i tausaga ua tuana’i.

O lana saunoaga, “O le vaifofo lenei ua mae’a soalaupule e ao ina fa’atino e le Matagaluega o A’oga, ua toe tuu atu matua matutua i totonu o lotoa a aoga, ia toe tapui mai lava amio a fanau.”