Ads by Google Ads by Google

VAVAU A SAMOA: O LE TALA IA LEAIFALE’AVA MA LONA AFAFINE

vaega #2

 

E fetaui lava le ala a’e o le teine o Leauta i luga ae ona vaaia loa ata o le aso fou ua tafa mai, ona ia fafagu loa lea o lona tama ma toe sauni loa e fa’aauau le la savaliga, e fetaui lava le ao ane ae taunu’u loa le la savaliga i le nuu ua fa’aigoaina nei o Iva, ma le vaai atu o le tamaitai, o lo o momoe lava tagata o le nu’u ae ua leva ona ao, ua amata fo’i ona alu a’e le la i luga, ona fai atu lea o le tamaitai i lona tama, “se’i vaai atu ia i tagata o le nuu o lo o momoe lava ae ua leva ona ao”, ona ata lea o le toeaina ma fai atu i lona afafine, fa’aigoa la le nuu lenei ia Iva moe loloa, o le mafua’aga lena fai mai ai ni isi o le atunu’u na mafua ai le gao o le afioaga o Iva e oo mai i aso nei, ona o le malaga a le toeaina ma lona afafine.

 

Ua fa’aauau pea le malaga ma taunu’u atu loa i le afioaga ua igoa nei o Salelologa, lea fai mai le talitonuga na fai atu ai le toeaina i lona afafine, e soia le soona leo tele leaga e “sa le Lologa Pule” i totonu o le eleele lea, ma mafua ai loa ona maua le igoa o Salelologa. Ua taunu’u le malaga a le toeaina ma lona afafine i Palauli i le pitonuu ua igoa nei o Vaitoomuli, ma vaaia ai e le tamaitai se tamaloa o lo o tu i totonu o le nuu ma tau valaau i tagata o le nuu, e ona e fufulu le nofoi po o le muli (tulou le gagana) o le tamaloa o Lilomaiava. Na ata le tamaitai ma musumusu atu i lona tama e faapea, “sei vaai atu ia i le tagata lea e to’oto’o mai e tagata o le nuu lona muli i lalo o le vai”, ona faapea atu lea o le toeaina i lona afafine, “o le a fa’aigoa la le nofoaga lenei o Vaitoomuli, e fa’amanatu ai le gaioiga sa vaaia e le tamaitai. Ae manatua fo’i le malaga a le tamaitai ma lona tama lea o lo o alu, o le autu moni ua mafua ai ona la savalia lenei savaliga umi, o le fia taunuu lea i le nofoaga o lo o i ai le tama o Taemanutava’e lea o lo o fia fai to’alua i ai le tamaitai o Leauta, ae o le fa’atonuga sa tuuina atu i le toeaina ma lona afafine, afai la te taunu’u i le nofoaga ua faamoemoe e taunu’u muamua i ai, ona la saili lea o le laau o le Fau o lo o tu ai, ona la fetagofi lea e valuvalu ona a’a.

 

E lei umi ona fa’aauau le savaliga a le toeaina ma lona afafine ae la tau loa i le Fau, ona la fetagofi ane loa lea ua valuvalu ona a’a, ae na tete’i le toeaina ma lona afafine ina ua valuvalu atu a’a o le Fau ae tautala ane le Fau ia te i laua, ma o iina na maua ai le igoa o le Fau ua taua o le “Fau gagana”, fai mai, “A oo taeao, ona oulua o lea e sasa le ma’a le la e tuu mai o, ona tafe mai ai loa lea o le vaitafe. Fai mai le tala a oo ina tatafe alia ma to malolosi timuga, ona pa lea o le vaitafe ma tafetafea mai ai le lauulu o le alii o Taemanutava’e lea e faufau tane i ai le tamaitai o Leauta, ona fa’atonu lea e le Fau le toeaina ma lona afafine, a oo loa i le taimi e tafetafea mai ai le lauulu o Taemanutava’e, ona la fetagofi ai loa lea e noanoa lona lauulu i laau.