Na tuuaia e se toeaina e 64 tausaga le matua le tiapolo o Satani, o ia lea na mafua ai ona ia faia le solitulafono mataga faasaga i lona granddaughter e 6 tausaga le matua, lea ua mafua ai ona ta’usala o ia e le Faamasinoga Maualuga a Amerika Samoa.

E le o se taimi muamua lenei ua tuuaia ai e soo se tasi e molia i le soliina o le tulafono si tiapolo, o ia lea o le mafuaaga o faaosoosoga uma lava e aofia ai ma le faaosoosoina o i latou e soli le tulafono a le malo.

Na tagi ma loimata si toeaina a’o ia faamatala i alii faamasino le mafuaaga o lona soliina o le tulafono, ina ua maea ona tolaulauina se maliliega sa ia sainia ma le malo i le vaiaso nei.

Na taua e le toeaina i le faamasinoga e faapea, “Na ou to’ilalo ina ua faaosooina a’u e le tiapolo ma ou soli ai le tulafono, i le taimi a’o o’u faataeleina lo’u afafine.”

E le o mafai ona faalauiloa e le Samoa News le igoa o si toeaina matua lenei, ona o puipuiga lava i le ono mafai ai ona iloa le teineititi o loo aafia i lenei mataupu.

O le amataga o le tausaga nei na faila ai e le malo moliaga faasaga i le grandfather lenei, ina ua tofu atu i le ofisa o leoleo se tagi mai le aiga o le teineititi faasaga ia te ia, ma molia ai loa lenei tama i moliaga mamafa e aofia ai lona faia o uiga faa Sotoma i se fanau laititi, faia o gaioiga mataga faafeusuaiga faasaga i se fanau laititi, taumafai e faamalosi se teineititi, tagofia o itutinosa o se teineititi, faapea ai ma lona faia o ni gaioiga e ono lamatia ai le saogalemu o se teineititi.

I faamaumauga a le faamasinoga o loo taua ai e faapea, o le mataupu lenei na tulai mai i le va o le masina o Aokuso 2011, faapea ai ma le aso 6 Ianuari 2012 lea o loo taua na tulai mai ai le faalavelave mulimuli, a’o le’i tuuina atu i leoleo lenei mataupu mo a latou suesuega.

Ae i lalo o le maliliega lea ua maea ona sainia e le malo ma le toeaina ua molia ma ua talia foi e le faamasinoga, ua tali ioe ai le ua molia i moliaga mamafa e lua, o lona faia lea o amioga faa Sotoma atoa ai ma le faia o gaioiga mataga faafeusuaiga faasaga i se teineititi laititi.

Ina ua talia e le faamasinoga le maliliega na sainia e le malo ma le ua molia, na talosaga ai loa le faamasinoga ina ia solofua isi moliaga mamafa o loo totoe ai faasaga i le ua molia, lea foi na talia e le faamasinoga.

I se vaega o le maliliega a le malo ma le toeaina ua molia o loo taua ai e faapea, ua malilie loia e faatali le tuuina atu o ni a laua faafinauga i le faamasinoga mo se faasalaga mo le ua molia, sei maea ona saunia e le Ofisa Faanofovaavaaia se ripoti e tusa ai o le mea sa tupu, atoa ai ma se talaaga o le olaga o le ua molia.

Ae tusa lava pe ua sauni loia e finau i le faamasinoga mo se faasalaga mama mo lenei tama matua, ua ia malamalama ma iloa, e pule le faamasinoga pe talia pe teena faafinauga o le a tuuina atu e loia mo se faasalaga mama mo ia.

Ua ia iloa foi ma malamalama, o loo i ai i le faamasinoga le faitalia e faasala ai o ia i soo se ituaiga faasalaga e manatu le faamasinoga, e fetaui ma talafeagai ma le solitulafono ua ta’usalaina ai o ia, afai foi e tuuina mai se faasalaga a le faamasinoga ae le tau ai lona mana’o, e le mafai ona toe ave i tua lana tali ioe ua tuuina atu i le faamasinoga.

O le moliaga o le faia lea o amioga faa Sotoma, o se solitulafono B i le faatulagaina o solitulafono mamafa, lea e mafai ona faasala ai se tasi i le toese mai le 5 e oo atu i le 15 tausaga le umi, ae o le moliaga o le faia o gaioiga mataga faafeusuaiga, o se solitulafono C i le faatulagaina o solitulafono mamafa, lea e mafai ona faasala ai se tasi i le toese mo le umi e le silia ma le 7 tausaga, poo le faasala foi i le salatupe e le silia i le $5,000, ia poo le faasala foi i faasalaga uma ia e lua.

O loo taofia pea i le falepuipui i Tafuna le ua molia e faatali ai le aso 5 Oketopa lea ua faatulaga e lau ai lana faasalaga, ina ua le mafai ona ia totogiina le tupe e $100,000 na faatulaga e tatala ai o ia i tua mai le toese.

O le alii loia fautua ia Mike White o loo tulai mo le ua molia, ae o Mitzie Jessop o loo tulai mo le itu a le malo i lenei mataupu.

O le afioga i le alii faamasino sili lagolago ia Lyle L. Richmond sa faatautaia le iloiloga o lenei mataupu, i le lagolagosua a le afioga i le alii faamasino lagolago ia Mamea Sala Jr.