O le aumalaga a sui usufono e to’a 21 mai Amerika Samoa ua autova’a atu nei mo Sapapali’i i Savaii, se’i toe tau fa’aolaola teisi lagona sa i ai i Taitai o le Lonetona Misionare Sosaiete, lea sa ulua’i tuvae ma fa’amautu le Ekalesia LMS - lea ua suia nei i le Ekalesia Fa’apotopotoga Kerisiano i Amerika Samoa Samoa, po’o le EFKAS.

“E le fa’apea ua toe tau fa’aolioli e te’ena le suiga e tautua ai i le fa’aigoaina o le Ekalesia, e leai, o le agaga ia toe tau fa’atumau se mea o le a mou malie ese atu, ma le toe manatuaina lava,” o se tala lea a le Ta’ita’i Aoao o le fa’alapotopotoga a le LMS ia Rev. Faletoi Uso.

I le LMS ua toe fa’atula’ia nei talu mai le tausaga e 1962, ua amata ona iloga a latou galuega foa’i, galuega fesoasoani, ma e fa’aauau pea lava ia galuega, ina ia mautinoa, o fai se sao e agatonu lava i le Ekalesia Fa’apotopotoga Kerisiano i Samoa po’o Amerika Samoa, po’o Niu Sila, lea e aofia o latou sui i totonu o le Sosaiete ua i ai nei.

“O le tausaga lenei ua talimalo ai le LMS i Samoa, ma ua latou filifili e toe fa’auia ala sa ulua’i savalia mai le amataga, pe toe fafagu ai fo’i nisi agaga fou ma fa’aolaola ai pea lagona o sui totino tuai o i ai nei,” o se fa’amatalaga lea a Rev. Uso e pei ona masi’i ai nei le au usufono a Amerika Samoa e malaga i Savaii.

O latou mataupu mo le fonotaga, ua fa’ailoa mai e le susuga le Taitai Aoao, “O lo ua matou soalaupule, ma fa’amautu ai se lafoga, ia faia se matou meaalofa mo le galuega o toe fausia ai le Malumalu o le Iupeli Siliva i totonu o le Lotoa i Malua, le a’ai o le Ekalesia Fa’apotopotoga Kerisiano i Samoa.”

O nei mataupu uma e iloiloa ma pasia a’ia’i ai i a latou fonotaga e usuia i Sapapali’i, ma o se fa’alagona sili lea e maua ai se una’iga lelei o galuega atina’e e tusa ai ma se saunoaga a Rev. Uso. “O le i ai i eleele na mua’i sofa’ia e le Talalelei, e ono i ai fa’alagona aoga tele, e una’ia ai le agaga ia faia galuega lelei mo le atina’e o le tino o Keriso, o le Malu lea o le Iupeli, ua tatou iloa o le pine lea i Malua o le atoaga o le ulua’i Iupeli, sau ai i le Senetenari ma fa’asolo mai ai, lea fo’i ua toe fa’afouina, ae o se pine lea i le soifua galulue o e uma na tofi fa’apitoa mo le tau’aveina ole fe’au o le Talalelei i le atu Samoa ma le vasa pasefika, lea fo’i e tele se sao o Amerika Samoa i lona fa’atinoga.”

O le uiga o lana lea saunoaga, e to’atele fo’i alo o Amerika Samoa sa a’otauina i Malua, fofoa ai le olaga kerisiano ma mafutaga fa’ale’aiga o le Atua, auina atu i Papua Niu Kini, Solomona, Niu Heperiti (lea ua taua i le taimi nei o le malo o Vanuatu) ma Fiti, e tala’i le Talalelei ia Iesu Keriso.

“O nisi o nei molimau ola, o lo’o soifua pea i le taimi nei, a’o alo i latou na fofoa i vao ese, a’o galulue matua ma auauna i le Atua e ala i le tofi Faife’au mo tagatanu’u o Solomona, Papua Niu Kini ma isi.” o se tala otooto lea sa ia fa’ailo mai.

“O nisi o nei augatupulaga e aofia ai le susuga Moru Mane, sa soifua ane o ia i Papua Niu Kini, o Meipa Solomona Aumavae ma le afioga le Fa’atonu o le Matagaluega o Alamanuia mo Tagata Lautele o Taeaoafua Meki Solomona,” o sana tala lea ma ata i le tatou nusipepa nei.

O le isi lea galuega o faia nei e le LMS ma ona sui totino, afai e i ai se tasi e le o maua o se alo o Fa’afeagaiga sa Fa’amisionare e le LMS i na tausaga, fa’ailoa mai, se’i fa’amaumau, ia mafai ona maua o latou suafa i nei lisi o suli o e na tala’i le Talalelei.

O lo’o latou fa’amautuina le latou Upega Tafa’ilagi mo nei fa’amaumauga uma, e aoga mo lou soifua timata i le lumana’i, e fa’ailo ai auaunaga a ou matua, po’o matua o tou matua.

O le sosaiete fou lenei a le LMS, na toe fa’avaeina e afua mai Niu Sila ina ua mau fa’atasi loto o ta’ita’i na fa’avaeina lea sosaiete, e toe fa’amautu atili le igoa, LMS e fa’aauau ai ona manino le tala fa’asolopito i fanau ma augatupulaga e le’i soifua mai o Aiga Samoa. O nisi o i latou na soalaupule ma timata le upega fagota e fa’atula’ia le LMS fou e aofia ai, Leuatea Sio, Setu ma sa failautusi ai Rev. Ned Ripley lea e mautua umi lana auaunaga i Fagatogo, Amerika Samoa.

I le taimi nei o Rev. Elia Ta’ase o le EFKAS i Nuuuli lea o lo’o avea ma Taitaifono o le LMS a Amerika Samoa. O le LMS e lua ona lala i Niu Sila, Aukilani ma Ueligitone, ae tasi lona lala i Samoa lea e talimalo, ma le lala i Amerika Samoa lea e to’a 30 sui totino peita’i, e to’a 21 i latou o lo’o malaga i le usugafono.

I le taimi nei, ua fa’ailo le LMS ma ana galuega fa’amisionare i le Council of World Missions [CWM] lea sa usuia mai le latou fonotaga aoao i Amerika Samoa i le 2010. Peita’i a fa’asamoaina lea igoa ona fa’ailo lea Fa’apotopotoga o Galuega Fa’amisionare i le Lalolagi [FGFL]. O lo’o auai atu le sui o le tatou nusipepa i Samoa mo nisi ata o lea fonotaga.