E 45 aso lea ua fa’asala ai e le fa’amasinoga fa’aitumalo le ali’i pagota o Michael Agasiva i le taeao ananafi, ina ua ta’usala o ia i le moliaga o le fa’atupu vevesi i nofoaga faitele, e mafua mai i le fa’alavelave lea na ia fa’ao’olima ai i se isi ali’i pagota ma manu’a ai lea ali’i.

E ui na finau le itu a le malo ina ia fa’asala Agasiva i le toese mo le umi e 6 masina, o le fa’asalaga pito maualuga lea o lo o fa’atulaga mai i le tulafono mo le moliaga o le fa’atupu vevesi i nofoaga faitele, peita’i na taua e le ali’i fa’amasino o John Ward II e fa’apea, o le 45 aso lea ua manatu le fa’amasinoga e fa’aopoopo i le fa’asalaga a le ua molia o lo o tuliina nei, o se fa’asalaga pito talafeagai lea i le silasila a le fa’amasinoga.

Saunoa fo’i Ward e fa’apea, sa i ai le isi ali’i pagota na fa’asala e le fa’amasinoga na te tuliina le umi e 90 aso i le toese i Tafuna, ina ua ta’usala o ia i le moliaga mama o le fa’ao’olima i le tulaga tolu, ona o le fa’alavelave lea fo’i na ia fa’ao’olima ai i se ali’i pagota na taofia fa’atasi i laua i totonu o le toese.

Na maua le avanoa e fa’afofoga ai le fa’amasinoga i fa’afinauga fa’ai’u a loia mo itu e lua e tusa ai o se fa’asalaga e talafeagai mo lenei mataupu.

Na taua e le loia a Agasiva o Sharron Rancourt e fa’apea, o lo o taua i le ripoti a leoleo, e le na o Agasiva na a’afia i le mataupu lenei, ae sa i ai fo’i le a’afiaga o se ali’i leoleo o le falepuipui sa faia ai.

Na taua e se molimau e fa’apea, o le vevesi lenei na tula’i mai ina ua tatala e se leoleo o le falepuipui le faitoto’a o le sela sa loka ai le ali’i na a’afia, ma mafai ai loa ona alu atu Agasiva ma fasi lea ali’i.

Na taua fo’i e Rancourt e fa’apea, o Agasiva o lo o tuli sona fa’asalaga fa’afalepuipui e 5 tausaga, ae na talia e le Komiti o le Palola lana talosaga e tatala ai o ia i tua i le tausaga na te’a nei, ae na toe suia lea fa’aiuga ina ua fa’alogo sui o le Komiti i fa’amatalaga e fa’atatau i le mataupu lenei, lea na fa’atoa faila e le malo ina ua tuana’i nai masina talu ona tula’i mai le fa’alavelave.

Na taua fo’i e Rancourt i le fa’amasinoga le tulaga toatele ua i ai le aofai o pagota i le toese i le taimi nei, ma o se tasi lea o itu e ao fo’i ona iloilo toto’a i sa latou fa’aiuga.

Saunoa Ward e fa’apea, e le o se taimi muamua lea ua taulimaina ai e le fa’amasinoga fa’aitumalo mataupu e a’afia ai tulaga tau fa’ao’olima i totonu o le toese i Tafuna, ma o ni isi o nei mataupu e a’afia ai pagota ae o isi mataupu o lo o a’afia ai leoleo o le toese.

Na fa’afetaia e le fa’amasinoga fa’afinauga a loia e tusa ai o lenei mataupu, peita’i i le silasila a le fa’amasinoga, so o se pagota e taofia i le toese e tatau lava ona ia usitaia tulafono uma o lo o pulea ma fa’atautaia ai le nofoaga.

Saunoa fo’i Ward e fa’apea, e talitonu le fa’amasinoga e le talafeagai le fa’asala o Agasiva mo le 6 masina mo le moliaga o le faatupu vevesi i nofoaga faitele lea ua ta’usala ai o ia, ao lea na latou fa’asalaina le isi fo’i alii pagota mo le umi e 90 aso, ina ua ta’usala o ia i le moliaga o le fa’aoolima i le tulaga tolu.

Na vaaia le luelue o le ulu o le ali’i o Agasiva i le saunoaga lea a le ali’i fa’amasino, ma tu’uina mai ai loa le fa’aiuga a le fa’amasinoga, e fa’asala Agasiva mo le umi e 45 aso.

O lea fa’asalaga o le a fa’aopoopo i lana fa’asalaga e 5 tausaga o lo o tuli i le taimi nei.