O ni isi o fa’amaumauga fou na mafai ona mapuna a’e i le taeao ananafi i le ulua’i iloiloga o le mataupu e pei ona tu’uaia ai se ali’i e 36 tausaga le matua, i lona faia o uiga mataga i le teineititi e 13 tausaga le matua na a’afia, o lona taumafai lea e ofo atu se tupe e $50 i le teineititi na a’afia, ina ia mafai ai ona la kisi.

Na taua e le ali’i leoleo o lo o gafa ma le su’esu’eina o lenei mataupu ia PSO II. Salefasa Matatule i lana molimau e fa’apea, ina ua musu le teineititi e talia le $50 na ofo atu i ai e le ali’i o Leo Petelo, na aapa atu ai loa le ua molia ma toso mai le lima o le teineititi ma kisi fa’amalosi atu i ai.

O le iloiloga lea na fa’atulaga i le taeao ananafi, na iloilo ai e le fa’amasinoga fa’aitumalo molimau a le malo, pe lava ma totoe ia mau e lagolago ai sa soli se vaega o le tulafono, ae po o le ali’i fo’i o Petelo o lo o tu’uaia mo’i i le soli o le tulafono.

E na o le itu a le malo na valaau le latou molimau, le ali’i leoleo ia PSO II Matatule, ae leai se molimau a le itu tete’e.

Na taua e Matatule i lana molimau tauto i le taeao ananafi e fa’apea, o le uncle o le teineitiiti na a’afia na ia fa’afeso’otaia le Ofisa o Leoleo i Tafuna mo se fesoasoani, i le mae’a ai lea ona fa’amatala atu e lona niece amioga mataga sa faia e Petelo ia te ia.

Na taua e Matatule e fa’apea, ina ua latou taunu’u ma isi leoleo e to’alua i le nofoaga na tula’i mai ai le fa’alavelave i Nu’uuli, sa latou aga’i sa’o atu ai i le vaega tonu o lo o i ai le ali’i ua molia, ina ua mae’a ona fa’asino atu ia te i latou, ma maua atu ai o ia o lo o moe i luga o le nofoa.

Na taunu’u leoleo i le vaega o lo o moe ai Petelo, ma taumafai loa e fafagu o ia i luga ina ia malamalama i le mafua’aga o le latou malaga atu.

Na fesili le loia a le malo ia Matatule pe na maua se taimi na te fesiligia ai le teineititi na a’afia i le vaveao na tula’i mai ai le fa’alavelave, na tali le molimau, ina ua ia fesiligia le teineititi na a’afia i le po na tula’i mai ai le fa’alavelave, sa le mafai ona fai sana fa’amatalaga, ona sa mafatia lona loto ma tagi fo’i.

“Ona ou fa’atonuina lea o ia e toe o ma lona uncle i le fale, a ia usu atu i le taeao e sosoo ai mo le tusiaina o sana fa’amatalaga”, o Matatule lea.

I le fa’amatalaga tusitusia a le teineititi na ave i leoleo e pei ona taua e Matatule, o lo o taua ai e fa’apea, o le mataupu na tula’i mai ina ua valaau Petelo i le teineititi o lo o i le foga fale i luga o le latou fale, e sau i lalo o lo o mana’o atu lona uncle ia te ia, ma o iina lea o lo o tu’uaia e le teineititi na tula’i mai ai loa le fa’alavelave e pei ona faia ai e le ua molia amioga mataga ia te ia.

Ina ua mae’a le iloiloga o lenei mataupu, na talosaga ai Petelo i le fa’amasinoga mo se avanoa se’i fai atu ai sana fa’amatalaga, peita’i na fautuaina o ia e le fa’amasinoga ina ia talanoa sa’o i lana loia pe afai e i ai se mea e fia talanoa atu ai i le fa’amasinoga.

O le taeao nei lea ua faatulaga e tula’i ai Petelo i luma o le fa’amasinoga maualuga, mo le fa’atulagaina loa o se aso e faia ai lana fa’amasinoga autu.

O lo o taofia pea Petelo i le toese i Tafuna se’i vagana ua ia totogi le $20,000 ua fa’atulaga e le fa’amasinoga ona fa’atoa mafai lea ona tatala o ia i tua mai le falepuipui.