Ads by Google Ads by Google

Taumafai pea Faipule Jennings faamanino so’otaga va Swains ma AS

O se tasi o mataupu na taua e le alii faipule mai Swains o  Alexander Eli Jennings o le a finau pea e faamae’a, pe afai ae toe filifilia o ia e avea ma faipule mo le motu, o le taumafai lea e faamanino le uiga moni o le sootaga i le va o Swains ma Amerika Samoa.

I se faatalatalanoaga ma le Samoa News i le aso ananafi, na taua ai e le alii faipule e faapea, o le le mafai ona palota o le faipule a Swains i totonu o le maota o sui i taimi e faia ai faaiuga, o le ata vaaia lena o le le amanaiaina o le leo ma aia o tagata Swains i Amerika Samoa.

“O le mea pito sili ona taua i lo’u manatu e tatau ona faamanino ia Amerika Samoa, o le a tonu lava le uiga o le tatou mafutaga i totonu o Amerika Samoa nei, o le tele o taimi e faatuatuana’i ai lava Swains ma ua foliga mai ai Swains o se motu ua le toe amanaiaina i le taimi nei, e ui e tutusa lelei Swains ma Amerika Samoa,” o le saunoaga lea a le alii faipule.

E ui i manatu e leai nisi o toe nonofo i Swains i le taimi nei, e le’i avea lea ma itu o lo o punitia ai taumafaiga a le alii faipule e saili se lumanai manuia mo Swains.

“O tala lava na fai mai e leai nisi o totoe i Swains, ae a tatou vaavaai i le tulaga o Swains,  e tele faamanuiaga e mafai ona maua mai ai e Amerika Samoa mai le malo tele, pe afai e amanaia lona tulaga, ma o nisi o ia tulaga e aofia ai puipuiga o oga sami, aemaise ai o lea foi ua tuuina atu i lalo o le vaavaaiga a le malo tele, ina ia avea Swains ma ogasami faasao mo le malo tele,” o le saunoaga lea a le alii faipule.

O tulaga i femalagaaiga i vaa, faiga faiva faapea ai fesootaiga i leitio ma telefoni, o nisi nei o taumafaiga na taua e Jennings o lo o ia unaia mo Swains.

O lona talitonuga, e tele atu le tamaoaiga o le sami e pei o fagotaga e mafai ona maua mai i Swains, pe afai ae tatala le avanoa e malaga ai le aufai faiva e fagota mai le tamaoaiga o lo o i ogasami o Swains, ma fesoasoani mai i le tamaoaiga o Amerika Samoa.

Fai mai le alii faipule, o le fono o le Faavae na faia i ni nai tausaga e lei mamao atu, sa ia taumafai e faamanino le va feagai ai o Swains ma Amerika Samoa, peitai sa atagia mai i lea fonotaga e lei faigofie ona ofi i finagalo o tupu ma tamalii o Amerika Samoa lana faafinauga.

“E ui e lei amanaiaina la’u ulua’i talosaga, ae o lea lava ou te finau, afai foi e tafa le finagalo o tamalii o lo o i le Senate, ae avatu le sui o Swains e tuu i le maota maualuga o se tulaga lelei lea mo le amanaiaina o aia tatau o tagata Swains,” o le saunoaga lea a le alii faipule.

O le talitonuga o le alii faipule, e tutusa lava le autu o lo o filifilia ai le Senate o le faatumauina lea o tu ma aganuu a Samoa, ma le autu o lo o filifilia ai le sui o Swains i le maota o sui, o le taumafai lea e puipui agaifanua o Swains.

O le Aso Toonai ua faamoemoe e faia ai se fonotaga a tagatanuu uma o Swains, i le ofisa palota i Tafuna, mo le sailia o se latou faipule i le maota o sui mo le isi lua tausaga

Ua faailoa mai e le alii faipule lona faamoemoe mo le toe tuuina atu o lona igoa e tauva mo le tofi o le motu